Pakkiavu na Mabbibbig Ira
Nitura ni David ta Salmo 145:2 nga “adde ta adde noka,” idayarayaw na i Dios. Kayà na kari kagian yaw nga ninono na nga ari yayya vuluvuga matay?
Ari. Ngem fuffustu anna kurug i kinagi ni David.
Tatun nga versikulo kinagi ni David: “Adde ta adde noka ay et-taka iraya-rayaw.” (Sal. 145:2) Tapus kinagi paga ni David ta tanakuan nga versikulo, “O Afu Dios ku, napafutu nga daya-rayawat-taka; i pakapangnguam ay ilammuyag ku adde noka.”—Sal. 86:12.
Turi ta nitura ni David yatun ira nga uvovug, ari na nga ninono nga ari yayya vuluvuga matay. Ammu na i kinagi ni Jehova nga matay i tolay megafu ta liwa. Aminadu yayya nga minalliwa yayya. (Gen. 3:3, 17-19; Sal. 51:4, 5) Ammu na nga natay gapa maski i lallaki nga matalo ta Dios gitta da Abraham, Isaac, anna Jacob. Ammu na gapa nga matay gabbalaman yayya. (Sal. 37:25; 39:4) Ngem masingan ta kinagi ira ni David ta Salmo 145:2 i pakkaraga anna determinasion na nga idayaw i Dios ta mannanayun onu adde noka, kayà na kagian, adde ta matolay yayya.—2 Sam. 7:12.
Kasali ta nitura ni David i karuan ta ekspiriensa na ira, gitta na mabibbig tam ta footnote na superskripsion na Salmo 18, 51, anna 52. Ta Salmo 23, si David nga tadday gapa nga pastor ay dineskriba na si Jehova bilang tadday nga pastor nga mangigiya anna mangiyawa tu sikan anna proteksion. Yatun i rason nu ngatta kayà ni David nga passerbian i Dios ta ‘kagaggaw nga pattolena.’—Sal. 23:6.
Nonopan yaw: Sinni kari i naddog kani David nga mattura? Ari kari tu si Jehova? Nelavu ta nitura na i profesiya ira nga mappange pagalaman nga mesimmu. Angngarigan na, ta Salmo 110, nitura ni David i meyannung ta tiempo nga i Yafu na ay ‘magitubang ta ziwanan na Dios’ ta langi anna mangalawa tu pakapangngua. Tapenu kuan i anni? Tapenu pammagurayan i kokontra na anna ‘sentensian i nasion ira’ ta davvun. Gaka ni David yatun nga Yafu na, i Mesias nga mammaguray ta langi anna mabbalin tu ‘pari adde ta ngangangay.’ (Sal. 110:1-6) Kinagi ni Jesus nga meyannung ta nisa i profesiya nga maleran ta Salmo 110 anna kinagi na gapa nga egga i ketuppalan na yatun ta mappange.—Mat. 22:41-45.
Si Jehova i naddog kani David nga itura i nesimmu ira tagga ta tiempo na anna i mesimmu ira ta mappange sonu mapaginnolay yayya tapus magayayya nga dayawan na si Jehova adde noka. Makagi tam gafu nga i Salmo 37:10, 11, 29 ay tumukoy ta paddia-paddian ta Israel gari anna tumukoy gapa ta paddia-paddian na interu mundo ta mappange sonu tuppalan na Dios i promesa na ira.—Innan i parapo 8 ta artikulo nga ‘Makitappaddiakka Niakan ta Paraiso’ taw nga isyu.
Ipasingan gafu na Salmo 145:2 anna na kaparefu na ira nga versikulo nga ikaya ni David nga idaya-rayaw si Jehova ta Israel gari adde ta patena. Ipasingan gapa natun i fuffustu anna kurug nga makua ni David ta mappange sonu paginnolayan uli yayya ni Jehova.