I Meduffun Nikaw na Pakimallo

Nappadoktor si Pamela gafu ta grabe i takina. Ngem nakkiddaw gapa yayya ta Dios tu sikan tapenu maattammanna i mariga nga situasionna. Nakaduffun kari nisa i pakimallo?

“Ta papporù ta cancer ku, kanayun ngà nga mavuru-vurung,” kunni Pamela. “Ngem nu makimallo ngà kani Jehova nga Dios, makkalma ngà anna makanono ngà tu mapia. Aru lapa i mataki niakan, ngem positibo ngà gafu ta pakimallo. Nu kumustannà na totolay, itabbag ku, ‘Mataki ngà ngem magayayya ngà lapa!’”

Siempre, ari tam ngana gapa nga iddaggan nga egga i madammo nga problema tam tapenu manono tam i makimallo. Meparubattam ngamin ta darakal anna baraddi nga problema, yayya nga gagangay ngana laman nga matageno tam nga mawag tam i uffun. Makaduffun kari i pakimallo?

Kagian na Biblia: “Ipammakatalo mu ta YAFU i vuru-vurung mu ira, ay mala mu i pangiyegu na; arian na vuluvuga nga itulu tu i matunung nga tolay ay maffu.” (Salmo 55:22) Anni mabba i kasta natun! Kunnasi ka gafu maduffunan na pakimallo? Nu mepangngo i akkimallo mu ta Dios, iyawana i mawag mu tapenu maattammammu i problemam ira.—Innan i kahon nga “I Meduffun Nikaw na Pakimallo.”

I Meduffun Nikaw na Pakimallo

Memammo nga nono

“Kiddawan nu ta Dios i mawag nu. Ay iyawa na Dios nikamu i imammo na nga ari malippawa na tolay. Yaw i manangngal ta nono anna giffutuan nu ta ketadday nu [“gukaban,” NW] kani Cristo Jesus.” (Filipos 4:6, 7) Nu ikagim ta Dios i ngamin nga pakavurungammu, pabbalinan naka tu kalmadu anna makuam i fustu maski problemadu ka.

Ka-uto maggafu ta Dios

“Nu egga nikamu i makkurang ta ka-uto, mawag tu makimallo ta Dios, ay meddan yaya. Ta vuka i palag na Dios anna sigga-allo nga mangiyawa ta maski anni ta ngamin nga totolay.” (Santiago 1:5) Nu problemadu ittam, awayyana nga makakua ittam tu marake nga desision. Nu ipakimallo mu ta Dios i ka-uto, ipanonona nikaw i aru nga makaduffun nga prinsipio ta Biblia.

Sikan anna banna-bannay

“I ari nga maguku-gukug nga pakapangngua ay maggafu ta Dios.” (2 Corinto 4:7) Gafu ta si Jehova nga Dios i makapangngua-sa-ngamin, mapasikan naka tapenu marubang mu i problemam ira anna maattammammu danatun. (Isaias 40:29) Kagian paga na Biblia nga si Jehova i “Dios nga paggafuan na ngamin nga uffun!” Banna-bannayanna ittam ta “ngamin nga ziga-riga” tam.—2 Corinto 1:3, 4.