Ari Ittam Vuluvuga Magitadday

1-2. (a) Ngatta makagi tam nga ari ittam vuluvuga magitadday nga umarubang ta problema ira? (b) Anni i gigiammuattam taw nga artikulo?

NU EGGA i madaddammo ira nga problema tam, baka matageno tam nga gitta tam i agga-takay ta balabaddi nga barangay ta tangnga na bebay anna egga i masiki-sikan nga bagiu. Ngem ari ittam magitadday nga umarubang ta problema tam ira. Ari laman nga masingi-singan na minaggiddu nga Yama tam ta langi i pakarigatattam ira. Nipromesa na gapa nga uffunan na ittam. Kunnaw i makakkasta nga promesa na ta matalo ira nga aripan na: “Uffunattaka.”—Isa. 41:10.

² Gigiammuattam taw nga artikulo nu kunnasi ittam nga uuffunan ni Jehova gukaban na (1) pangigiya ta nittam, (2) pangiyawa ta pakawagattam, (3) papprotekta ta nittam, anna (4) pamanna-bannay ta nittam. Ipasiguradu ni Jehova nga maski anni nga problema i arubangattam, arianna ittam vuluvuga kattaman. Arianna ittam pagurayan yatutta ari ittam vuluvuga magitadday.

IGIGIYA ITTAM NI JEHOVA

3-4. Kunnasi ittam igigiya ni Jehova? (Salmo 48:14)

³ Bibbigan i Salmo 48:14. Ammu ni Jehova nga ari tam megiya i baggi tam anna kawagattam i pangigiya na. Kunnasi na gafu igigiya sangawe i matalo nga aripan na? Usu-usan na i Biblia. (Sal. 119:105) Gukaban na Uvovug ni Jehova, uffunan na ittam nga magangngua tu desision ira anna mapeggan tu kualidad ira nga mas mamagayayya nittam sangawe anna makeyawa nittam tu mannanayun nga inango ta mappange.a Angngarigan na, tuttudduan na ittam nga alsan i taki na nono tam, mabbalin tu mapattalakkan ta ngamin nga kukukuattam, anna napafutuan nga ayatan i tanakuan. (Sal. 37:8; Heb. 13:18; 1 Ped. 1:22) Nu kuattam danatun, mabbalin ittam tu mas mapia nga magana, atawa, anna kofun.

⁴ Fuera tatun, nisali gapa ni Jehova ta Uvovug na i istoria na totolay nga napeggan tu problema anna panageno nga kagitta tam. (1 Cor. 10:13; Sant. 5:17) Nu mabibbig tam yatun ira nga istoria anna iyaplika tam i magigiammu tam tatun, egga i dua nga pammakapianattam. Ollu, manono tam nga ari ittam magitadday ta egga ira i tanakuan nga nappasa gapa ta situasiottam ngem nakapagattam ira ta uffun ni Jehova. (1 Ped. 5:9) Mekadua, mammuattam nu kunnasi tam gapa maattamman i problema tam ira.—Roma 15:4.

5. Sinni i usu-usan ni Jehova tapenu igiya ittam?

⁵ Usu-usan ni Jehova i wawwaragi tam tapenu megiya ittam.b Angngarigan na, regular nga bisitan na circuit overseer ira i kongregasion ira tapenu pagaramman ittam. Megafu ta palappa da ira, massikan i pangurug tam anna moffunan ittam nga pattalupaddianan i pattaradday tam. (King. 15:40–16:5) Malallappo gapa i elder ira ta kongregasion tapenu uffunan i kada publisher. (1 Ped. 5:​2, 3) Igigiya na magana i ána da ta espiritual, uuffunadda ira nga usan tu mapia i abilidad da nga mannono anna mapeggan tu makasta nga kondukta. (Prov. 22:6) Uuffunan gapa na manakam ta espiritual ira nga sister danuri mabbing ira nga sister gukaban na pangipasingan tu makasta nga ehemplo, panabarang, anna pamagaram nira.—Tito 2:​3-5.

6. Anni i mawag nga kuattam tapenu mammakapia ta pangigiya ni Jehova?

⁶ Niyawa ngana ni Jehova i ngamin nga kawagattam tapenu megiya ittam. Kunnasi tam gafu mepasingan nga appresiattam yatun nga kingngua na? Kagian na Proverbio 3:​5, 6: “Mattalo ka kani Jehova ta interu nga futum, anna ariammu nga mattalo ta mismu nga pakalippawa mu.” Nu kunnatun i kuattam, ‘tunungan na i dala-dalattam.’ Kayà kagian natun nga uffunan na ittam nga malisian i napakaru nga problema anna mabbalin tu mas magayayya. Mappappabalo ittam ta ammammu ittam tu mapia ni Jehova anna iddeddu na ittam yatutta tabarangngan na i kada tadday ta nittam.—Sal. 32:8.

