“Magatta-attam Kamu Adde ta Pangurianan”

1, 2. (a) Anni i magigiammu tam ta pagatta-attam ni Gideon anna na 300 nga totolena? (Innan i letratu ta gafu na artikulo.) (b) Segun ta Lucas 21:19, ngatta importante i pagatta-attam?

KABBANNAG i gerra. Ta pangiyorollu ni Gideon, interu gabi nga zinaddaddag na suddalu ira nga Israelita i kalaban ira nga Midianita kunne na gapa i kaalyaduda ira—32 kilometro i distansiana! Kinagi na Biblia i tumunug nga nesimmu: “Nakadde si Gideon ta Jordan, anna naddaki yaya. Nababbannag ngana yaya anna i kakavvuluna nga 300 lallaki.” Ngem ari paga nangaffu si Gideon anna i totolena ta egga paga 15,000 nga suddalu nga kalabadda. Kabalin na piga ragun nga panazza-tazzi na Midianita, ammu na Israelita ira nga ari tu yaw i tiempo tapenu magimmang. Tapenu mofu i kalaban, “ariadda niyemmang i panaddagda” adde ta naffuda gabbalaman i Midian.​—Uk. 7:22; 8:4, 10, 28.

² Awan gapa tu immang na pakillabattam. Kalabattam si Satanas, i mundona, anna i kina-imperfekto tam. Dekada ngana nga makikkillaban i karuan nittam, anna nangaffu tam megafu ta uffun ni Jehova. Egga gapa ira i tiempo nga gittana nababbannag tam ngana ta pakillaban anna ta paginnag ta pangultimuan na sistema na ganna-gannug. Ngem, ariattam paga interamente nga nangaffu. Kinagi ni Jesus nga grabe ira i kapurueba anna marake i pattratu ta mattolay ira ta pangurianan nga aggaggaw, ngem kinagina gapa nga nakadepende ta pagatta-attam i pangaffu tam. (Bibbigan i Lucas 21:19.) Anni i pagatta-attam? Anni i makoffun nittam tapenu makapagattam? Anni i magigiammu tam ta nakapagattam ira? Anna kunnasi tam nga ‘magatta-attam adde ta pangurianan’?​—Sant. 1:4.

ANNI I PAGATTA-ATTAM?

3. Anni i pagatta-attam?

³ Ta Biblia, ari laman tu basta pappasa-pasensia ta kapurueba anna problema ira i kaya kagian na pagatta-attam. Melagum taw i nono anna i futu, onu kunnasi tam arubangan i ziga-riga. Masikan i nono na tolay nga magatta-attam, determinadu anna minappasensia. I pagatta-attam ay “i espiritu nga mangiyangngo ta ganna-gannug, ari nga megafu ta awan ngana tu makuana tatun, nu ari megafu ta masiki-sikan nga iddanama,” segun ta tadday nga referensia. “Yatun i kualidad nga mamattalupaddian ta tadday nga tolay nga agga-taddag anna umarubang ta paddag. Yatun i makasta nga ugali nga mamabbalin ta pinakamariga nga kapurueba tu kedayaw megafu ta masinganna i bendision maski nu mazziga-riga.”

4. Kunnasi tam makagi nga megafu ta aya i pagatta-attam?

⁴ Magattam i Cristiano megafu ta aya. (Bibbigan i 1 Corinto 13:4, 7.) Megafu ta aya tam kani Jehova, maattammattam i maski anni nga mekunnay ta urena. (Luc. 22:41, 42) Megafu ta aya, maattammattam i kina-imperfekto na wawawaragi. (1 Ped. 4:8) Makoffun i aya ta gi-attawattam tapenu mapaladda i pagatawa anna makapagattam ta “kavuru-vurungan” nga maekspiriensa maski na magayaya nga sigga-atawan.​—1 Cor. 7:28.

KUNNASI KA MAKAPAGATTAM?

5. Ngatta si Jehova i kapianan nga makoffun tapenu makapagattam ittam?

⁵ Maki-uffun kani Jehova. Si Jehova i “paggafuan na pasensia anna sikan na nono.” (Roma 15:5) Mantindianna i problema tam ira, anna nu kunnasi nga afektan ittam na pallevu, emosion, anna na narensia tam nga ugu-ugali. Yaya gafu i kapianan nga makoffun tapenu makapagattam ittam. Kagian na Biblia: “Ngamin i pinaratu ay sikaw i ed-da pagiddanaman; ta tiempo na pagawag da ay iddam-mu ira ta kanan.” (Sal. 145:19) Kunnasi gafu i panabbag na Dios ta pakkiddaw tam tu siki-sikan tapenu makapagattam?

