Kunnasì nga Pegafuanan?

Anni i makoffun nikaw tapenu magenjoy ka ta pabbibbigmu tu Biblia anna mabenefisiowakka? Innan i lima nga suhestion nga nakoffun ta magaru.

Magaleg tu mepangngo nga lugar. Magaleg tu memammo nga lugar. Lillitammu ira i maka-istorbo ta pabbibbigmu. Makasta nu manawag anna presko i pallevumu tapenu mas mabenefisiowakka ta pabbibbig.

Mapeggan tu fustu nga pagimamma. Naggafu ta nelangitan nga Yama tam i Biblia, yari tu mas mabenefisiowakka nu parigammu i ugali na abbing nga sigga-paran nga maggigiammu ta meddu nga magana. Nu egga ira i dati nga negatibo nga opinionmu meyannung ta Biblia, alsan danatun tapenu matudduannaka na Dios.​—Salmo 25:4.

Makimallo nige mabbibbig. Panono na Dios i egga ta Biblia, yari tu kawagattam i uffunna tapenu malippawa yatun. Nipromesa na Dios nga iddanna tu “Espiritu Santo danuri i makkiddaw sa.” (Lucas 11:13) Makoffun i masanto nga espiritu tapenu malippawa i appana-panono na Dios. Sonu kua, vukatanna i nonomu tapenu matindiammu “maski paga i kononaggan nga uray na Dios.”​—1 Corinto 2:10.

Intindian i bibbibbigammu. Ari laman nga basta bibbigan i material. Pannonopan tu mapia i bibbibbigammu. Iyavumu ta baggim yaw ira: ‘Anni ira nga kualidad i masingakku ta karakter nga bibbibbigakku? Kunnasì meyaplika yaw ta pattolè?’

Mangngua tu espesipiko ira nga goal. Tapenu mabenefisiowan ta pabbibbigmu ta Biblia, igakkagmu nga egga magigiammum nga makoffun ta pattolem. Awayyam mangngua ira tu goal kagitta na: ‘Kayàku paga tu aru i mammuakku meyannung ta Dios.’ ‘Kayàku mabbalin tu mas mapia nga tolay, atawa nga lalaki onu atawa nga babay.’ Tapus, pilian i parte ira na Biblia nga makoffun nikaw tapenu makuam danatun.a

Makoffun yaw nga lima nga suhestion tapenu makegafu ka. Ngem kunnasim pabbalinan tu mas makapa-interes i pabbibbigmu? Egga ira i suhestion ta tumunug nga artikulo.