Duffunan Naka ni Jehova nga Magattam

1. Ngatta kawagattam i pagattattam, anna sinni i makaduffun nittam? (1 Pedro 5:10)

TALAGA mariga i mattolay taw nga pangurianan nga aggaw yari ta kakawagan na totolay ni Jehova i pagattattam. Angngarigan na, egga ira i nabayag ngana nga mataki. Natayan gapa i karuan anna egga gapa ira i peppersigian na kafamilia da onu na gobiernu. (Mat. 10:​18, 36, 37) Maski anni paga tatun nga problema i mamazziga niko, siguradu nga duffunan naka ni Jehova nga magattam.—Bibbigan i 1 Pedro 5:10.

2. Ngatta makapagattam ittam?

² Kunnasi tam mepasingan nga magattattam ittam? Nu mattalupaddian ittam nga matalo kani Jehova anna magayayya ittam nga masserbi nisa maski nu aru i problema, pameppersigi, onu tentasion. Mawag gapa nga mangurug ittam nga mappipia lapa saw i situasion. Makapagattam ittam laman megafu ta iddan ittam ni Jehova tu “ari nga maguku-gukug nga pakapangngua.” (2 Cor. 4:7) Ariattam makua yatun nu awan tu uffun na. Taw nga artikulo, pabbiridattam i appa nga niyawa ni Jehova nga manguffun nittam nga magattam. Pabbiridattam gapa nu kunnasi ittam mabenefisiowan tatun nga niyawa na.

PAKIMALLO

3. Ngatta makagi tam nga milagro i pakimallo?

³ I tadday nga makoffun nittam ay pakimallo. Awayya tam i makibbida kani Jehova maski nu kanayun ittam nga makaliwa. (Heb. 4:16) Milagro i pakimallo. Ngatta? Nonopan yaw: Awayya tam nga ipakimallo kani Jehova i maski anni nga gannug ta maski anni nga oras. Malippawa gapa ittam ni Jehova maski anni paga i lengguahe tam, maski sitaw i diattam, onu maski paga nefuku ittam. (Jon. 2:​1, 2; King. 16:​25, 26) Maski gapa nu sobra i vurung tam onu ariattam ngana ammu nu anni i ikagi tam, malippawa lapa ni Jehova i matageno tam anna i ikaya tam nga ikagi nisa. (Roma 8:​26, 27) Talaga milagro i pakimallo!

4. Ngatta makagi tam nga uray ni Jehova nga ipakimallo tam nga makapagattam ittam?

⁴ Ta Biblia, ipasiguradu ni Jehova nittam nga ginnan na ittam “ta anni laman nga kiddawat-tam sa nga metuttul ta uray na.” (1 Juan 5:14) Yari ta awayya tam kari ikiddaw kani Jehova nga makapagattam ittam? Wan! Uray na gare yatun. Ngatta makagi tam nga uray na yatun? Nu maattammattam gare i problema ira, matabbag ni Jehova i panginsulto ni Satanas nga Diablo. (Prov. 27:11) Fuera paga tatun, kagian na Biblia nga kakayà ni Jehova nga “ipasingan i sikan na para ta buu i futu da nga masserbi sa.” (2 Cro. 16:9) Makasiguradu ittam gafu nga iddan ittam ni Jehova tu sikan nga magattam anna kakayà na nga kuan yatun.—Isa. 30:18; 41:10; Luc. 11:13.

