MAGIGIAMMU NGA ARTIKULO 52
Duffunan i Tanakuan nga Makapagattam ta Tiempo na Ziga
“Ariammu iyetu i mapia turi ira ta mawag nga pangiyawatammu nu egga ta pakapangnguam i manguffun.”—PROV. 3:27.
KANSION 103 Mga Pastol—Regalo ng Diyos
SUMARIOa
1. Kunnasi nga tattabbagan ni Jehova i pakimallo na aripan na ira?
AMMUM kari nga awayya naka nga usan ni Jehova tapenu tabbagan i pakimemallo na tanakuan? Elder ka man, ministerial nga aripan, payunir, onu publisher ta kongregasion, egga i meyuffummu. Makaduffukka gapa maski nu abbing ka paga onu manakam ngana, onu tadday ka nga brother onu sister. Nu mappoffun kani Jehova i mangiddu ta nisa, usu-usan na i elder ira anna i karuan paga nga matalo nga aripan na tapenu ira i “paggafuan na dakal nga banna-bannay” para tatun nga tolay. (Col. 4:11, NW) Magayayya ittam nga passerbian si Jehova anna i wawwaragi tam! Makua tam yatun nu egga i mawwara nga taki, kalamidad, onu pameppersigi.
DUFFUNAN I TANAKUAN NU EGGA I MAWWARA NGA TAKI
2. Ngatta mariga nga uffunan i tanakuan nu egga i mawwara nga taki?
2 Awayya na tu marigatattam nga makka-uffu-uffun nu egga i mawwara nga taki. Angngarigan na, baka kayà tam nga pasiaran i kofuttam ira ngem ari tu safe nga kuan yatun. Baka kayà tam gapa nga imbitan nga makipakkan ta nittam danuri mamroblema ta finansial ngem baka ari tu posible yatun. Awayya na gapa tu kayà tam nga duffunan i tanakuan ngem baka marigatan ittam nga kuan yatun nu mismu i kafamilia tam ay mataki onu mamroblema gapa ta finansial. Ngem ikaya tam lagapa nga uffunan i wawwaragi tam. Magayayya si Jehova nu kuattam i adde na mawayya tam para ta nira. (Prov. 3:27; 19:17) Anni gafu i makua tam?
3. Anni i magigiammu tam ta ehemplo na elder ira nga kakongregasion ni Desi? (Jeremias 23:4)
3 I makua na elder ira. Nu elder ka, mawag nga kilalam tu mapia i karneru ira. (Bibbigan i Jeremias 23:4.) Istorian ni Sister Desi nga nakagi ta nappasa nga artikulo: “Nige paga na pandemic, kanayun ngana nga makavulu mi na kagrupò ira ta pallayyagayya anna gathering i elder ira ta field service group mi.”b Megafu tatun, ari nga narigatan danatun nga pastor tapenu uffunan si Desi turi ta nawwara i COVID-19 tapus natay i karuan ta kafamilia na megafu tatun nga virus.
4. Ngatta noffunan na elder ira si Desi, anna anni i magigiammu na elder ira tatun?
4 Istorian ni Desi, “Megafu ta dati ngana nga kokkofukku i elder ira, mabi laman niakan nga ikagi ta nira i mataga-tageno ku anna i pakavurungakku ira.” Anni i magigiammu na elder ira tatun? Bilang pastor, tangngallan nu i nekargo nikamu nige na tiempo na ziga. Mabbalikkamu tu kofudda. Nu marigatakkamu nga personal nga mapasiar ira megafu ta egga i mawwara nga taki, mannono kamu tu tanakuan nga makua nu tapenu makumusta nu ira. “Egga ira i tiempo nga ta tadday laman nga aggaw, nadduruma nga elder i mattawag onu mam-message niakan,” istorian ni Desi. “Talaga makatukkal i teksto ira nga ni-share da maski nu kabisadù danatun.”
