‘Pammapian ni Jehova Danuri Natakitan i Futu Da’

1. Anni i matageno ni Jehova ta aripan na ira?

ANNI i masingi-singan ni Jehova ta aripan na ira taw ta davvun? Masingan na nu masaya ittam anna nu malungkut ittam. (Sal. 37:18) Nu masingan na nga kukukuattam i adde na mawayya tam nga passerbian yayya maski nu mataka-takitan ittam, magayayya yayya nittam. Ari laman tu yatun. Kakayà na ittam nga uffunan anna banna-bannayan.

2. Anni i kuan ni Jehova para ta natakitan i futu da, anna kunnasi ittam nga mammakapia ta panangngal na?

² Kagian na Salmo 147:3 nga ‘babbaggan ni Jehova i bigi-bigag’ danuri natakitan i futu da. Tatun nga teksto, nadeskriba si Jehova bilang meddu nga manangngal turi ira ta madaddammo i panageno da. Anni i mawag tu kuattam tapenu mammakapia ta panangngal ni Jehova? Innattam i tadday nga ilustrasion. Aru i meyuffun na malalaki nga doktor tapenu mammapia i tadday nga na-injure. Ngem tapenu mammapia yatun nga tolay, mawag tu tuttulan na tu mapia i kagian nisa na doktor. Taw nga artikulo, gigiammuattam i kagian ni Jehova ta Uvovug na para ta natakitan i futu da anna nu kunnasi tam nga iyaplika i meddu nga tabaranna.

IPASIGURADU NI JEHOVA NGA NABALOR ITTAM NISA

3. Ngatta matageno na karuan nga awan tu kwenta da?

³ Magaru nga totolay taw ta mundo ay awan tu pangaya da ta kasittoleda. Gafu tatun, aru i makatageno nga awan tu kwenta da. Kunnatun si Sister Helen.a Kagian na: “Napadakal ngà ta familia nga ari tu minaggiddu. Taka-takitan nakami na yamà anna kadaggaw nga ikagi na tu awan tu kwenta mi.” Baka kagitta ni Helen, marake i nikatratum, kanayuddaka insultowan, onu nepatageno niko nga awan tu kwentam. Nu kunnari, awayya na tu marigatakka nga kurugan nga egga i kurug nga mangikavurung niko.

4. Base ta Salmo 34:​18, anni i ipasiguradu ni Jehova ta nittam?

⁴ Maski paga nu marake i pattratu na tanakuan ta niko, makasiguradu ka nga iddeddu naka ni Jehova anna tagibaloran naka. ‘Aranni yayya turi ira ta natakitan i futu da.’ (Bibbigan i Salmo 34:​18, NW.) Nu ‘nakkafi i nono mu,’ daddammammu nga nasingan ni Jehova i mapia ira nga kualidad mu anna niyaranni naka nisa. (Juan 6:44) Kanayun yayya nga agga-paran nga manuffun megafu ta iddeddu naka.

5. Anni i magigiammu tam ta pattratu ni Jesus turi ira ta imemmelle na tanakuan?

⁵ Makagigiammu ittam ta matageno ni Jehova nu ikonsidera tam i kingngua ira ni Jesus. Ta kegga ni Jesus ta davvun, masissippo yayya ta totolay nga imemmelle na tanakuan anna nikallo na ira. (Mat. 9:​9-12) Egga bi i babay nga ari magimmang nga mappadaga. Ta aya na nga mammapia, sinukkal na i sinnun ni Jesus. Anni i kingngua ni Jesus? Binanna-bannayan na yayya anna kinomendan na yayya ta pangurug na. (Mar. 5:​25-34) Perfekto nga nipasingan ni Jesus i kualidad ira na Yama na. (Juan 14:9) Makasiguradu ka gafu nga nabalor ka kani Jehova anna masingan na i makasta ira nga kualidad mu, pati i pangurug anna aya mu nisa.

