Puede Ka Mabbalin tu Memammo ta Tiempo na Ziga

1. Anni i ‘imammo na Dios,’ anna anni ira i pammakapianattam nu egga ta nittam yatun? (Filipos 4:6, 7)

EGGA i klase na imammo nga ari nga ammu na totolay ta mundo. Yatun i ‘imammo na Dios.’ Tumukoy yatun ta imammo nga matageno tam megafu ta egga i madukko nga relasiottam ta Yama tam ta langi. Nu egga ta nittam i imammo na Dios, ari ittam mavuru-vurung. (Bibbigan i Filipos 4:6, 7.) Madukko gapa i relasiottam ta ‘Dios nga mangiyawa ta imammo’ anna ta tanakuan nga mangaya gapa nisa. (1 Tes. 5:23) Nu kilala, pattalakkan, anna tuttulattam i Yama tam, mapakalma na imammo na Dios i pavvuru-vurung tam nu meparubang ittam ta maziga nga situasion.

2. Ngatta makasiguradu ittam nga posible nga mapeggan ittam tu imammo na Dios?

² Posible kari nga mapeggan ittam tu imammo na Dios ta tiempo na ziga, gitta na nu egga i mawwara tu taki, kalamidad, gulu-gulu, onu pameppersigi? Puede nga mamaganassing ta nittam danatun. Ngem kunnaw i nitabarang ni Jesus ta tagatuttul na ira: “Ari kamu nga mavvuru-vurung anna maganassing.” (Juan 14:27) Pia ngana laman ta sinuttul na wawwaragi tam yatun nga tabarang ni Jesus. Ta uffun ni Jehova, napeggan ira tu imammo maski nu attattammadda i grabe ira nga kapurueba.

MEMAMMO MASKI NU EGGA I MAWWARA NGA TAKI

3. Kunnasi nga afektan na epidemic onu pandemic i imammo tam?

³ Dakal i pangulian na paddia-paddiattam nu egga i epidemic onu pandemic. Ikonsidera i efekto na COVID-19 ta aru nga totolay. Ta tadday nga survey, maturu tu gaddua i nakkagi nga marigatan ira nga makkatrug ta tiempo na pandemic. Fuera paga tatun, minatannang i bilang na totolay nga mavuru-vurung, depres, magillellaw, adik ta droga, pisikal nga naabuso ta familia, anna mas-suicide. Nu egga i mawwara nga taki ta dian nu, anni i kuammu tapenu ari ka kuruga mavuru-vurung anna mapeggakka tu imammo na Dios?

4. Ngatta makeyawa nittam tu imammo nu ammu tam i profesiya ni Jesus meyannung ta pangurianan ira nga aggaw?

⁴ Niprofesiya ni Jesus nga ta pangurianan ira nga aggaw, egga ira i palakag nga kappatay nga taka-taki “ta madduma-ruma nga lugar.” (Luc. 21:11) Makoffun kari yatun tapenu mabbalin ittam tu memammo? Wan. Ari ittam ngana gare nga makaddag ta pawwara na taka-taki. Ammu tam nga mesimmu danatun gitta na kinagi ni Jesus. Tuttulattam gafu i nitabarang ni Jesus tari ira ta mattolay ta tiempo na panuppalan: “Ari kamu nga mavurung.”—Mat. 24:6.

5. (a) Base ta Filipos 4:8, 9, anni nakuan i ipakimallo tam nu egga i mawwara tu taki ta diattam? (b) Kunnasi nga nakoffun ta tadday nga sister i audio recording ira na Biblia, anna anni i magigiammum tatun?

⁵ Awayya na tu mavurung anna maganassing ittam nu egga i mawwara nga taki. Kunnatun i nesimmu kani Sister Desi.b Natay ta COVID-19 i angkal, kapitta, anna doktor na. Yatutta mavurung yayya nga baka ma-COVID yayya tapus meyalasig yatun ta bako ngana nga yena na. Megafu gapa ta pandemic, mavurung yayya nga mawanan tu trabahu yatutta baka awan saw tu paggatang na tu kanadda anna pappaga tu renta. Agga-nono na danatun nga pakavurungan na yari tu ari yayya makakatrug nu gabi. Ngem netoli i imammo ni Desi. Kunnasi? Espesipiko nga nipakimallo na nga uffunan nakuan yayya ni Jehova tapenu mabbalin tu kalmadu anna makapannono tu positibo. (Bibbigan i Filipos 4:8, 9.) Gitta na “makikkibbida” nisa si Jehova gukaban na audio recording ira na Biblia, yari tu nagginna yayya. Kunna, “Pakalman nà na malumamo nga boses na mabbibbig ira anna mepanono niakan nga ikavurungan nà ni Jehova.”—Sal. 94:19.

