Usan i Video ira ta Panuddu ta Bible Study Ira

Makala tu atension i visual aid ira anna makoffun danatun tapenu malippawa anna meraddamman na tolay i nagigiammuna. Nangusa tu visual aid i Katannangan nga Instruktor tam nga si Jehova tapenu ituddu i importante ira nga leksion. (Ge 15:5; Jer 18:1-6) Kunnari gapa i Malalaki nga Mestru nga si Jesus. (Mt 18:2-6; 22:19-21) Tadday i video ta klase na visual aid nga napakurug tu makoffun ta nappasa nga daga-ragun. Usu-usammu kari i video ira ta panuddu ta Bible study ira?

Neprepara i 10 nga video nga makoffun nittam ta pangituddu ta leksion ira ta brosiur nga Makakkasta nga Balita Naggafu ta Dios! Maruddu nga parehu i titulo na video ta tadday ta pakkiavu ta brosiur. Egga ira link ta digital nga format na nga mangipanono nittam nu kanni tam nga ipagiraw i kada video. Egga gapa ira video para ta tanakuan paga ira nga publikasion ta paggigiammu nga egga ta Teaching Toolbox tam.

Egga kari giggigiammuannu nga topiko ta Biblia nga mariga nga malippawa na estudiantem? Onu egga kari espesipiko nga problemana? Magaleg tu video ta jw.org® anna JW Broadcasting® nga makoffun nisa. Awayyanu girawan dua anna paguvovugannu.

Egga ira bagu nga video nga melawan kada vulan. Ta paggirom tatun, nonopammu nu kunnasim mosa danatun ta panuddu ta tanakuan.