IYAWA NI JEHOVA I KAWAGATTAM

7. Anni i kuan ni Jehova tapenu meyawa i pakawagattam? (Filipos 4:19)

⁷ Bibbigan i Filipos 4:19. Fuera ta pangigiya ni Jehova nittam ta espiritual, bendisionan na gapa i lallappo tam tapenu mapeggan ittam tu makan, sinnun, anna paddianan. (Mat. 6:33; 2 Tes. 3:12) Siempre, normal laman nga mavurung ittam ta kawagattam ira ngem pagaramman ittam ni Jehova nga ari tu sobra nga mavurung ta kuddanatun nga gannug. (Innan i study note na Mateo 6:25.) Ngatta? Ari gare vuluvuga nga pagurayan na Yama tam i matalo ira nga aripan na ta tiempo na pakawagadda. (Mat. 6:8; Heb. 13:5) Makapattalo ittam ta nisa nu kagian na nga iyawa na i pakawagattam.

8. Anni i kingngua ni Jehova para kani David?

⁸ Inuffunan ni Jehova si David. Piga ragun nga narigi-rigatan si David megafu ta tattammangngan na si Patul Saul. Ngem niyawa ni Jehova i pakawagan na anna na suddalu na ira tapenu matolay ira. Turi ta pinannonopan ni David yatun nga nipanangngal ni Jehova nisa, nitura na: “Nabayag ngana i nipattolè, sangoye ay laka-lakay ngà ngana, ngem ariak-ku paga vuluvuga nga naginna tu i YAFU ay pinagurayan na i tolay nga mapia, onu i ána na ay makilelimus tu kanad-da.” (Sal. 37:25) Baka nasingammu ngana gapa nu kunnasi nga niyawa ni Jehova i pakawagammu anna na matalo ira nga aripan na.

9. Kunnasi nga iyawa ni Jehova i pakawagan na totolena nu egga i kalamidad? (Innan gapa i letratu ira.)

⁹ Iyawa gapa ni Jehova i pakawagan na totolena nu egga i kalamidad. Angngarigan na, turi ta egga i bisin ta ollu siglo, nangiyawa i Cristiano ira ta madduruma nga lugar tu uffun para ta wawwaragi nga makawag. (King. 11:​27-30; Roma 15:​25, 26) Kunnatun gapa i kukukuan na totolay na Dios sangawe para ta wawwaragi da. Nu egga i kalamidad, paguyuan ni Jehova i totolena tapenu iyawa i makan, danum, sinnun, anna medisina para tari ira ta biktima na kalamidad. Pakappian gapa na construction team ira i nadaral nga babalay anna Kingdom Hall ira. Insigida gapa nga mamanna-bannay anna manguffun ta espiritual i aripan ira ni Jehova tari ira ta nawanan tu balay onu natayan nga wawwagi tam.c

10-11. Anni i magigiammum ta ekspiriensa ni Borys?

¹⁰ Vuka-palag gapa nga iyawa ni Jehova i pakawagan na totolay nga ari paga nga maddayaw nisa. Makasta gapa nu kunnatun i kuattam. Magaleg ittam tu chansa nga mangipasingan tu kinasippo tari ira ta ari nga Saksi. (Gal. 6:10) Makasta i resulta natun. Nesimmu yatun kani Borys, tadday nga principal ta Ukraine. Maski nu ari yayya nga Saksi ni Jehova, masippo i pattratu na ta estudiante na ira nga Saksi anna irespeto na i kuru-kurugadda. Turi ta nadesision na nga manaw ta diadda megafu ta gerra anna magali ta mas safe nga lugar ta nasiodda, inuffunan yayya na wawwaragi tam. Turi kua, nagatende yayya ta Memorial na patay ni Cristo. Kunnaw i kagian ni Borys meyannung ta kingngua na wawwagi tam para nisa: “Kitessippo i Saksi ira anna niyawa da i pakawagakku. Mappappabalo ngà ta Saksi ira ni Jehova.”