5. Kunnasi nga mammuan na elder ira nu anni i mawag na wawwaragi, anna kunnasi da ira nga moffunan?
5 I tadday nga makuam tapenu mammuammu nu anni i mawag na wawwaragi ay gukaban na pappakkiavu ta nira nga ari ira mepasiranan. (Prov. 20:5) Makalanno kari i kanadda, medisina, anna karuan paga nga suplay da? Posible kari nga mawanan ira tu trabahu onu paddianan? Mawag da kari i manguffun ta nira ta pakkiddaw tu uffun ta gobiernu? Inuffunan na wawwaragi si Desi ta material. Ngem i emosional anna espiritual nga uffun maggafu ta elder ira i talaga nakoffun ta nisa tapenu makayanan na i problema na ira. Kagian na: “Nipakimallo nà na elder ira. Maski nu kakku ʹna manono nu anni yari eksakto nga kinagi da, manono ku lagapa i natageno ku tatun nga tiempo. Gitta na kinagi ni Jehova niakan, ‘Ari ka nga magitadday.’”—Isa. 41:10, 13.
Magayayya i brother nga mangirollu ta paggigiammu nga makaginna ta makapagaram ira nga komento na nagatende ta study anna i komento na mataki nga brother gukaban na video call (Innan i parapo 6)
6. Anni ira i makua na tanakuan tapenu moffunan danuri magawag ta kongregasion? (Innan i letratu.)
6 I makua na tanakuan. Mepangngo laman gapa nga ekspektattam tu elder ira i mangirollu ta panguffun. Ngem kayà ni Jehova nga sittam ngamin i mamagaram anna manguffun ta tanakuan. (Gal. 6:10) Maski nu baddi laman i makua tam tapenu uffunan i tadday nga mataki, dakal ngana nga pamasikan yatun para ta nisa. Puede nga mangiyawa tu card onu drowing i tadday nga abbing tapenu mapagaram i tadday nga brother. Puede gapa nga tadday nga kabataan i medog onu mamalengke para ta tadday nga bako nga sister. Awayya na kari nga iyangayattam i tadday nga mataki tu nalutu nga makan ta baleda? Siempre, nu egga i mawwara nga taki, kawagan na ngamin ta kongregasion i pamagaram. Makasta nu kabalin na study, ari tam labbi insigida nga manaw ta Kingdom Hall onu mal-leave ta video call tapenu makistoria ittam labbi ta wawwaragi. Maski i elder ira, kawagadda gapa i pamagaram. Egga i karuan nga wawwaragi nga mangi-send tu thank you card ta elder ira nga mas nabbalin tu busy megafu ta egga i mawwara nga taki. Mammakapia ittam ngamin nu kuattam i parte tam nga ‘makkapasa-pasikan ta nono anna makka-uffu-uffun’!—1 Tes. 5:11.
DUFFUNAN I TANAKUAN NU EGGA I KALAMIDAD
7. Ngatta mariga nu egga i mesimmu nga kalamidad?
7 Awayya na tu gaggavva nga manguli i pattolay na tadday megafu ta kalamidad. Mawawan na karuan i pakkukua da, i baleda, onu matayan paga lagu ira. Mesimmu gapa i kunnatun ira nga trahedia ta wawwaragi tam. Anni gafu i makua tam tapenu makoffun?
8. Anni i makua na elder ira anna na ulu ira na familia nige paga nga egga i mesimmu nga kalamidad?
8 I makua na elder ira. Sikamu nga elder, uffunan nu i wawwaragi tapenu nakaprepara ira nige paga nga egga i mesimmu tu kalamidad. Siguraduan nu nga ammu na ngamin ta kongregasion nu anni ira i kuadda tapenu safe ira anna nu kunnasi da nga makontak i elder ira. Kunnaw i kagian ni Margaret nga nakagi ta nappasa nga artikulo: “Ta lokal nga kawagan ta study mi, niperaddam na elder mi ira nga ari paga nga nabalin i tiempo na wildfire ta diammi. Kinagi da nga nu kagian na ofisiales nga magevacuate kami onu nu delikadu ngana i situasion, mawag tu insigida kami nga manaw.” Sassakto yatun nga parte ta study megafu ta lima nga ligguan laman kabalin natun, egga i nesimmu nga kuruga delikadu nga wildfire. Ta family worship, awayya nga ikagi na ulu ira na familia nu anni i mawag nga kuan na kada miembro na familia da. Nu nakaprepara kamu anna i ána nu, magga mas kalmadu kamu saw nu egga i mesimmu nga kalamidad.