6. Kunnasi naka moffunan na personal study anna pagatende ta study?

⁶ Nu egga i mawwara tu taki ta dian nu, baka ari mu ngana makua i karuan ta dati nga kukukuammu. Ngem ari mu nakuan ipamavulun nga afektan natun i pappersonal studym onu pagatendem ta study. Nu mappersonal study ka gare, makoffun ta nikaw i ekspiriensa ira ta publikasion anna video tam ira. Iperaddam natun niko nga matalo lagapa i wawwaragi maski nu mappasa-pasa ira ta problema nga kagitta balaman na arubangammu. (1 Ped. 5:9) Makoffun i study tapenu mapannonopammu i positibo ira nga gannug nga naggafu ta Biblia. Meddakka gapa natun tu chansa tapenu mapagaram i tanakuan anna tapenu mapagaram daka. (Roma 1:11, 12) Nu nonopammu i pinanguffun ni Jehova ta maddayaw ira ta nisa nu mattaki, maganassing, onu maraddam ira, massikan i pangurug mu anna mas mattalo ka nga uffunan naka gapa.

7. Anni i magigiammum kani apostol Juan?

⁷ Ikagumammu nga kumustan i wawwaragim. Nu egga i mawwara nga taki ta diattam, awayya na nga mawag i maf-physical distancing maski nu kapangngurug tam i kakavulu tam. Ta kunnatun nga tiempo, baka matageno mu i gitta na natageno ni apostol Juan. Kayà na nakuan nga masingan ta personal i kofun na nga si Gayo. (3 Juan 13, 14) Ngem ammu ni Juan nga ari paga tu posible yatun. Yatutta kingngua na i mawayya na. Nattura yayya kani Gayo. Nu ari tu posible nga mabisitam tu personal i wawwaragim, awayyam ira nga tawagan, i-video call, onu i-text. Nu kanayummu nga kumustan i kapangngurug mu ira, ari mu kuruga matageno nga magitetadday ka anna mas mabbalikka tu kalmadu. Mappoffukka gapa ta elder ira mas ngana nu mavuru-vurukka anna alawatammu nakuan i meddu nga tabarang da.—Isa. 32:1, 2.

MEMAMMO MASKI NU EGGA I KALAMIDAD

8. Kunnasi nga afektan na kalamidad i imammo mu?

⁸ Nu naka-ekspiriensa ka ngana tu baha, lunig, onu tuggi, awayya na tu mavuru-vurukka lagapa maski nu nabayag ngana nga nesimmu yatun. Nu natayakka onu nadaral i pakkukuam ira, awayya na tu makatageno ka tu daddam, pakkafi na nono, onu poray. Ngem ari na kayà kagian nga materialistiko ka onu makafi i pangurug mu. Talaga mariga i nappasa-pasammu yatutta baka ekspektan na karuan nga negatibo i reaksiommu. (Job 1:11) Ngem awayyam lagapa i mabbalin tu memammo. Kunnasi?

9. Anni i kinagi ni Jesus tapenu meprepara ittam ta kalamidad ira?

⁹ Daddamman i niprofesiya ni Jesus. Nonopan na karuan nga ari ira maka-ekspiriensa tu kalamidad. Ngem ammu tam nga mas umaru i kalamidad ta tiempo tam anna posible nga maekspiriensa tam i karuan tatun. Kinagi ni Jesus ta tagatuttul na ira nga egga i “masikan ira nga lunig” anna karuan paga nga kalamidad nige na panuppalan. (Luc. 21:11) Niprofesiya na paga nga “umaru nga umaru i marakay.” Masingan yatun ta krimen, kinavayolente, anna pangatake ira na terorista nga mesissimmu sangawe. (Mat. 24:12) Ari vuluvuga kinagi ni Jesus nga nu maka-ekspiriensa ittam tu kunnatun ira nga kalamidad, kayà na kagian nga pinagurayan ittam ngana ni Jehova. Kakurugan na, aru ta matalo nga masserbi kani Jehova i nafektan na kalamidad. (Isa. 57:1; 2 Cor. 11:25) Ari nga mammilagro si Jehova tapenu protektan ittam ta ngamin nga kalamidad. Ngem iyawa na i maski anni nga kawagattam tapenu mabbalin ittam tu kalmadu anna memammo.