5. Kunnasi ittam mapeggan tu imammo na nono nu makimallo ittam? (Isaias 26:3)

⁵ Kagian na Biblia nga nu ipakimallo tam kani Jehova i problema tam ira, ‘iyawa na nittam i imammo na nga ari malippawa na tolay anna yatun i manangngal ta nono anna giffutuattam.’ (Fil. 4:7) Talaga ipappabalo tam yatun. Ngem kunnasi gapa danuri ari masserbi kani Jehova? Makkaproblema gapa ira yari tu madduruma i puruebadda tapenu malsa i pakavurungadda anna mabbalin tu memammo i nono da. Ngem tatun ira nga kukukuadda, ariadda ngana nga makontrol i nono da. Gafu tatun, mas mabi laman nga matallung onu mainfluwensian na demonio i nono da. (Ikumpara i Mateo 12:​43-45.) Mas makasta i imammo nga iyawa ni Jehova nittam anne ta imammo nga mala da tatun nga kukukuadda. Nu makimallo ittam gare kani Jehova, mepasingattam nga mattalo ittam nisa anna iyawa na nittam i “tulu-tuloy nga imammo.” (Bibbigan i Isaias 26:3.) Kunnasi na nga kuan yatun? Ipanono na nittam i teksto ira nga mamanna-bannay nittam. Makoffun danatun nga teksto tapenu memammo i nono anna i panageno tam. Ipasiguradu gare natun nga ikavurungan ittam ni Jehova anna ikaya na ittam uffunan.—Sal. 62:​1, 2.

6. Anni ira i awayyam ilavu ta pakimallo mu? (Innan gapa i letratu.)

⁶ I awayyam kuan. Nu egga i problemam, “ipammakatalo mu” kani Jehova i vuru-vurummu anna ikiddom nisa i imammo na. (Sal. 55:22) Ikiddom gapa nisa i sirib nga kawagammu tapenu ammum i kuammu tatun nga problemam. (Prov. 2:​10, 11) Ariammu gapa kattaman nga mappabalo kani Jehova ta pakimallo mu. (Fil. 4:6) Nonopammu i kukukuan ira ni Jehova tapenu duffunan naka nga maattamman i problemam ta kada aggaw. Nonopammu i bendision ira nga niyawa ngana niko ni Jehova.—Sal. 16:​5, 6.

BIBLIA

7. Kunnasi ittam makapagattam nu gigiammuattam i Biblia?

⁷ Niyawa nittam ni Jehova i Biblia tapenu moffunan ittam nga magattam. Aru nga teksto i mangipasiguradu nittam nga duffunan ittam ni Jehova. Angngarigan na, kinagi na Mateo 6:8: “Ammu gammabba ngana na Yama nu i mawag nu nage nu nga kiddawan.” Si Jesus mismu i nakkagi tatun anna ammammu na tu mapia si Jehova. Makasiguradu ittam gafu nga nu egga i problema tam, ammu ni Jehova i kawagattam anna siguradu nga uffunan na ittam. Aru gapa i mabibbig tam ta Biblia nga mamasikan nittam nga attamman i problema ira.—Sal. 94:19.

8. (a) Mangiyawa tu angngarigan na prinsipio na Biblia nga makaduffun nittam tapenu makapagattam. (b) Anni i kuattam tapenu mas mabi tam nga manono i prinsipio na Biblia nu kawagattam ngana yatun?

⁸ Makaduffun i prinsipio ira na Biblia tapenu magattam ittam. Megafu tatun, makangngua ittam tu makasta ira nga desision. (Prov. 2:​6, 7) Angngarigan na, kagian na Biblia nga ari tam labbi nonopan nu anni i mesimmu ta mappange. Mattalo ittam lallagu kani Jehova kada aggaw. (Mat. 6:34) Nu kanayuttam nga bibbigan i Biblia kada aggaw anna pannonopattam yatun, mas mabi tam nga manono i prinsipio na Biblia nu kawagattam ngana yatun.

9. Kunnasi makoffun i istoria ira ta Biblia tapenu mas mattalo ittam kani Jehova?

⁹ Mabibbig tam ta Biblia i kurug nga istoria na totolay nga nattalo kani Jehova anna nakalawa tu uffun na. (Heb. 11:​32-34; Sant. 5:17) Nu nonopattam i pinanguffun nira ni Jehova, mattalo ittam nga si Jehova “i mangiyegu anna mamasikan nittam, ta tiempo na gulu ay minangnguffun nga sigga-paran.” (Sal. 46:1) Nu nonopattam gapa nu kunnasi nga nipasingan na aripan ira ni Jehova i pattalo da nisa anna ari ira nagimmang nga masserbi maski nu mariga i situasiodda, mapaguyu ittam nga parigan ira.—Sant. 5:​10, 11.