9. Kunnasi nga makka-uffu-uffun i elder ira nige anna kabalin na kalamidad?
9 Nu sikaw i overseer na grupo nu, ariammu ngana innaggan nga egga paga i mesimmu nga kalamidad nige mu nga siguraduan tu egga nikaw i fustu nga cellphone number anna adres na ngamin ta grupom. Ilistam yatun tapus kanayummu nakuan nga i-update tapenu sonu egga i mesimmu nga kalamidad, mangngayammu onu makontak mu i kada wagi tapenu mammuammu i pakawagan na. Insigida nga ipakannammum i pakawagadda ta coordinator na baggi na elder ira. Tapus yayya gapa saw i mangireport ta circuit overseer. Meyawa i kapianan nga uffun megafu ta kooperasion na ngamin. Angngarigan na, kabalin na wildfire, 36 nga oras nga ari nga nakkatrug i circuit overseer da Margaret. Busy gare yayya nga imonitor i pakkontak anna pangasikasu na elder ira ta pakawagan na 450 nga wawwaragi nga fersadu nga pinanawadda i gibbalayadda. (2 Cor. 11:27) Megafu tatun, egga i naddianan ngamin danatun nga wawwaragi.
10. Ngatta importante nga mash-shepherding i elder ira? (Juan 21:15)
10 Responsibilidad na elder ira nga uffunan ta espiritual anna emosional i wawwaragi. (1 Ped. 5:2) Nu maddaggun i kalamidad, mawag labbi nga siguraduan na elder ira nga safe i ngamin nga wawwaragi anna egga i kanadda, passinnun, anna paddianan. Ngem ta pappasa na piga nga vulan, magga kawagan danatun nga wawwaragi i pangi-shepherding ta nira tapenu moffunan ira ta espiritual anna emosional. (Bibbigan i Juan 21:15.) “Mappasa labbi i tiempo nige nga maka-recover i tadday,” kagian ni Harold nga miembro na tadday nga Branch Committee anna nakoffun ngana ta aru nga wawwaragi nga nafektan na kalamidad. “Sisinu nga manoli ta normal i pattoleda, ngem awayya na nga manonono da lagapa i natay nga iddeddukadda, nawawan nga pakkukua da, onu yari delikadu ira nga situasion nga maggi nipatayadda. Baka fermi i daddam da kada manono da i kunnatun ira. Ari na kayà kagian nga makafi i pangurug da. Gagangay laman nga panageno yatun.”
11. Anni ira i posible nga kawagan na familia ira?
11 Ipafutu na elder ira i tabarang nga ‘makipaddaraddam ta maraddam.’ (Roma 12:15) Mawag nga ipasiguradu na elder ira tari ira ta biktima na kalamidad nga ayatan lagapa ira ni Jehova anna na wawwaragi. Uffunan gapa nakuan na elder ira i familia ira tapenu metulu-tuloy da i rutina da ta espiritual, nelagum ngana i pakimallo, paggigiammu, pakistudy, anna pallayyagayya. Puede gapa nga pagaramman na elder ira i mappagana nga uffunan i ána da nga maffokus ta ganna-gannug nga ari nga madaral na maski anni nga kalamidad. Sikamu nga mappagana, iperaddam nu ta ána nu nga maski anni mesimmu, Kofudda lagapa si Jehova anna kanayun na ira nga uffunan. Ipasiguradu nu gapa ta ána nu nga megafu ta wawwaragi, gitta na kanayun nga egga i familia da ta interu mundo nga sigga-paran nga manguffun ta nira.—1 Ped. 2:17.