¹¹ Maparigattam gapa i minangngikallo nga Yama tam ta langi nu ipasingattam i aya tari ira ta makawag maski paga nu ari ira nga Saksi. (Luc. 6:​31, 36) Magiddanama ittam nga megafu ta aya nga ipasa-pasingattam, mapaguyu ira nga mabbalin tu disipulo ni Cristo. (1 Ped. 2:12) Ngem piliadda man nga passerbian si Jehova onu ari, magayayya ittam lagapa megafu ta nangiyawa ittam.—King. 20:35.

PROTEKTAN ITTAM NI JEHOVA

12. Anni nga proteksion i nipromesa ni Jehova nga iyawa na ta totolena bilang grupo? (Salmo 91:​1, 2, 14)

¹² Bibbigan i Salmo 91:​1, 2, 14. Nipromesa ni Jehova nga protektan na ittam ta espiritual. Arianna vuluvuga ipamavulun nga madaral ni Satanas i kurug nga paddayaw. (Juan 17:15) Sonu “dakal nga ziga,” makapattalo ittam nga tuppalan saw ni Jehova i promesa na nga protektan na i totolena ta espiritual kunne na gapa ta pisikal.—Nep. 7:​9, 14.

13. Kunnasi nga protektan ni Jehova i kada tadday ta nittam?

¹³ Kunnasi nga protektan ni Jehova i kada tadday ta nittam? Ta uffun na Biblia, ipalippawa ni Jehova nittam i nadduman na mapia ta marake. (Heb. 5:14) Nu tuttulattam i prinsipio ira na Biblia, malillitattam i peligro ta espiritual anna ta pisikal. (Sal. 91:4) Protektan ittam gapa ni Jehova gukaban na kongregasion. (Isa. 32:​1, 2) Nu makikavulu ittam tari ta mangaya kani Jehova anna tumuttul ta prinsipio na ira, mapagaram anna mapasikan ittam nga lillitan i marake ira nga influwensia.—Prov. 13:20.

14. (a) Ngatta ipamavulun na Dios nga mappasa ittam ta problema ira? (b) Anni i ipasiguradu nittam na Salmo 9:10? (Innan gapa i footnote.)

¹⁴ Ta nappasa, egga ira i tiempo nga prinotektan ni Jehova i aripan na ira tapenu ari ira matakitan onu matay. Ngem ari tu kanayun nga kunnatun i kuan na. Egga ira i tiempo nga biktima ittam na “ari ekspektan nga mesimmu.” (Ecl. 9:11) Nipamavulun gapa ni Jehova nga mapersigi i karuan nga aripan na anna matay paga lagu tapenu mapakurug nga laddug si Satanas. (Job 2:​4-6; Mat. 23:34) Kunnatun gapa sangawe. Maski nu ari nga alsan ni Jehova i problema tam ira, makasiguradu ittam nga arianna vuluvuga pagurayan danuri mangaya ta nisa.d—Sal. 9:10.

BANNA-BANNAYAN ITTAM NI JEHOVA

15. Kunnasi ittam mabanna-bannayan megafu ta pakimallo, Biblia, anna kapangngurug tam? (2 Corinto 1:​3, 4)

¹⁵ Bibbigan i 2 Corinto 1:​3, 4. Nu karuan maraddam ittam, mavvuru-vurung, onu problemadu ittam. Awayya na tu madaddammo i problemam sangawe yatutta matageno mu nga magitadday ka. Egga kari i makalippawa ta mataga-tageno mu? Wan, si Jehova. Arianna laman nga malippawa i daddam mu, ‘banna-bannayan naka gapa ta ngamin nga ziga-riga mu.’ Kunnasi na nga kuan yatun? Nu makimallo ittam kani Jehova, iddan na ittam tu “imammo na nga ari malippawa na tolay.” (Fil. 4:​6, 7) Mabanna-bannayan ittam gapa nu mabibbig tam ta Biblia i kayà nga ikagi ni Jehova nittam. Ta Biblia gare, ikagi ni Jehova i kadakal na pagiddu na nittam, tudduan na ittam nga mabbalin tu ma-uto, anna iddan na ittam tu iddanama. Mabanna-bannayan ittam gapa ta study ira megafu ta makavulu tam i wawwaragi anna makaginna ittam tu pamagaram nga naggafu ta Biblia.