10. Ngatta pangipasingan tu pangurug i papprepara sangawe ta kalamidad? (Proverbio 22:3)

¹⁰ Mas mabi para nittam i mabbalin tu kalmadu ta emergency nu dati ittam ngana nga nakaprepara. Ngem kayà kari kagian na papprepara tam nga kurang i pangurug tam kani Jehova? Ari gapa. Kakurugan na, ipasingan na papprepara tam nga egga i pangurug tam nga matangngallan na ittam. Ngatta? Tabarangngan ittam na Uvovug na Dios nga mapprepara ta posible ira nga kalamidad. (Bibbigan i Proverbio 22:3.) Mamippiga ittam ngana nga pinagaram na organisasion na Dios nga mapprepara para ta emergency gukaban na artikulo ira ta magazina, study, anna announcement ira.c Mattalo kari ittam kani Jehova? Nu wan, tuttulattam ngana i tabarang na sangawe—nige paga nga egga i mesimmu nga kalamidad.

11. Anni i magigiammum kani Margaret?

¹¹ Ikonsidera i ekspiriensa ni Sister Margaret. Zinog yayya na ofisial ira na gobiernu nga magevacuate turi ta egga i wildfire ta diadda. Aru i totolay nga maggiriddang nga magevacuate yari tu grabe i traffic anna awan ngana tu makali nga takay. Natakkabban tu ngisi nga atu i pallevu anna ari makalawan si Margaret ta takena. Ngem awan tu marake nga nesimmu nisa megafu ta nakaprepara yayya. Egga i nitagu na tu mapa ta pitaka na nga puede na nga innan tapenu makaleg yayya tu tanakuan nga ruta. Dati ngana gapa nga pinraktis na nga maddalan tatun nga ruta tapenu ammu na i paffuntan na ta tiempo na emergency. Pia ngana laman ta napprepara si Margaret.

12. Ngatta tumuttul ittam ta instruksion ira para ta safety tam?

¹² Kayà na autoridad nga safe ittam anna maayus i ganna-gannug yari tu awayya na nga ikiddaw da nga tuttulattam i curfew nga nipay da, ikiddaw da nga magevacuate ittam, onu tuttulattam i karuan paga nga instruksion. Matagga i ulu na karuan onu itala-talattadda nga tumuttul tatun megafu ta manaki da nga panawan i pakkukua da ira. Ngem anni i kuan na Cristiano ira? Kagian na Biblia: “Megafu ta Yafu, makimoray kamu ta ngamin nga mammaguray: ta Emperador nga katannangan nga mammaguray, tuange ta gubernador ira nga sinullo na.” (1 Ped. 2:13, 14) Mangiyawa gapa i organisasion na Dios tu instruksion ira tapenu safe ittam. Kanayun nga meperaddam nga iyawa tam nakuan ta elder ira i updated nga contact information tam tapenu makontak onu mangngayadda ittam ta tiempo na emergency. Nakuam ngana kari yatun? Baka makalawa ittam gapa tu instruksion nu anni i kuattam nu mawag nga maddian ittam laman ta balay, magevacuate, manga tu relief goods, onu nu kunnasi onu kanni ittam nga puede nga manguffun ta tanakuan. Nu ari ittam nga tumuttul, awayya na nga mappeligro i inango tam anna na elder ira. Daddamman nga danatun nga matalo nga lallaki i manangngal ta nittam. (Heb. 13:17) Kunnaw i kinagi ni Margaret, “Awan tu nesimmu nga marake ta nio megafu ta sinuttul ku i instruksion na elder ira anna na organisasion.”

13. Anni i nakoffun ta aru nga Cristiano nga nagevacuate tapenu magayayya anna memammo lagapa ira?

¹³ Aru ta wawwaragi tam i nagevacuate megafu ta kalamidad, gerra, onu gulu-gulu. Ngem kingngua da lagapa i ngamin nga mawayya da tapenu magadjust ta bagu nga situasiodda anna insigida ira nga nakiparte ta espiritual ira nga aktibidad. Gitta na ollu ira nga Cristiano nga nawwara-wara megafu ta pameppersigi, itulu-tuloy da lagapa nga ‘ilayyagayya i uvovug’ na Dios. (King. 8:4) Nakoffun ta nira i pallayyagayya tapenu makafokus ira ta Pappatulan imbes tu ta mariga ira nga pappasa-pasadda. Megafu tatun, magayayya anna memammo lagapa ira.

MEMAMMO MASKI NU MAPEPPERSIGI KA

14. Kunnasi nga afektan na pameppersigi i imammo tam?

¹⁴ Nu mapersigi ittam, baka ari tam ngana makua i gannug ira nga mamabbalin ta nittam tu kalmadu. Magayayya ittam nu maggarammammung, mallayyagayya, anna nu makua tam i inaggaw ira nga kukukuattam nga ari ittam maganassing nga baka maaresto ittam. Ngem nu ari tam ngana nga makua danatun, awayya na tu mavvuru-vurung anna maganassing ittam ta posible nga mesimmu. Normal laman nga matageno tam danatun. Ngem mawag tu magimmugug ittam. Kinagi ni Jesus ta tagatuttul na ira nga awayya na nga makkafi i pangurug da megafu ta pameppersigi. (Juan 16:1, 2) Anni gafu i kuattam tapenu memammo ittam lagapa maski nu mapeppersigi?

