Parigan i Pagatta-attam ni Jehova

1-2. Ngatta mapasikan i nono tam ta kinagi ni Jehova ta Isaias 65:16, 17?

“PASIKANNAMMU I NONO MU!” i makapagaram nga tema na 2017 nga rehional kombension. Nammuattam tatun nu kunnasi tam attamman i kapurueba ira nga duttal nittam. Nappasa ngana i appa nga ragun, ngem adde sangawe, attattammattam lagapa i pattolay taw nga marake nga mundo.

² Anni ira i problemam sangawe? Natayakka kari tu kafamilia onu meddu nga kofun? Egga kari i kappatay nga taki mu? Marigatakka kari megafu ta mallakay onu mabbako ka ngana? Biktima ka kari na kalamidad, kinavayolente, onu pameppersigi? Onu marigatakka kari megafu ta COVID-19 pandemic onu karuan paga nga kagitta natun? Talaga iinnaggattam i tiempo sonu mappasa ngana ngamin danaw nga problema. Sonu makattamattam ngana ngamin danaw anna ari ngana vuluvuga mesimmu uli!—Bibbigan i Isaias 65:16, 17.

3. Anni i mawag nga kuattam sangawe, anna ngatta?

³ Mariga i pattolay sangawe anna mas marriga paga yatun ta mappange. (Mat. 24:21) Yayya nga mawag tu gigiammuattam nu kunnasi ittam nga makapagattam. Ngatta? Megafu ta kunnaw i kinagi ni Jesus: “Ta pagatta-attam nu, mala nu i inango nga adde ta ngangangay.” (Luc. 21:19) Mas nga makapagattam ittam nu nonopattam nga naattamman na tanakuan i problema da ira nga kaparehu ta nittam.

4. Ngatta makagi tam nga si Jehova i kakastan nga ehemplo na pagatta-attam?

⁴ Sinni i kakastan nga ehemplo na pagatta-attam? Si Jehova nga Dios. Baka nakaddagakka tatun. Ngem nu nonopammu tu mapia yatun, malippawa mu nu ngatta. Kontroladu na Diablo i interu mundo. Yayya nga napappannu yaw tu problema. Mawayya ni Jehova nga pangultimuan ngamin danatun insigida. Ngem magigginnag yayya ta sinunno na nga tiempo sonu kuan yatun. (Roma 9:22) Attattamman labbi na Dios yatun adde sonu duttal i sinunno na nga tiempo. Ammuattam ngana i siam nga attattamman ni Jehova.

ANNI IRA I ATTATTAMMAN NI JEHOVA?

5. Kunnasi nga napara-parake i ngagan na Dios, anna anni i matageno mu tatun?

⁵ I pamara-parake ta ngagan na. Tagibaloran ni Jehova i ngagan na anna kakayà na nga irespeto na ngamin yatun. (Isa. 42:8) Ngem maturu tu 6,000 ngana nga dagun nga mapara-parake yatun nga makasta nga ngagan na. (Sal. 74:10, 18, 23) Namegafu yatun ta hardin na Eden gari turi ta inakusan na Diablo (kayà na kagian “Mamara-parake”) i Dios nga iyeyetu na kada Adan anni Eva i tadday nga gannug nga kawagadda tapenu mabbalin tu magayayya. (Gen. 3:1-5) Namegafu tatun nga tiempo, naakusan ngana si Jehova nga iyeyetu na ta totolay i talaga kawagadda. Mavurung si Jesus tatun nga pamara-parake ta ngagan na Yama na. Megafu tatun, sinudduan na i disipulos na nga ipakimallo yaw: “Ama mi nga egga ta langi, marayaw paray i ngagam-mu.”​—Mat. 6:9.

6. Ngatta pinappasa ni Jehova i apaddu nga tiempo nige nga mapakurug nga yayya i egga i kepangngattan na nga mammaguray?

⁶ Pangokkontra ta pammagurena. Si Jehova laman i egga i kepangngattan na nga mammaguray ta langi anna ta davvun anna i pammagurena i kapianan. (Nep. 4:11) Ngem nilogo na Diablo i anghel ira anna i totolay tapenu nonopadda nga awan tu kunnatun nga kepangngattan na Dios. Mawag labbi nga mappasa i tiempo nige nga mapakurug nga egga i kepangngattan ni Jehova nga mammaguray anna yayya i kapianan nga mammaguray. Masirib i Dios ta nipamavulun na nga imagurayan na totolay tu apaddu nga tiempo i baggi da lagapa tapenu masingadda nga ari tu makasta i pattuppaladda nu awan tu uffun na Namaratu. (Jer. 10:23) Megafu ta minappasensia i Dios, awan ngana noka tu madduda nga yayya i egga i kepangngattan na nga mammaguray ta langi anna ta davvun. Mammuan gapa na ngamin nga i pammaguray ni Jehova i kapianan anna i Pappatulan na laman i makeyawa tu kurug nga imammo anna seguridad ta davvun.

