Pasa-pasensiattam i Maginnag

Kunnasi ngana kabayag i paginnennag mu ta paddattal na Pappatulan na Dios? Mappasa-pasensia ka kari maski egga pazziga-riga? (Ro 8:25) Mekala-kalussaw, mamaltratu, mefuku, onu mappeligro paga i inango na karuan nga Cristiano. Aru gapa i magatta-attam ta grabe nga taki, onu pallakay onu pabbako.

Anni i makoffun nittam nga mappasa-pasensia nga maginnag maski meparubang ta kapurueba ira? Mawag tu inaggaw nga pasikannattam i pangurug tam gukaban na pabbibbig tu Biblia anna monag nga pannono. Maffokus ta iddanama tam. (2Co 4:16-18; Heb 12:2) Makimemallo tam kani Jehova anna kiddawan i uffun na masanto nga espirituna. (Lu 11:10, 13; Heb 5:7) Moffunan ittam na minaggiddu nga Yama tam nga ‘sigga-pagayayya anna sigga-pasensia nga magattam.’​—Col 1:11, ftn.

GIRAWAN I VIDEO NGA MAWAG TU “PASIKANNAT-TAM I NONO TAM” TA PAREHA​—MAKKOMFIANSA NGA MALA I PREMYO, KABALINNA, TABBAGAN I TUMUNUG IRA NGA PAKKIAVU:

• 

  Anni ira nga “ari-menanaman nga mesimmu” i awayyana nga meparubang nittam? (Ec 9:11)

• 

  Kunnasi ittam moffunan na pakimallo nu meparubattam ta kapurueba ira?

• 

  Nu ari ngana kagitta na dati i makua tam ta passerbi kani Jehova, ngatta mawag tu maffokus ittam ta makua tam paga?

• 

  Anni i makoffun nikaw nga makkomfiansa nga mala i premyo?