6. Anni i makuam nu matageno mu nga awan tu kwentam?

⁶ Anni i makuam nu kanayun nga matageno mu nga awan tu kwentam? Mabbibbig ka tu teksto ira ta Biblia nga mangipasiguradu ta niko nga nabalor ka kani Jehova anna pannonopammu danatun.b (Sal. 94:19) Ariammu ikumpara i baggim ta tanakuan anna ari mu nakuan agga-nono i ari mu ngana makua. Ari mabba ikiddaw niko ni Jehova i ariammu makua. (Sal. 103:​13, 14) Nu ta nappasa ay naabuso ka ta pisikal, emosional, onu seksual, ariammu paliwatan i baggim ta nesimmu. Ari tu siko i makalliwa tatun! Daddammammu nga panabbagan ni Jehova i nangabuso, ari tu i biktima. (1 Ped. 3:12) Kagian ni Sandra nga naabuso ta pisikal ta kabbinna, “Kanayukku nga kiddawan kani Jehova tu uffunan nà nga masingan i makasta ira nga kualidad nga masingi-singan na nio.”

7. Kunnasi nga makoffun ta passerbim kani Jehova i ekspiriensam ira?

⁷ Ariammu paddudan nga meyusa naka ni Jehova tapenu uffunan i tanakuan. Niddan naka tu pribilehio nga makipattrabahu ta nisa ta pallayyagayya. (1 Cor. 3:9) Megafu ta ekspiriensam ira, awayya na tu nabbalikka tu mas minakkipattageno ta tanakuan. Aru i meduffummu ta nira. Kunnatun si Helen nga nakagi ta nappasa ira nga parapo. Inuffunan yayya ni Jehova anna na wawwaragi, yatutta mas makoffun ngana yayya sangawe ta tanakuan. Kagian na: “Matageno ku tagga tu awan tu kwentà. Ngem nipatageno nio ni Jehova nga iddeddukan nà anna usu-usan nà tapenu uffunan i tanakuan.” Sangawe, magayayya ngana si Helen nga massesserbi bilang regular payunir.

IKAYA NI JEHOVA TU ALAWATATTAM I PAMAKOMA NA

8. Anni i ipasiguradu nittam ni Jehova ta Isaias 1:18?

⁸ Makokkonsensia i karuan nga aripan ni Jehova megafu ta nakua da ira nga liwa, yatun man ay nige onu kabalin na bawtismo da. Ngem ari tam nakuan kattaman nga niyawa ni Jehova i tavvu megafu ta iddeddu na ittam. Makasiguradu ittam nga ikaya na tu alawatattam yatun nga regalu na. Kabalittam nga ‘itunung i ganna-gannug,’c ta nallatanattam anna ni Jehova, ipasiguradu na nga interamente ngana nga pakoman na ittam. (Bibbigan i Isaias 1:18.) Talaga minaggiddu si Jehova ta kattaman na i nakaliwatattam ira! Ngem ari na nga kattaman i mapia ira nga kingngua tam.—Sal. 103:​9, 12; Heb. 6:10.

9. Ngatta ari ittam nakuan maffokus ta nappasa, anna anni nakuan i kuattam?

⁹ Nu makokkonsensia ka megafu ta nappasa ira nga liwa mu, ikagumammu nga maffokus ta maddaggun anna ta mappange, imbes tu ta nappasa. Ikonsidera i angngarigan ni apostol Pablo. Makokkonsensia yayya ta nepallo nga pinamersigi na ta Cristiano ira. Ngem ammu na tu pinakoma ngana yayya ni Jehova. (1 Tim. 1:​12-15) Agga-nono na kari i nappasa ira nga liwa na? Siguradu nga ari, megafu ta nallikuran na ngana i kingngua na ira bilang respetadu nga Fariseo, nelagum tatun i kingngua na ira nga liwa. (Fil. 3:​4-8, 13-15) Kingngua lallagu ni Pablo i adde na mawayya na ta ministerio na anna naffokus yayya ta mappange. Kagitta ni Pablo, ariammu ngana moli i nappasa. Ngem medayaw mu lagapa si Jehova ta maddaggun anna makapaffokus ka ta makakkasta nga mappange nga nipromesa na ta niko.

10. Anni i makua tam nu natakitattam i tanakuan?

¹⁰ Baka makokkonsensia ka ta nappasa ira nga kingnguam nga nakataki ta tanakuan. Anni i kuammu? Ikagumammu nga ayusan i problema. Ikagim anna ipasingammu ta natakitammu nga mabbabawi ka. (2 Cor. 7:11) Ikiddom kani Jehova nga uffunan na danuri natakitammu. Moffunan naka anna danuri natakitammu nga tulu-tuloy nga masserbi ta nisa anna mapeggan tu memammo nga nono.