7. Sinni ira i narrebelde kani Jehova, anna anni noka i kuan na nira?

⁷ I parrebelde na karuan ta ána na. Pinaratu ni Jehova i ána na nga anghel anna totolay nga perfekto. Ngem narrebelde i anghel nga ana na nga si Satanas (kayà na kagian “Kumokkontra”) anna kinumbinsi na gapa i perfekto nga totolay nga da Adan anni Eva nga marrebelde gapa kani Jehova. Tapus narrebelde gapa i karuan nga anghel anna totolay. (Jud. 6) Turi kua, maski paga lagu danuri miembro na nasion na Israel, i pinili na Dios nga totolena ay pinanakitadda yayya anna naddayaw ira ta falsu ira nga Dios. (Isa. 63:8, 10) Natageno ni Jehova nga trinaydor da yayya. Ngem magattattam yayya adde sonu duttal i tiempo nga daralan na i ngamin nga rebelde. Magayayya noka si Jehova anna danuri matalo nisa nga ariadda ngana kawagan nga attamman i kinadake taw nga mundo!

8-9. Anni ira nga kinaladdug i nekagi meyannung kani Jehova, anna anni i kuattam?

⁸ I kinaladdug ira na Diablo. Inakusan ni Satanas si Job anna i ngamin nga matalo nga aripan ni Jehova nga massesserbi laman ira megafu ta bentaha nga mala da nisa. (Job 1:8-11; 2:3-5) Adde sangawe, aka-akusan lagapa na Diablo i totolay. (Nep. 12:10) Mapakurug tam nga laddug si Satanas nu attammattam i problema tam ira anna mattalupaddian ittam nga matalo kani Jehova megafu ta ayatattam yayya. Kagitta ni Job, bendisionan ittam ni Jehova nu magatta-attam ittam.​—Sant. 5:11.

⁹ Usu-usan ni Satanas i lider ira na falsu nga relihion tapenu ikagi nga awan tu allo ni Jehova anna yayya i makalliwa ta pazziga-riga na totolay. Kagian paga lagu na karuan nga nu matay i abbarabbing, ina ira na Dios megafu ta kawagan na paga i mas aru nga anghel ta langi. Talaga kawan tu respeto yatun ta Dios! Ngem ammu tam nga minaggiddu nga Yama si Jehova. Yayya nga nu egga i grabe nga taki tam onu natayan ittam, ariattam vuluvuga nga paliwatan i Dios. Mangurug ittam nga egga noka i tiempo nga pammapian na i mataki anna paginnolayan na i natay. Puede tam nga ikagi turi ira ta maya magginna nga talaga minaggiddu nga Dios si Jehova. Nu kuattam yatun, matabbag na i tadday nga manutturia nisa.​—Prov. 27:11.

10. Anni i magigiammu tam ta Salmo 22:23, 24 meyannung kani Jehova?

¹⁰ I pazziga-riga na iddeddu na ira nga aripan. Minangngikallo nga Dios si Jehova. Manaki na nga maddaging ittam megafu ta ziga-riga nga attattammattam kagitta na kadara-darum, taki, onu kina-imperfekto tam ira. (Bibbigan i Salmo 22:23, 24.) Matageno ni Jehova i taki nga mataga-tageno tam. Kayà na nga pagimmangan yatun, anna talaga kuan na yatun. (Ikumpara i Exodo 3:7, 8; Isaias 63:9.) Duttal noka i tiempo sonu “funatan na ngamin i lulua [tam] nga manuru, anna awan ngana noka tu matay, onu maraddam, onu tumangi-tangi, onu magattam ta taki.”​—Nep. 21:4.