16. Anni i magigiammum ta ekspiriensa ni Nathan anna ni Priscilla?

¹⁶ Usu-usan ni Jehova i Biblia tapenu banna-bannayan ittam. Kunnatun i naekspiriensa da Nathan anna Priscilla nga taga-United States. Piga dagun ngana i nappasa, nadesisiodda nga magali nu sitaw mas dakal i pakawagan para ta mallayyagayya. Kinagi ni Nathan: “Nattalo kami nga bendisionan ni Jehova i passakrifisio mi.” Ngem turi ta nakadde ngana ira ta bagu nga asayment da, kalanna laman nga nattaki ira anna nakkaproblema ta kuartu. Fersadu nga limibbe ira ta baleda ngem problemadu lagapa ira ta kuartu. Istorian ni Nathan: “Ninono ku nu ngatta ari nakami nga binendisionan na Dios gitta na inekspekta mi. Ninono ku paga lagu nga baka egga i nakuà tu marake.” Ngem ta pappasa na tiempo, napakurug da Nathan anna Priscilla nga ari ira vuluvuga pinagurayan na Dios ta tiempo na pakawagadda. Istorian ni Nathan: “Tatun ira nga kitezziga nga tiempo, nabbalin tu gitta na ma-uto nga kofummi i Biblia ta yatun i namagaram anna nangigiya nikami. Imbes tu agga-nono mi i problema mi, mas lallagu nga ninono mi nu kunnasi nakami nga inuffunan ni Jehova tapenu maattamman yatun. Nakoffun yatun ta nikami tapenu mabbalin tu mas siguradu nga kanayun nakami uffunan ni Jehova ta maski anni nga problema mi ta mappange.”

17. Kunnasi nga nabanna-bannayan si Sister Helga? (Innan gapa i letratu.)

¹⁷ Banna-bannayan ittam gapa ni Jehova gukaban na wawwaragi. Kunnatun i naekspiriensa ni Sister Helga nga taga-Hungary. Ta aru nga dagun, nadduruma i problema na yatutta na-stress yayya anna natageno na nga awan tu sesserbi na. Ngem nu manono na yatun ira nga nesimmu, ammu na nga inusa ni Jehova i kongregasion tapenu banna-bannayan yayya. Nitura na: “Kanayun nà nga inuffunan ni Jehova kada masingan na nga makkakafi ngà megafu ta sekular nga trabahù, panangngal ku ta mataki nga ana ku, anna ta karuan paga nga problemà. Ta 30 dagun nga nappasa, awan tu maski tadday nga aggaw nga ari sinuppal ni Jehova i promesa na nga banna-bannayan nà. Kanayun nà nga pasa-pasikannan gukaban na masippo, minangngikavurung, anna minangngappresia nga wawwaragi. Egga ira i mat-text niakan, mangiyawa tu card, onu makkomenda ta tiempo nga kakawagakku yatun.”

18. Kunnasi tam mabanna-bannayan i tanakuan?

¹⁸ Pribilehio tam nga parigan i Dios tam gukaban na pamanna-bannay ta tanakuan. Kunnasi tam nga makua yatun? Mapasensia ittam nga magginna ta nira, makapabannay nakuan i kakkagiattam, anna mangiyawa ittam tu praktikal nga uffun ta nira. (Prov. 3:27) Ikagumattam nga banna-bannayan i ngamin nga mazziga-riga nelagum danuri ari paga masserbi ta Dios. Nu maraddam, mataki, onu mavvuru-vurung i karruba tam, pasiarattam ira, magginna ittam ta nira, anna ikagi tam i makapabannay nga teksto ira ta Biblia. Nu parigattam gare si Jehova, i “paggafuan na ngamin nga uffun,” moffunattam i kapangngurug tam ira tapenu maattamman i problema da. Mapalapo tam gapa i futu danuri ari mangurug tapenu gigiammuadda i meyannung ta Dios.—Mat. 5:16.

KANAYUN ITTAM NGA UFFUNAN NI JEHOVA

19. Anni i kuan ni Jehova para ta nittam, anna kunnasi tam yayya maparigan?

¹⁹ Ikavurungan ni Jehova i ngamin nga mangiddu sa. Arianna ittam pagurayan nu marigi-rigatan ittam. Gitta na minaggiddu nga magana nga ikavurungan na i ana na, ikavurungan ni Jehova i matalo ira nga aripan na. Igiya na ittam, iyawa na i pakawagattam, protektan na ittam, anna banna-bannayan. Maparigattam i minaggiddu nga Yama tam ta langi nu uffunan anna pagarammattam danuri egga i problema da. Maski gafu anni nga problema i pappasattam, makasiguradu ittam nga uffunan ittam ni Jehova. Yaw gare i nipromesa na ta nittam: “Ari ka nga maganassing, ta kavulu mà.” (Isa. 41:10) Talaga makapasikan yatun! Ari ittam vuluvuga magitadday.