6. Kagitta na kinagi na Biblia, kunnasi ittam nga melilli ni Jehova ta kataga ta tentasion?

⁶ Bibbigan i 1 Corinto 10:13. Nu mappoffun ittam kani Jehova tapenu maarubang i problema ira, ‘melilli tam ta kataga ta tentasion.’ Maniobran kari ni Jehova i ganna-gannug tapenu malsa i problema? Awayyana nga kunnatun. Ngem, maruddu nga mangiyawa i Dios tu ‘sikan [nittam] nga magattam.’ Wan, pasikannanna ittam tapenu mapasensia anna sigga-pagayaya nga maattammattam i ngamin nga mesissimmu nittam. (Col. 1:11) Megafu ta talaga ammu ni Jehova i pisikal, mental, anna emosional nga limitasiottam, arianna ipamavulun nga marriga i situasion adde ta ariattam ngana makapammakatalo.

7. Iyilustra nu ngatta mawag i espiritual nga makan tapenu makapagattam.

⁷ Paladdammu i pangurugmu gukaban na espiritual nga makan. Ta Mount Everest nga katannangan nga vukig, kada-aggaw 6,000 calories i kawagan na mune tatun, mas aru anne ta normal nga kawagan na ordinario nga tolay. Tapenu makapagattam ta pagune anna makadde ta utun, kawagan na baggina i mas aru paga nga calories. Mawag gapa i regular nga pakkakan tu espiritual nga makan adde ta posible tapenu makapagattam anna makadde ta pappangetattam. Disiplinadu tam nakuan nga mangusa tu tiempo ta pabbibbig, paggigiammu, anna ta study. Mapaladda i pangurug tam gukaban na “kanan nga mangiyawa ta inango nga adde ta ngangangay.”​—Juan 6:27.

8, 9. (a) Segun ta Job 2:4, 5, anni i nelagum nu mepa-arubattam ta kapurueba? (b) Nu egga problemam, anni nga eksena i nonopammu?

⁸ Daddamman i isyu na kinamatalo. Nu mepa-arubang ta problema i aripan ni Jehova, egga i mas importante nga isyu anne ta pazziga-rigana. Masingan ta pangarubattam ta problema, nu talaga imammatattam si Jehova nga Soberano ta Uniberso. Si Satanas, nga kumokkontra ta kepangngattan ni Jehova nga mammaguray, inuyawna si Jehova ta pakkagina: “Iyawa na tadday nga tolay i ngamin nga egga sa para ta inangona. Ngem tapenu tanakuan labbi, sonnatammu i limam, anna pattakitammu i tulang anna pattagna, ay siguradu nga igeg naka ta mismu nga arubammu.” (Job 2:4, 5) Para kani Satanas, awan tu masserbi kani Jehova megafu ta kurug nga ayatadda yaya. Nanguli kari ngana yatun nga pamaliwa ni Satanas? Ari! Kabalin na aru nga siglo turi ta napapanaw si Satanas ta langi, nagalan lagapa yaya nga “mamali-paliwa ta wawwagi tam . . . , ta arubang na Dios tam aggaw-gabi.” (Nep. 12:10) Ari paga nattamman ni Satanas i isyu na kinamatalo. Kakayana masingan nga makkafi i nono tam megafu ta kapurueba anna mawawan i suporta tam ta soberania ni Jehova.

⁹ Nu marigi-rigatakka ta problema, nonopammu yaw nga eksena. Giri-girawaddaka ni Satanas anna na demoniona ira, nga kakkagiadda nga makkafi i nonomu megafu ta pazziga-rigamu ira. Egga gapa ta abbag si Jehova, anna i Anana, i napaginnolay nga nazelugan ira, anna napakaru nga anghel. Pasa-pasikannadda i nonomu anna magayaya ira ta pagattattammu ta inaggaw anna passuportam ta soberania ni Jehova. Maginnam gapa nga kakkagian nikaw ni Jehova: “Mammasirib ka, anaku, anna pagayayatammu i futù, tapenu mawayyà nga matabbag i manutturia niakan.”​—Prov. 27:11.