11. Anni i kanappan ni Jehova ta matalo ira nga aripan na nga natay?

¹¹ Arian na nga masingan i kokkofun na ira nga natay. Anni i matageno ni Jehova ta matalo nga lallaki anna babbay nga natay ngana? Kakanappan na nga masingan uli ira. (Job 14:15) Talaga kakanappan ngana ni Jehova nga masingan uli i kofun na nga si Abraham! (Sant. 2:23) Kakanappan na ngana gapa nga makibbida uli si Moises nga naka-uvovug na “ta arubanna mismu.” (Ex. 33:11) Fermi ngana gapa nga iinnaggan na i tiempo sonu maginna na uli si David anna i karuan paga nga salmista nga kansionan i makakkasta ira nga kansion na paddayoda! (Sal. 104:33) Maski nu natay ngana danaw nga kokkofun ni Jehova, arian na vuluvuga ira nga nakattaman. (Isa. 49:15) Manono na paga i ngamin nga detalye na personalidad da. Kagian na Biblia nga “ngamin ay matolay ta pagimamma na Dios.” (Luc. 20:38) Duttal noka i tiempo sonu paginnolayan na uli ira, anna maginna na uli i napafutuan nga pakimallo da anna alawatan na noka i paddayoda. Nu natayakka, paray nakuan tu makapabannay danatun nikaw.

12. Anni i mas nga mamataki kani Jehova taw nga pangurianan nga aggaggaw?

¹² I pamerwisiu na marake nga totolay. Tagga ta namegafu i parrebelde ta Eden, ammu ni Jehova nga mas marrake paga i paddia-paddian nige nga makkasta danatun. Ikalussaw ni Jehova i kinarake, kawan tu hustisia, anna kinavayolente ta mundo tam sangawe. Namegafu tagga, ikavurungan na danuri kakkabbi, kasali ngana danuri makafi, anna danuri ariadda maprotektan i baggi da, kagitta na awan tu yama da ira, anna balu ira. (Zac. 7:9, 10) Mas ngana nga matakitan si Jehova nu masingan na nga mapara-parigatan i matalo ira nga aripan na anna mefuku ira. Sikamu ngamin nga magatta-attam kagitta ni Jehova, mepasiguradu nikamu nga iddukan nakamu ngamin.

13. Anni ira nga kappasiran nga annangngua i masingi-singan na Dios ta totolay, anna anni noka i kuan na tatun?

¹³ I sisinu nga pabbalin na totolay tu imoral. Kakayà ni Satanas nga mabbalin tu imoral i totolay nga naparatu ta imahe na Dios. Turi ta “nasingan ni Jehova nga fermi i dake na totolay” ta kaggawan ni Noe, ‘pinabbabawyan na nga kingngua na i totolay ta davvun, anna natakitan i futu na.’ (Gen. 6:5, 6, 11) Nakkasta ngana kari i paddia-paddian namegafu tatun nga tiempo? Siempre ari! Talaga magayayya i Diablo nga nakkewara ngana i ngamin nga klase na seksual na imoralidad. Nelagum tatun i imoral nga annangngua na lallaki anna babbay, kunne na gapa na parefu nga lalaki anna parefu nga babay! (Efe. 4:18, 19) Mas nga magayayya si Satanas nu mataga ta madammo nga liwa danuri maddayaw kani Jehova. Egga i pagaddetan na pappasa-pasensia ni Jehova. Tatun nga tiempo, ipasingan na noka nga ikalussona i imoral nga annangngua gukaban na panaral ta ngamin nga imoral nga totolay nga manaki da i manguli.

14. Anni i kukukuan na tolay ta pinaratu ira na Dios?

¹⁴ I panara-daral na totolay ta pinaratu. Ari laman nga “immagurayan na tolay i kasittolena ta pakaperwisiuwan na.” Dara-daralan na gapa i davvun anna i aya-ayam nga nitalo ni Jehova nisa. (Ecl. 8:9; Gen. 1:28) Kagian na karuan nga sientista nga megafu ta annangngua na totolay, awayya na tu 1,000,000 nga speciesb i mabbalin tu extinct ta tumunug ira nga dagun. Matindiattam gafu nu ngatta mavuru-vurung i totolay meyannung ta pallevu! Mapia ngana laman ta nipromesa ni Jehova nga ‘daralan na noka i totolay nga namarattal toye ta utun na davvun ta panara-daral’ anna pabbalinan na noka tu paraiso i interu nga planeta.​—Nep. 11:18; Isa. 35:1.