11. Anni i magigiammu tam kani profeta Jonas? (Innan i letratu.)

¹¹ Makagigiammu ka nakuan ta nappasa ira nga nakkamaliammu. Mappeyusa ka lagapa kani Jehova ta maski anni nga pangusan na niko. Nonopan si profeta Jonas. Imbes tu umay yayya ta Nineve nga naddoban na Dios nisa, minay yayya ta tanakuan nga lugar. Dinisiplina ni Jehova si Jonas, yatutta nakagigiammu yayya ta nakkamalian na. (Jon. 1:​1-4, 15-17; 2:​7-10) Ari nga nagimmang si Jehova nga usan si Jonas bilang profeta na. Niddan na yayya tu chansa nga umay uli ta Nineve. Siminuttul balaman si Jonas. Makokkonsensia lagapa yayya ta nakkamalian na, ngem inalawa na yatun nga annungan maggafu kani Jehova.—Jon. 3:​1-3.

BANNA-BANNAYAN ITTAM NI JEHOVA GUKABAN NA MASANTO NGA ESPIRITU NA

12. Kunnasi nga iyawa nittam ni Jehova i imammo nu egga i trahedia onu grabe nga mesimmu? (Filipos 4:​6, 7)

¹² Banna-bannayan ittam ni Jehova gukaban na masanto nga espiritu na nu egga i trahedia onu grabe nga mesimmu. Nappasan yatun da Ron anna Carol. Kaddaraddam ta nappakamatay i 39 anios nga ana da nga lalaki. Kagiadda: “Aru ngana i nappasammi nga ziga, ngem yaw i karigatan. Aru nga gabi nga ari kami makakatrug, yatutta makimallo kami kani Jehova. Matageno mi i imammo nga nakagi ta Filipos 4:​6, 7.” (Bibbigan.) Nu mataka-takitakka megafu ta grabe nga nesimmu nikaw, puede ka nga makimallo kani Jehova tu mamikkaru anna maski paga apapaddu tapenu mekagim i ngangamin nisa. (Sal. 86:3; 88:1) Kanayummu nga kiddawan kani Jehova i masanto nga espiritu na. Magga iyawa na yatun.—Luc. 11:​9-13.

13. Kunnasi ittam moffunan na masanto nga espiritu tapenu tulu-tuloy nga masserbi kani Jehova? (Efeso 3:16)

¹³ Egga kari i grabe nga problemam nga fermi nga mamakkafi niko? Mapasikan naka na masanto nga espiritu tapenu tulu-tuloy nga masserbi kani Jehova. (Bibbigan i Efeso 3:16.) Naekspiriensa yatun ni Sister Flora. Makkavulu bi ira na atawa na nga nammisionero turi ta namabay i mister na, yatutta nad-divorce ira. Kagian na: “Madaddammo i panageno ku ta pangilloku na nio. Yatun laman i agga-nono ku. Nikiddò kani Jehova i masanto nga espiritu na tapenu ari ngà magimmang masserbi. Pinasikan nà ni Jehova tapenu malampasakku yaw nga grabe nga problema nga abbo ku bi tu ariakku makaya.” Natageno ni Flora nga inuffunan yayya na Dios tapenu mas mattalo ta nisa nga arian na yayya nga pagurayan ta maski anni nga problema. Kagian na paga: “Natageno ku nga sakto ta nio i nakagi ta Salmo 119:32: ‘I mandum ira ay karagatak-ku nga parulattan, ta mas dakal i pakalippawa nga iyawa mu niakan.’”

14. Anni i kuattam tapenu malawa tam i masanto nga espiritu na Dios?

¹⁴ Kabalimmu nga kiddawan kani Jehova i masanto nga espiritu, anni i mawag tu kuammu? Kuammu i gannug ira nga makoffun niko tapenu malawa mu i masanto nga espiritu na Dios. Nelagum taw i pakistudy anna pallayyagayya. Pannuammu gapa i nono mu tu appana-panono ni Jehova gukaban na pabbibbig tu Uvovug na kadaggaw. (Fil. 4:​8, 9) Habang bibbigammu yatun, sifutammu i karakter ira ta Biblia nga grabe i nappasadda anna pannonopammu nu kunnasi ira inuffunan ni Jehova nga makapagattam. Kekkaru i problema ni Sandra nga nakagi ta nappasa ira nga parapo. Kagian na: “Talaga napasikan i nono ku ta istoria ni Jose. Ari na nipamavulu nga makkafi i relasion na kani Jehova megafu ta pakarigatan anna kawan ira na hustisia.”—Gen. 39:​21-23.

