Nu Nafektan Ka na Kalamidad

“Awan tu awa-awayyami ta gafu. Nadaral i ngamin nga pakkukuami megafu ta paddabba na davvun anna paddakal na danum.”—Andrew, Sierra Leone.

“Kabalin na bagiu, nanoli kami ta balemi. Awan pulus tu nabattang. Nakaddag kami. Nappalittukag anna siminangi i ana ku.”—David, Virgin Islands.

NU NAKAEKSPIRIENSA ka ngana tu kalamidad, malippawa mu gapa i natageno na nakaekspiriensa ira tu kunnatun: nakaddagan, ariadda maaksepta, magulu-guluan, mavuru-vurung, anna marake ira i matatagenoda. Manakida ngana i mattolay megafu ta nakkafi i nonoda anna nababbannag ira.

Nu nawawammu i ngamin megafu ta kalamidad, matageno mu gapa nga gittana ariammu ngana makaya. Posible nga matageno mu nga awan tu sesserbi na pattolem. Ngem kagian na Biblia nga egga i serbi na pattolem anna makapattalo ka nga egga i makasta nga mappange.

MANGIYAWA NITTAM TU IDDANAMA I KINAKURUG TA BIBLIA

Kagian na Eclesiastes 7:8: “Mas makasta i pattuppalan na tadday nga gannug anne ta gafuna.” Nu bagu laman nga nappasammu i tadday nga kalamidad, kagitta na awan tu iddanama na pattolay. Ngem ta pappasa-pasensiam nga itoli i dati pattolem, makkasta lagapa i situasiommu.

Kagian na Biblia i tiempo nga “awan ngana noka tu . . . maraddam, onu tumangi-tangi, onu magattam ta taki.” (Nepakannammu 21:4) Mesimmu yaw sonu paraiso ngana i mundo nga sakup na Pappatulan na Dios. (Salmo 37:11, 29) Awan ngana noka tu kalamidad. Kammu ngana sangaw manono i mataka-taki ira nga nesimmu anna i daddam nga nabayag nga inattammammu, ta nipromesa na Makapangngua-sa-ngamin nga Dios: “Ari ngana manono i nappasa ira nga ganna-gannug, ni mepafutu paga danatun.”—Isaias 65:17.

Nonopammu: Niyunnug na Namaratu nga “mangiyawa [nikaw] tu mappange anna iddanama”—memammo nga pattolay ta perfekto nga pammaguray na Dios. (Jeremias 29:11) Makoffun kari yaw nga kinakurug tapenu matageno mu nga egga i serbi na pattolem? Kinagi ni Sally nga nakagi ta gafu nga artikulo, “Nu agga-nono mu i makakkasta ira nga gannug nga kuan na Pappatulan na Dios para nittam ta mappange, moffunan naka nga ari maffokus ta marake ira nga nesimmu anna maattamman i maddaggun nga situasiommu.”

Makasta nu ammuammu paga i aranni ngana nga kuan na Pappatulan na Dios para ta totolay. Nu kuammu yatun, makapattalo ka nga maski nu nazziga-riga ka megafu ta kalamidad, egga lagapa i serbi na pattolem durante nga iinnaggammu i mappange nga awan ngana pulus tu kalamidad. Ngem sangawe, mangiyawa i Biblia tu praktikal ira nga uffun tapenu makapagattam ka ta efekto na kalamidad. Innan i piga ira nga angngarigan.

Makoffun ira nga Teksto ta Biblia

Makkatrug tu mapia.

“Mas makasta i tanga-kamo nga pagibannag anne ta dua-kamo na pabbabbannag anna paddaddag ta paddag.”—Eclesiastes 4:6.

Kagian na researcher ira nga kabalin na makapa-trauma nga ekspiriensa, “i kurang nga katrug . . . ay mamaggrabe ta sintomas ira na traumam anna umaru i emosional nga problemam.” Makasta gafu nu makkatrug ka tu mapia.

Kagiammu i mataga-tageno mu.

“Maddammo [onu, “marraddam,” footnote] i futu na tolay megafu ta pavvuru-vurung, ngem i mapia nga uvovug i mamagayayya tatun.”—Proverbio 12:25.

Makibbida ta kafamiliam onu ta mapattalakkan nga kofummu. Fuera paga ta pagginnada ta mataga-tageno mu, mapasikaddaka anna maduffunaddaka ta pakawagammu.a

Nonopan i makasta nga mappange.

“Innaggat-tam i nitabba na Dios nga bagu nga langi anna bagu nga davvun nga pammagurayan na katunung.”—2 Pedro 3:13.

a Baka mawag nga mappa-doktor i tadday nga nabayag ngana nga mai-stress onu fermi i pavvuru-vurunna.