I MAGIGIAMMU TAM TA PAGATTA-ATTAM NI JEHOVA

15-16. Anni i mamaguyu nittam nga magatta-attam, kagitta ni Jehova? Mangusa tu angngarigan.

¹⁵ Nonopan i ngamin nga kaddaraddam nga problema nga attattamman na nelangitan nga Yama tam. (Innan i kahon nga “I Attattamman ira ni Jehova.”) Mawayya ni Jehova nga pangultimuan yaw nga marake nga mundo ta maski anni nga oras nga kayà na. Ngem talaga nakoffun nittam i appasa-pasensia na. Ngem awayya na tu kunnaw i nonopattam: Nekagi ta tadday nga magatawa nga aru i pisikal nga defekto na beybi da anna sonu meyana yatun, marigatan nga mattolay anna mabi nga matay. Ngem magayayya lapa yaw nga magana turi ta neyana i ana da maski nu marigatan ira ta panangngal nisa. Megafu ta iddukadda i ana da, attammadda i maski anni nga ziga tapenu meyawa ta abbing i kakastan nga pattolay.

¹⁶ Imperfekto gapa i ngamin nga gaka da Adan anna Eva turi ta neyana ira. Ngem iddukan ira ni Jehova anna tattangngallan na ira. (1 Juan 4:19) Ngem ari tu kagitta na magana ta ilustrasion, egga i makua ni Jehova tapenu moffunan ira. Egga ngana i tiempo nga pinili na sonu pangultimuan na i ngamin nga ziga-riga na totolay. (Mat. 24:36) Ari kari nga yatun nakuan nga aya ni Jehova i mamaguyu nittam nga parigan i pagatta-attam na adde ta kawagan yatun?

17. Ngatta mapagaram ittam nga tulu-tuloy nga magattam ta nakagi meyannung kani Jesus ta Hebreo 12:2, 3?

¹⁷ Si Jehova i perfekto nga ehemplo na pagatta-attam. Naparigan ni Jesus yatun. Ta kegga ni Jesus taw ta davvun, inattamman na i mataki nga kinaga-kagi da nisa, pangipepasiradda nisa, anna i i pangipato da nisa ta estaka megafu nittam. (Bibbigan i Hebreo 12:2, 3, NW.) Siguradu nga napasikan si Jesus nga magatta-attam megafu ta ehemplo ni Jehova. Mapasikan ittam gapa natun.

18. Kunnasi nga makoffun i 2 Pedro 3:9 tapenu malippawa tam i resulta na pappasa-pasensia ni Jehova?

¹⁸ Bibbigan i 2 Pedro 3:9. Ammu ni Jehova i kakastan nga tiempo tapenu pangultimuan yaw nga marake nga mundo. Megafu ta mapasensia yayya, aru nga totolay i nakannammu paga nisa, tapus minillion ngana sangawe i maddayaw ta nisa. Magayayya ira ngamin ta nagatta-attam si Jehova. Megafu tatun, neyana paga ira, nagigiammu da nga ayatan yayya, anna idedika i baggi da nisa. Sonu minillion nga totolay i makapagattam adde ta panuppalan, mapakurug noka nga fustu i desision ni Jehova nga magatta-attam!

19. Anni i determinadu nga kuattam, anna anni noka i bala-balo tam?

¹⁹ Nakagigiammu ittam kani Jehova nu kunnasi i magatta-attam nga sigga-pagayayya. Maski nu anni i daddam anna ziga-riga nga pinalattuag ni Satanas, nattalupaddian nga “magayayya nga Dios” si Jehova. (1 Tim. 1:11, NW ) Makapattalupaddian ittam gapa nga magayayya nu mapasensia nga innaggattam si Jehova sonu pakasantowan na i ngagan na, pakurugan na nga yayya laman i mepangngo nga mammaguray, anna pangultimuan na i ngamin nga kinadake anna i problema tam ira. Determinadu ittam nakuan gafu nga magatta-attam. Mabanna-bannayan ittam nakuan ta magatta-attam gapa i nelangitan nga Yama tam. Nu kuattam yatun, maekspiriensa na kada tadday nittam yaw: “Mapalag [onu, magayayya] i tolay nga mapasensia nga magattam ta anni laman nga pazziga-riga. Ta nu meyattam na danaw, mala na i inango nga nitabba na Dios nga korona na mangaya ira sa.”​—Sant. 1:12.