15. Ngatta ari ittam nakuan maganassing nga mapersigi? (Juan 15:20; 16:33)

¹⁵ Kagian nittam na Uvovug na Dios: “Madara-darum ngamin i maya ta attolay nga mekunnay ta Dios ta ketadday da kani Cristo Jesus.” (2 Tim. 3:12) Turi ta ne-ban i trabahu tam ta nasion da Brother Andrei, narigatan yayya nga kurugan nga mapersigi i ngamin nga masserbi kani Jehova. Ninono na: ‘Kekkaru i Saksi ira tawe. Imposible nga maaresto kami ngamin na autoridad.’ Ngem imbes tu mangiyawa yatun nga appana-panono tu imammo kani Andrei, kanayun lallagu yayya nga mavuru-vurung. Ngem nattalo kani Jehova i tanakuan nga wawwaragi. Ammu da nga posible nga maaresto ira, ngem ari ira kuruga mavurung kumpara kani Andrei. Anni gafu i kingngua ni Andrei? Pinarigan na i appana-panono da anna nattalo yayya ta Dios. Megafu tatun, memammo ngana yayya anna magayayya maski nu egga ira i kapurueba. Posible nga mesimmu nittam yatun. Fustu tu kinagi ni Jesus nga mapersigi ittam, ngem nipasiguradu na gapa nga mawayya tam i mattalupaddian nga matalo.—Bibbigan i Juan 15:20; 16:33.

16. Anni ira nga instruksion i mawag nga tuttulattam nu mapersigi ittam?

¹⁶ Nu me-ban onu egga i restriksion ta trabahu tam, awayya na tu makalawa ittam tu instruksion ira maggafu ta branch office anna ta elder ira. Gakkag natun ira nga instruksion nga protektan ittam, masiguradu nga tulu-tuloy ittam nga makalawa tu espiritual ira nga makan, anna ari ittam magimmang ta pallayyagayya adde ta posible. Kuammu i adde na mawayyam tapenu tuttulan yatun ira nga instruksion maski nu ari mu kuruga malippawa nu ngatta neyawa yatun. (Sant. 3:17) Ari ka gapa makkagi tu informasion ira meyannung ta wawwaragi onu ta aktibidad na kongregasion tari ira ta awan mabba tu kepangngattadda nga makannammuan yatun.—Ecl. 3:7.

17. Gitta na apostoles ta ollu nga siglo, anni i determinadu tam nga kuan?

¹⁷ Tadday ta primeru ira nga rason nu ngatta kontran ni Satanas i totolay na Dios ay megafu ta ilayyagayya da i meyannung kani Jesus. (Nep. 12:17) Ari ka nakuan maganassing kani Satanas anna ta mundo na. Magayayya anna memammo ittam nu itulu-tuloy tam i mallayyagayya anna manuddu maski nu makokkontra ittam. Ta ollu nga siglo, nidob na ofisial ira na Judio ta apostoles nga magimmang ira nga mallayyagayya. Ngem pinili danatun nga matalo nga lallaki nga tuttulan i Dios. Nitulu-tuloy da i mallayyagayya anna nagayayya ira megafu tatun. (King. 5:27-29, 41, 42) Siempre, mawag nga magimmugug ittam ta pallayyagayya nu megamma i trabahu tam. (Mat. 10:16) Ngem nu kuattam i ngamin nga mawayya tam, mapeggan ittam tu imammo megafu ta ammu tam nga mapagayayya tam si Jehova anna makepaliag ta inango i mensahe tam.

‘MAKITAPPADDIAN NIKAW I DIOS NGA MANGIYAWA TA IMAMMO’

18. Sinni i paggafuan na kurug nga imammo?

¹⁸ Kumbinsidu ittam nakuan nga awayya tam i mapeggan tu imammo maski ta pinakamariga ira nga situasion. Ta kunnatun ira nga tiempo, daddammattam nakuan nga i imammo nga mawag tam ay i imammo na Dios. Si Jehova laman i makeyawa ta kunnatun nga imammo. Mattalo ka nisa nu egga i mawwara nga taki, kalamidad, onu pameppersigi. Ari ka vuluvuga manaw ta organisasion na. Pannonopammu i makakkasta nga iddanama ta mappange nga maginnennag nikaw. Nu kuammu yatun, ‘makitappaddian nikaw i Dios nga mangiyawa ta imammo.’ (Fil. 4:9) Ta tumunug nga artikulo, gigiammuattam nu kunnasi tam moffunan i kapangngurug tam ira nga mapeggan tu imammo na Dios ta tiempo na ziga.