BANNA-BANNAYAN ITTAM NI JEHOVA GUKABAN NA WAWWARAGI TAM

15. Sinni i paggafuan na pamanna-bannay, anna kunnasi da ittam maduffunan? (Innan gapa i letratu.)

¹⁵ Nu mazziga-riga ittam, ‘kuruga dakal i meyuffun’ na wawwaragi. (Col. 4:11) Usu-usan ira ni Jehova tapenu ipasingan nga iddeddu na ittam. Mabanna-bannayan ittam nu magginna ira ta pangistoria tam ta mataga-tageno tam. Maski i presensia da ay makapabannay ngana nittam. Awayya da i mangi-share tu makapasikan nga teksto ta Biblia onu makimallo kavulu ittam.d (Roma 15:4) Nu mittan, iperaddam nittam na wawwaragi i appana-panono ni Jehova anna makoffun yaw tapenu mas makkalma ittam. Uffunadda gapa ittam ta praktikal, kagitta na pangiyawa tu makan tapenu mappipia i panageno tam.

16. Anni i mawag tu kuattam tapenu moffunan ittam na tanakuan?

¹⁶ Nu mittan, mawag tu makiyoffun ittam ta tanakuan. Iddeddu ittam na wawwaragi anna kayà da i manguffun. (Prov. 17:17) Ngem awayya na tu ariadda ammu i matageno tam onu i mawag tam. (Prov. 14:10) Nu problemadu ka, iyistoriam yatun ta kurug ira nga kofummu anna ikagim nira i mataga-tageno mu. Ikagim ta nira i uffun nga mawag mu. Awayyam i makibbida ta tadday onu dua nga elder nga ka-close mu. Mas kayà gapa na karuan nga sister i makibbida ta tadday nga matured nga sister.

17. Anni i karuan nga rason nu ngatta ari ittam makalawa tu pamasikan ta nono, anna anni nakuan i kuattam?

¹⁷ Ari mu nga isisina i baggim ta tanakuan. Megafu ta problemadu ka, baka manaki mu i makibbida ta wawwaragi. Nu mittan, baka ari daka nga malippawa onu makekagi ira tu makataki nga uvovug. (Sant. 3:2) Ngem ariammu arayyuan i wawwaragi. Awayya nga usan ira ni Jehova tapenu pasikannan i nono mu. Kagian ni Gavin nga tadday nga elder nga egga i depression na: “Ariakku kuruga kayà i makibbida onu makikavulu ta wawwaragi.” Ngem ikaguman lagapa ni Gavin nga makikavulu ta wawwaragi yatutta mappipia i panageno na. Kagian gapa ni Sister Amy: “Megafu ta nappasa-pasakku, marigatan ngà nga mattalo ta totolay. Ngem ikakkagumakku nga iddukan anna pattalakkan i wawwaragì, kagitta na kukukuan ni Jehova. Ammù nga mamagayayya yaw kani Jehova anna mamagayayya gapa yaw ta nio.”

MAKAPABANNAY I PROMESA IRA NI JEHOVA

18. Anni i iddanamattam nga mesimmu ta mappange, anna anni i makua tam sangawe?

¹⁸ Aranni ngana nga alsan ni Jehova i ngamin nga problema tam anna i ngamin nga taki anna daddam nga mataga-tageno tam. (Nep. 21:​3, 4) Tatun saw nga tiempo, ari ngana nga “mepafutu” i ngamin nga mataki nga nesimmu ta nittam. (Isa. 65:17) Ngem maski sangawe pagalaman, ‘babbaggan ni Jehova i bigag tam ira’ kagitta na nagigiammu tam. Alawatammu gafu i aru nga iyayawa ni Jehova tapenu banna-bannayakka. Ariammu vuluvuga paddudan nga ‘yayya i manangngal niko.’—1 Ped. 5:7.