10. Kunnasim maparigan si Jesus ta paffokusna ta bendision na pagatta-attam?

¹⁰ Maffokus ka ta bendision na pagattattam. Angngariganna, ta ararayyu nga pabbiahe, nagimmakka ta tangnga na apaddu nga tunnel. Puru zibbo laman i masingammu. Ngem, komfiansa ka nga nu tulu-tuloy ka ta pabbiahe adde ta pangultimuan na tunnel, masingammu i nawag. Egga gapa i tiempo nga gittana pakkafiannaka na problema ira nga arubangammu. Awayyana nga kunnatun gapa i natageno ni Jesus. Yaya i puntiria na ‘nepallo nga pangontra na minattagaruli,’ pamasa-pasiran, anna mataka-taki nga patay ta pakaziga-rigatan nga estaka—i talaga pinakamariga nga tiempo na pattolena ta mundo! Ngem, inattammanna ngamin yatun “megafu ta pagayaya nga maginnennag sa.” (Heb. 12:2, 3) Naffokus yaya ta bendision ira na pagatta-attamna, neerulay ta pamakasanto ta ngagan na Dios anna paddefensa ta soberania ni Jehova. Temporario laman i pazziga-riga ni Jesus, ngem mannanayun i bendisionna ta langi. Ta kaggawattam, mataka-taki anna kappasiran i problema nga arubangattam. Ngem, daddammammu nga temporario laman i ziga-riga ta dalan mappange ta mannanayun nga inango.

DANURI “NAKAPAGATTAM”

11. Ngatta ikonsidera tam i ekspiriensa na “nakapagattam ira”?

¹¹ Ari ittam nga tattadday nga magattam. Tapenu mapagaram i Cristiano ira ta ziga-riga nga naggafu kani Satanas nga Demonio, kinagi ni apostol Pedro: “Tubangan nu i Demonio ta maladda nga angngurug nu, ta ammu nu tu kunnatun gapa i pazziga-riga na ngamin nga wawwagi nu ta angngurug ta interu mundo.” (1 Ped. 5:9) Matudduan ittam ta ekspiriensa na “nakapagattam ira” nu kunnasi nga makapammakatalo, pasikannanna ittam nga maarubang tu mapia i problema, anna iperaddamna nga mabendisionan i pammakatalo tam. (Sant. 5:11) Innattam i karuan nga ehemplo.^[1]

12. Anni i magigiammu tam ta ehemplo na kerubin ira nga nepuestu ta Eden?

¹² Kerubin ira. Tudduan ittam na ehemplo na ollu nga naparatu nga espiritu ira nga nemammatan na tolay, nga magattam maski ta mariga nga annungan. “Pinappuestu [ni Jehova] i kerubin ira ta zigattu na hardin na Eden anna i umafa-afi nga taram na espada nga awan tu immanna nga malliligo onu mabbara-bariling tapenu magguardia ta dalan mappange ta kayu na inango.”^[2] (Gen. 3:24) Siguradu nga ari naparatu i kerubin ira para tatun nga annungan! Ari gamma nga parte na gakkag ni Jehova para ta totolay i tagaruli anna rebelyon. Ngem ari nga narreklamo i kerubin ira—espiritu nga naparatu nga atannang i ranggoda. Ariadda nolang onu natupa. Matulu nga nattalupaddian ira ta annungadda anna nagatta-attam adde ta nabalin i trabahuda—awayyana nga ta tiempo na Delubio, kabalin na 1,600 dagun!

13. Kunnasi nga naattamman ni Job i kapuruebana?

¹³ I patriarka nga si Job. Nu natakitakka ta kinagi na kofummu onu kafamiliam, egga grabe nga takimu, onu narraddam ka ta patay na ideddukammu, mabanna-bannayakka ta ehemplo ni Job. (Job 1:18, 19; 2:7, 9; 19:1-3) Maski ari na ammu i naggafuan na problemana ira, ari nakkafi i nonona. Ngatta? Megafu ta “maganassing [yaya] ta Dios.” (Job 1:1) Determinadu si Job nga mapagayaya si Jehova ta makasta anna ta mariga nga situasion. Ta uffun na Dios, ninonono ni Job i makapabbaw ira nga kingngua ni Jehova gukaban na masanto nga espirituna. Mas nakkomfiansa si Job nga pangultimuan ni Jehova i problemana ira ta mepangngo nga tiempo. (Job 42:1, 2) Talaga kunnatun i nesimmu. “Inalsa ni Jehova i pazziga-rigana anna nitolina i kinarikuna. Zinoble ni Jehova i dati nga egga sa.” Napeggan si Job tu “apaddu anna malanna-lanno nga pattolay.”—Job 42:10, 17.