10. Kunnasi ittam mas mabenefisiowan ta Biblia?

¹⁰ I awayyam kuan. Bibbigammu i Biblia anna ilistam i teksto ira nga makoffun niko. Bibbigan na karuan i daily text nu umma tapenu egga i makapagaram nga nononopadda ta interu aggaw. Kunnatun i nakoffun kani Marie.a Parehu nga egga i cancer na magana na anna yayya i nanangngaw nira adde ta pateda. Anni i nakaduffun kani Marie tapenu maattamman yatun? Kagian na: “Kada umma, bibbigakku i daily text anna pannonopakku yatun. Nakoffun yatun tapenu kanayukku nonopan si Jehova anna i makasta ira nga promesa na anne tu agga-nono ku i problemà ira.”—Sal. 61:2.

I WAWWARAGI TAM

11. Ngatta massikan i nono tam nu mammuattam nga nakapagattam gapa i wawwaragi tam?

¹¹ Usu-usan ni Jehova i wawwaragi tam ta interu mundo tapenu uffunan ittam nga magattam. Nu makkaproblema ittam, ammu tam nga ari ittam nga magitadday megafu ta ‘kunnatun gapa i pazziga-riga na ngamin nga wawwagi tam ta angngurug.’ (1 Ped. 5:9) Anni i meyuffun natun? Ipasiguradu natun nga maski nu anni nga problema i arubangattam, naekspiriensa ngana yatun na wawwaragi tam anna naattammadda yatun. Ipasingan natun nga mawayya tam gapa i magattam!—King. 14:22.

12. Kunnasi ittam uffunan na wawwaragi tam, anna anni i meyuffuttam nira? (2 Corinto 1:​3, 4)

¹² Makoffun i kukukuan anna kakkagian na wawwaragi tam tapenu makapagattam ittam. Napakurug yatun ni apostol Pablo. Nefuku bi gare yayya ta balena ngem pinasikan yayya na wawwaragi anna niyawa da i kawagan na ira. Yari ta kuruga nappabalo si Pablo nira anna nilavu na paga lagu i ngagadda ta tura na. (Fil. 2:​25, 29, 30; Col. 4:​10, 11) Pasikannan anna uffunan ittam gapa na wawwaragi tam nu egga i problema tam. Kunnatun gapa i kuattam nu problemadu ira.—Bibbigan i 2 Corinto 1:​3, 4.

13. Anni i nakoffun kani Sister Maya nga makapagattam?

¹³ Talaga dakal nga uffun i wawwaragi kani Sister Maya nga taga-Russia. Turi gare ta 2020, lanna nga sinallung na pulis i baleda. Fuera tatun, mawag na paga i umarubang ta korte megafu ta pallayyagayya na. Kinagi ni Sister Maya: “Tatun nga tiempo, talaga problemadu ngà. Ngem tinawagan nà na wawwaragi anna sinurakkaddà. Nipasiguradu da nio nga talaga iddeddu dà.” Kinagi paga ni Maya: “Ammù mabba tu iddeddu nà na wawwaragi anna gitta na familia i paningadda nio. Ngem tatun nga tiempo, talaga nakumbinsi ngà nga kurug yatun.”

14. Anni i kuattam tapenu mabenefisiowan ittam ta panguffun na wawwaragi? (Innan gapa i letratu.)

¹⁴ I awayyam kuan. Nu problemadu ka, ariammu arayyuan i wawwaragi. Makibbida ka nira. Ariammu gapa mappasirang nga mappoffun ta elder ira. Kagitta da gare i ‘palliruman nu mapaddag anna tadday nga pakiyegutan nu mabbagiu.’ (Isa. 32:​2, ftn.) Nonopammu gapa nga aru i problema na wawwaragi. Yatutta nu uffunammu i makawag, mabbalikka tu magayayya anna mas maattammammu i problemam ira.—King. 20:35.