Makoffukka kari nu egga i nesimmu nga kalamidad ta dian nu? (Innan i parapo 12)e
12. Anni i makua na tanakuan tapenu makoffun ta disaster relief? (Innan i letratu.)
12 I makua na tanakuan. Nu egga i nesimmu nga kalamidad aranni ta dian nu, makkiavu ka ta elder ira nu kunnasi ka nga makoffun. Baka awayyam nga paddianan labbi ta balenu danuri fersadu nga pinanawadda i baleda onu danuri volunteer ta disaster relief. Awayya na gapa nga mangitulug ka tu makan anna suplay ira ta wawwaragi nga makawag. Ngem nu arayyu ta dian nu i nesimmu nga kalamidad, makoffukka lagapa. Kunnasi? Ipakimallo mu danuri nafektan. (2 Cor. 1:8-11) Makoffukka ta relief work gukaban na paddona ta worldwide work. (2 Cor. 8:2-5) Nu posible nikaw i makangay tari ta dian mismu na nafektan na kalamidad, makkiavu ka ta elder ira nu kunnasi ka nga makapav-volunteer. Tapus nu tadday ka saw ta magalan nga mav-volunteer, magga ma-training ka tapenu meyusa ka saw ta lugar anna tiempo nga pinakakawagan i uffummu.
DUFFUNAN I WAWWARAGI TAPENU MAATTAMMADDA I PAMEPPERSIGI
13. Anni ira i problema na wawwaragi tam nga maddian ta lugar ira nga ne-ban i trabahu tam?
13 Megafu ta pameppersigi, mas mariga i pattolay na wawwaragi tam ta lugar ira nga ne-ban i trabahu tam. Ngatta? Mamroblema gare lagapa ira ta kuartu, mattaki ira, anna matayan. Ngem megafu ta ban, baka ari ira nga personal nga mangngayan na elder ira onu ariadda ira makontak tapenu pagaramman ira. Kunnatun i situasion na elder nga si Andrei nga nakagi ta nappasa nga artikulo. Tadday nga sister ta field service group na i mamroblema ta kuartu. Tapus nadisgrasia yatun nga sister yatutta mawag na i aru nga operasion. Ari gapa ngana yayya makatrabahu. Ngem maski nu egga i ban anna pandemic, kingngua na wawwaragi i adde na mawayya da tapenu manguffun. Siguradu nga nasingan ni Jehova i mesissimmu.
14. Kunnasi nga mepasingan na elder ira nga mattalo ira kani Jehova?
14 I makua na elder ira. Nakimallo si Andrei anna kingngua na i mawayya na. Kunnasi nga sinabbag ni Jehova i pakimallo na? Pinaguyu ni Jehova i wawwaragi nga mas egga ta posision nga manguffun. Nitulug na karuan i sister ta check-up na ira. Nangiyawa gapa i karuan tu kuartu. Pinaguyu ira ni Jehova nga kuan i adde na mawayya da anna binendisionan na i pakka-uffu-uffudda. (Heb. 13:16) Sikamu nga elder ira, nu egga i restriksion na trabahu tam ta dian nu, italo nu ta tanakuan i gannug ira nga ari tu posible nga sikamu i magangngua. (Jer. 36:5, 6) Pinaka-importante ta ngamin, mattalo kamu kani Jehova. Uffunan nakamu nga meyawa i ngamin nga pakawagan na wawwaragi.
15. Kunnasi tam nga mapattalupaddian i pattaradday tam bilang mawwaragi nu egga i pameppersigi?
15 I makua na tanakuan. Nu mesimmu i pangi-ban, baka mawag nga maggarammammung ittam na wawwaragi ta baraddi laman nga grupo. Sangawe gafu pagalaman, importante ngana nga pattalupaddianattam i memammo nga pakkaravulu tam. Si Satanas i labanattam, ari tu i wawwaragi tam. Palampasammu i nakkamalian ira na wagim, onu insigida nga solban i ari ira nga pakkarantindian. (Prov. 19:11; Efe. 4:26) Sikaw nakuan i magollu nga manguffun ta tanakuan. (Tito 3:14) Megafu ta nakka-uffu-uffun i wawwaragi ta service group na sister nga magawag, mas naddukko ira nga gitta na makkakafamilia.—Sal. 133:1.
