Malawa Mu i Mannanayun ira nga Bendision na Namaratu

Nipromesa na Dios kani profeta Abraham nga mabendisionan i “ngamin nga nasa-nasion ta davvun” gukaban na tadday ta gakana. (Genesis 22:18) Sinni yatun nga gaka?

Maggi 2,000 dagun ngana i nappasa, niddan na Dios si Jesus, i gaka ni Abraham, tu pakapangngua nga mammilagro. Pakurugan danatun nga milagro nga i nepromesa kani Abraham ay meyawa ta nasa-nasion gukaban ni Jesus.​—Galacia 3:14.

Gafu ta milagro ira ni Jesus, nammuan nga yayya i pinili na Dios nga mamendision ta totolay anna nepasingan nu kunnasi yayya usan na Dios tapenu bendisionan i totolay ta mannanayun. Masingan ta milagro ira ni Jesus i karuan ta makakkasta ira nga kualidadna.

Minaggiddu​—Pinammapia ni Jesus i mataki.

Mittan, nakimemallo kani Jesus i tadday nga mallepproso nga pammapianna yayya. Nipotun ni Jesus i limana sa anna kinagina: “Yatun i urè.” Insigida nga nammapia i mallepproso.​—Marcos 1:40-42.

Minangngiyawa​—Pinakan ni Jesus i mabisin.

Manaki ni Jesus nga mabbisin i totolay. Ari laman tu mittan nga milagro nga pinakaruna i pan anna manango tapenu mapakanna i rinivu nga totolay. (Mateo 14:17-21; 15:32-38) Kabalidda kiminan, nabattug ira ngamin anna aru paga i navuna nga makan.

Minangngikallo​—Pinaginnolay ni Jesus i natay.

Gafu ta “ziminatu i allo” ni Jesus, pinaginnolayna i tattadday nga ana na balu nga tattadday ngana laman ta pattolena.​—Lucas 7:12-15.