2 | “Kapasikan na Nono nga Maggafu ta Masanto nga Tura”

KAGIAN NA BIBLIA: “Ngamin i egga ta Masanto nga Tura ay netura tapenu matudduan ittam nga magiddanama gafu ta pappasa-pasensia anna kapasikan na nono nga maggafu ta Masanto nga Tura.”—ROMA 15:4.

I Kayà Na Kagian

Aru i mabibbig tam ta Biblia nga mamasikan ta nono tam tapenu malabanattam i negatibo ira nga manonono tam. Ituddu gapa na Biblia nga mapawan i anni laman nga mataki nga mataga-tageno tam.

Nu Kunnasi Yaw Makaduffun

Gagangay laman nga mavuru-vurung ittam sinaggi-mittan. Ngem danuri egga depression onu anxiety na, awayya na nga kadaggaw ira nga marigi-rigatan megafu ta mataga-tageno da. Kunnasi nga makaduffun i Biblia?

Aru nga positibo ira nga gannug i mabibbig tam ta Biblia nga awayya na nga manali ta negatibo ira nga manonono tam. (Filipos 4:8) Awayya na nga pannuan i nono tam tu makapabannay ira nga gannug nga mamakkalma ta nittam tapenu makontrol tam i emosiottam.—Salmo 94:18, 19.
Maduffunan ittam na Biblia tapenu ariattam nga nonopan nga awan tu sesserbi tam.—Lucas 12:6, 7.
Aru nga teksto ta Biblia i mamakurug nga ari ittam nga magitetadday anna malippawa tu mapia na Dios nga Namaratu ta nittam i mataga-tageno tam.—Salmo 34:18; 1 Juan 3:19, 20.
Nipromesa na Biblia nga alsan na Dios ta memoria tam i mataki ira nga pappasa-pasattam. (Isaias 65:17; Nepakannammu 21:4) Nu marigi-rigatan ittam megafu ta kokkomforme i manonono anna mataga-tageno tam, yatun nga promesa i mamassikan ta nittam tapenu makapagattam ittam.

Naduffunan na Biblia si Jessica

I Efekto Niakan na Depression Ku

“Tagga ta 25 ngà, nan-nervous breakdown ngà tapus na-diagnose nga egga i severe depression ku. Gavva-gavva ku ngana laman nga manono i mataki ira nga nappasa-pasakku. Nipalippawa nio na doktor ira nga konektadu i depression ku ta negatibo ira nga nononopakku nga resulta na marake ira nga nappasa-pasakku. Fuera paga ta medisina nga tumu-tumakku, nappa-therapy ngà gapa tapenu malisiakku i mannono tu negatibo.”

Nu Kunnasi Nà Naduffunan na Biblia

“Turi ta grabe i depression ku, maka-ekspiriensa ngà tu panic attack, mavuru-vurung ngà, anna ari ngà makakatrug. Maggi kada gabi, napannu i nono ku tu gannug ira nga mamavvurung niakan. Nakagi ta Salmo 94:19 nga banna-bannayan anna pakalman ittam na Dios nu aru i kavuru-vurungan na nono tam. Yari tu nibiko ku ta pagiddakku i Biblià anna i notebook ku nga napannu tu makapagaram ira nga teksto. Nu ariakku makakatrug, mabbibbig ngà tu teksto ira ta Biblia tapenu i uvovug na Dios i mamanna-bannay ta nio.

“Pagaramman ittam na Biblia nga labanattam i ideya ira nga kontra ta nagigiammu tam meyannung ta Dios. Dati bi, abbattakku nga awan tu sesserbì anna awan tu magiddu nio. Ngem nagigiammù ta Biblia nga ugal balo danatun. I Dios ay minaggiddu anna minangngikallo nga Yama nga mangikavurung ta kada tadday ta nittam. Sisinu ku gabbalaman nga nakontrol i nono ku imbes tu so i kontrolan na. Pinarigakku i pagimamma na Dios ta niakan. Yatun i nakoffun ta nio tapenu kakku ngana nga mannono tu negatibo meyannung ta baggì.

“Excited ngà ngana ta tiempo nga kakku ngana saw manono i mataki ira nga nappasa-pasakku anna kakku na saw mannono tu negatibo. Ammù nga awan ngana saw tu mental ira nga taki ta mappange. Yatun i mamasikan nio nga magattattam adde sonu awan ngana tu depression ku.”