14. Segun ta 2 Corinto 1:6, kunnasi nakoffun ta tanakuan i pagatta-attam ni Pablo?

¹⁴ I apostol nga si Pablo. Mepa-arubang ka kari ta pangokkontra, kapeppersigi, anna ta kalaban ira na kurug nga paddayarayaw? Elder ka kari onu manangngal ta sirkito nga madammakkan ta karu na responsibilidadmu ira? Panonotammu i ehemplo ni Pablo. Nepa-arubang yaya ta nadduruma nga kapeppersigi anna inaggaw nga ari yaya makapagimammo ta pangikavurunna ta kongregasion ira. (2 Cor. 11:23-29) Ngem ari yaya nagimmang, anna nakapagaram ta tanakuan i ehemplona. (Bibbigan i 2 Corinto 1:6.) Nu makapagattam ka ta kapurueba, nonopammu nga awayyana nga makapagaram gapa i ehemplom ta tanakuan.

MAKAPAGATTAM KA KARI “ADDE TA PANGURIANAN”?

15, 16. (a) Ngatta “magatta-attam kamu adde ta pangurianan”? (b) Mangiyawa tu angngarigan nu kunnasi makapagattam “adde ta pangurianan.”

¹⁵ Gukaban na masanto nga espiritu na Dios, nitura ni Santiago: “Magatta-attam kamu adde ta pangurianan.” Ngatta mawag nga “adde ta pangurianan”? “Tapenu mammanakam kamu ta angngurug nu anna awan vuluvuga tu pakkurangan nu.” (Sant. 1:4) Palawanan na problema i pakkafiattam, aspeto na personalidad tam nga mawag tam ulian. Nu maattammattam yatun ira nga problema, awan vuluvuga tu pakkurangan na Cristiano nga personalidad tam. Angngariganna, mabbalittam tu mas pasensioso, minangngappresia, anna minaggallallo.

¹⁶ Megafu ta importante i pagatta-attam ta pammolde ta personalidad tam nga Cristiano, ari tam nakuan nga ikompromiso i prinsipio ira na Biblia tapenu mangultimo i kapurueba tam. Angngariganna, marigatakka kari nga labanan i madaping ira nga pannonono? Imbes nga mappatenta, ipakimallomu nga melilli ka tatun. Nu kunnatun, mas nga makontrolmu i baggim. Kokkontrannaka kari na ari Saksi nga kafamiliam? Imbes nga mappa-influwensia, determinadu ka nakuan nga mapattalupaddian i napafutuan nga paddayarayaw. Mas malladda i pammakatalomu kani Jehova nu kunnatun i kuammu. Daddammammu: Mawag nga magattam, tapenu faboran ittam na Dios.—Roma 5:3-5; Sant. 1:12.

17, 18. (a) Iyilustra i importansia na pagatta-attam adde ta pangurianan. (b) Anni i masiguradu tam durante nga umara-aranni tam ta panuppalan?

¹⁷ Mawag tam i magattam, ari ta ababba nga tiempo, ngem adde ta pangurianan. Tapenu meyilustra: Nonopammu i tadday nga bapor nga lummag. Tapenu ari malaggabbang i pasaheru, mawag nga mattanniaw onu mattafug adde ta pipì. Malaggabbang i pasaheru nga insigida nagimmang mattafug. Malaggabbang gapa i ollu nga nattanniaw nu nagimmang yaya turi ta aranni ngana ta pipì. Yatutta, determinadu ittam nga magattam adde ta makadde ittam ta napabagu nga mundo. Nakadepende i inango tam ta pagatta-attam tam. Parigattam nakuan si apostol Pablo nga nakkagi: “Ari vuluvuga nga makkafi i nono ku.”—2 Cor. 4:1, 16.

¹⁸ Makasiguradu ittam nga uffunan ittam ni Jehova nga magattam adde ta pangurianan. Kumbinsidu ittam kagitta na kinagi ni Pablo ta Roma 8:37-39: “Ta siguradu ngà tu awan tu makawayya nga mangigungay nittam ta aya na: maski paga i patay onu katolay, maski i anghel ira onu karuan paga nga pammaguray onu pakapangngua nga egga ta langi, maski paga i maddaggun onu i mappange ira nga mesimmu; maski paga i egga ta utun onu gukag na davvun, onu maski paga anni nga naparatu. Awan vuluvuga tu makawayya nga mangigungay nittam ta aya na Dios nga neyawa nittam gafu kani Cristo Jesus nga Yafu tam!” Kurug, egga i tiempo nga mabannag ittam. Ngem makapagattam nakuan ittam adde ta pangurianan, tapenu megitta ittam kada Gideon anna totolena nga “ariadda niyemmang i panaddagda.”—Uk. 8:4.