16. Base ta Colosas 4:3, 18, kunnasi tam nga moffunan i mapeppersigi nga wawwaragi tam?
16 Rinivi-rivu nga wawwaragi tam i massesserbi lagapa kani Jehova maski nu egga ira i restriksion na gobiernu ta diadda. Nefuku i karuan ta nira megafu ta pangurug da. Ipakimallo tam nakuan ira anna i kafamilia da. Maski gapa nu posible nga maaresto i wawwaragi tam, uuffunadda lagapa ta espiritual anna pisikal danuri agga-fuku nga kapangngurug tam anna idefensa da ira ta korte.c Isipo tam nakuan gapa danatun nga wawwaragi ta pakimallo tam. (Bibbigan i Colosas 4:3, 18.) Ariammu vuluvuga tagibadditan i makua na pakimallo mu ira!—2 Tes. 3:1, 2; 1 Tim. 2:1, 2.
Kunnasim nga meprepara i familiam sangawe para ta pameppersigi? (Innan i parapo 17)
17. Kunnasi ka nga makapapprepara sangawe para ta pameppersigi?
17 Sangawe pagalaman, awayya nu ngana na familiam i mapprepara para ta pameppersigi. (King. 14:22) Ariammu nakuan agga-nono i ngamin nga marake nga posible nga mesimmu. Pasikannammu lallagu i relasiommu kani Jehova anna uffunammu i ána mu nga kuan gapa i kunnatun. Nu egga ira i tiempo nga mavuru-vurukka, ikagim i ngamin nga vuru-vurummu ta Dios. (Sal. 62:7, 8) Pabbidan nu na familiam i ngamin nga rason nu ngatta makapattalo kamu kani Jehova.d Gitta balaman nu nakaprepara ka para ta kalamidad, makoffun i pappreparam ta pameppersigi. Magutu anna memammo saw i ána mu megafu ta sinudduammu ira nga mattalo kani Jehova.
18. Anni noka i maekspiriensa tam ta mappange?
18 Memammo i panageno tam megafu ta imammo na Dios. (Fil. 4:6, 7) Yatun i usu-usan ni Jehova tapenu ari ittam nga mavurung maski nu mafektan ittam na taka-taki, kalamidad, anna pameppersigi. Usu-usan na i minassakrifisio ira nga elder tapenu manangngal ta nittam. Iddan na gapa ittam ngamin tu chansa nga makka-uffu-uffun. Approbetchattam nakuan i memammo nga paddia-paddiattam sangawe tapenu makapapprepara ittam para ta mas grabe ira nga kapurueba ta mappange anna para ta “dakal nga ziga.” (Mat. 24:21, NW) Tatun nga tiempo, mawag nga pattalupaddianattam i imammo tam anna uffunattam i tanakuan nga kuan gapa i kunnatun. Ngem kabalin natun, awan ngana tu maski anni nga ziga nga mamavvurung ta nittam. Maekspiriensa tam ngana saw i nabayag ngana nga kayà ni Jehova para ta nittam—kurug nga imammo adde ta mannanayun.—Isa. 26:3, 4.
KANSION 109 Makka-aya-aya tu Napafutuan
a Usu-usan ni Jehova i matalo ira nga aripan na tapenu duffunan danuri mappasa-pasa ta ziga. Puede naka nga usan tapenu pagaramman i wawwaragim. Gigiammuattam nu kunnasi tam nga makoffun nu egga ira i makawag.
b Natalianan i karuan nga ngagan.
c Ari tu posible para ta branch office onu danuri egga ta world headquarters nga mangipatulug tu tura ira na wawwaragi para ta kapangngurug da nga agga-fuku.
d Innan i artikulo nga “Mapprepara Ka Ngana ta Panara-darum” ta Hulio 2019 nga isyu na Passifusifutan.
e DESKRIPSION NA LETRATU: Iyangayan na magatawa tu makan i tadday nga familia nga nagevacuate megafu ta kalamidad.