I IDDANAMA TAM

15. Kunnasi nakoffun kani Jesus i iddanama na, anna kunnasi gapa makoffun nittam i iddanama tam? (Hebreo 12:2)

¹⁵ Makoffun i iddanama nga niyawa ni Jehova tapenu makapagattam ittam. (Roma 15:13) Maski gapa si Jesus, nakapagattam yayya ta aggaw na patena megafu ta iddanama na. (Bibbigan i Hebreo 12:2.) Ammu ni Jesus nga nu mattalupaddian yayya nga matalo, mapakurug na nga laddug i ngamin nga kinagi ni Satanas meyannung kani Jehova. Mapakurug na gapa nga mepangngo laman nga medayaw i ngagan ni Jehova. Iddanaman gapa ni Jesus nga makavulu na uli i Yama na anna makipammaguray yayya kavulu i 144,000 nga wawwaragi na. Makoffun gapa i iddanama tam nga mattolay tu mannanayun ta Paraiso tapenu maattammattam i maski anni nga problema taw ta mundo ni Satanas.

16. Kunnasi nakoffun ta tadday nga sister i iddanama na, anna anni i magigiammu tam ta kinagi na?

¹⁶ Nakoffun kani Sister Anna nga taga-Russia i iddanama na. Nefuku gare i atawa na habang innaggadda i hearing na kaso na. Turi ta nesimmu yatun, kunnaw i kinagi ni Anna: “Kanayukku nga ipakimallo kani Jehova i meyannung ta iddanamà anna kanayukku yatun nonopan. Megafu tatun, ari nakkafi i nono ku. Siguradu nga mabalin lapa saw yaw nga problema. Affutan saw ni Jehova i kumokkontra ira anna bendisionan na ittam.”

17. Kunnasi tam mepasingan i pappabalo tam ta iddanama nga niyawa ni Jehova nittam? (Innan gapa i letratu.)

¹⁷ I awayyam kuan. Nonopammu i makakkasta nga iddanama nga niyawa nikaw ni Jehova. Imajinammu i baggim sonu egga ka ngana ta Paraiso kavulu i kokkofummu anna i kafamiliam tapus magayayya ngana sangaw ngamin. Nonopammu nga maski anni paga i problemam sangawe, “alappaw anna manganannuan laman” yatun kumpara ta pattolay tu mannanayun ta Paraiso. (2 Cor. 4:17) Kuammu gapa i mawayyam tapenu mekagim ta tanakuan i meyannung tatun nga iddanamam. Nonopammu nga kitezziga i pattolay danuri na ari masserbi kani Jehova. Kakkaru i problema da ngem ari da ammu i meyannung ta promesa ni Jehova. Maski baddi laman i ikagim nira, baka maginteres ira tatun.

18. Ngatta makasiguradu ittam nga mesimmu i promesa ira ni Jehova?

¹⁸ Naattamman ni Job i problema na ira yari ta nakagi na kani Jehova: “Nammuakku ngana nga makuam i ngamin nga ganna-gannug anna awan tu manono mu nga kuan nga imposible para nikaw.” (Job 42:2) Nalippawa ni Job nga makua ni Jehova i maski anni nga nipromesa na. Mapasikan ittam gapa tatun. Nonopan yaw: Egga i tadday nga babay nga problemadu. Aru ngana gare nga doktor i nangngayan na ngem ariadda yayya mapammapia. Ngem egga i tadday nga malalaki nga doktor nga nakkagi nu anni i taki na anna nangiyesplika nu kunnasi yayya pammapian. Magayayya yatun nga babay maski nu ammu na nga mawag na labbi i maginnag nige na nga mammapia. Maski nu mataki paga yayya, magayayya lapa yayya megafu ta iddanaman na nga mammapia ngana saw yayya. Maski gapa aru i problema tam sangawe, magayayya ittam lapa megafu ta siguradu ittam nga mabbalin saw tu Paraiso i davvun.

19. Anni i mawag tu kuattam tapenu makapagattam ittam?

¹⁹ Nagigiammu tam nga uffunan ittam ni Jehova gukaban na pakimallo, Biblia, wawwaragi, anna iddanama tam. Nu kuattam i mawayya tam tapenu mabenefisiowan tatun, duffunan ittam ni Jehova nga maattamman i problema tam ira. Megafu tatun, tulu-tuloy ittam nga makapagattam adde sonu daralan ngana ni Jehova i mundo ni Satanas anna awan ngana saw tu maski anni nga problema.—Fil. 4:13.