3 | Ehemplo ira ta Biblia

NADESKRIBA TA BIBLIA . . . I matalo ira nga lallaki anna babbay nga “kagitta tam gapa” tu panageno.—SANTIAGO 5:17.

I Kayà Na Kagian

Aru i mabibbig tam ta Biblia tu lallaki anna babbay nga nakatageno tu madduruma nga emosion. Nu mabibbig tam i ekspiriensa da, awayya na nga egga nira i kaparehu tam balo tu situasion.

Nu Kunnasi Yaw Makaduffun

Ikaya tam nga malippawa ittam na tanakuan, mas ngana nu marigi-rigatan ittam megafu ta mental nga taki tam. Ta pabbibbig tam tu Biblia, egga ira i karakter tatun nga awayya na nga kaparehu tam tu manonono anna mataga-tageno. Kayà na kagian, ari ittam nga magitetadday. Egga i kaparehu tam tu situasion nga narigatan gapa ta mataga-tageno da.

Netura ta Biblia i kinagi ira na totolay nga nakatageno nga awan tu awa-awayya da anna desperadu ngana ira. Natageno mu ngana kari nga ariammu ngana makaya? Natageno gapa yatun da Moises, Elias, anna David.—Numeros 11:14; 1 Patul Ira 19:4; Salmo 55:4.
Mabibbig tam ta Biblia i meyannung kani Hana. “Kiteddammo i panageno” na megafu ta awan tu ana na tapus kakkanchawan paga yayya na tadday paga nga atawa ni lakay na.—1 Samuel 1:6, 10.
Awayya na nga kaparehu tam gapa si Job nga nakagi ta Biblia. Masikan i pangurug na ta Dios, ngem yaw i nakagi na turi ta mataka-taki i mataga-tageno na: “Kala-kalussaw ku i pattolè; ariakku ngana kayà i mattolay.”—Job 7:16.

Nu ammuattam i kiningngua da tapenu malisiadda gabbalaman i pannono tu negatibo, awayya tam gapa nga marubang i mariga nga situasiottam.

Naduffunan na Biblia si Kevin

I Efekto Niakan na Bipolar Disorder Ku

“Tagga ta aranni ngà ngana ma-50, na-diagnose nga egga i bipolar disorder ku. Egga ira i tiempo nga gitta na kayang-kayà i ngamin nga problemà. Ngem nu mittan, gitta na manaki ku ngana i mattolay.”

Nu Kunnasi Nà Naduffunan na Biblia

“Nakagigiammu ngà ta nesimmu kani apostol Pedro. Egga ira i nakkamalian na, yari tu natageno na nga awan ngana tu sesserbi na. Ngem imbes tu agga-nono na yatun, nevulu-vulu lapa yayya ta kokkofun na nga mangikavurung ta nisa. Kada makkubra i bipolar disorder ku, puru ngana laman i pakkamaliakku i manonono ku adde ta matageno ku nga awan tu sesserbì. Pinarigakku si Pedro—ariakku inarayyuan i kokkofukku nga manunnuffun niakan tapenu massikan i nono ku.

“Tadday paga ta namassikan ta nono ku i ekspiriensa ni Patul David. Narigi-rigatan bi yayya gafu ta situasion na anna ta nakaliwatan na ira. Parehas kami. Nu mittan, makangngua onu makekagi ngà gapa tu gannug ira nga pabbabawyakku gabbalaman. Nabannayan ngà ta kinagi ni David ta Salmo 51. Ta versikulo 3, kinagi ni David: ‘Anugutak-ku i kingnguà ira nga katagarulian, agga-nono ku anna ariak-ku nga kattaman.’ Kunnatun mismu i mataga-tageno ku nu madepre-depress ngà ta kitazziga i mannono tu positibo meyannung ta baggì. Ngem parehas kami ni David ta kinagi na ta versikulo 10: ‘Paratuam-mu niakan, O Dios, i marenu nga futu, iddam-mà ta uray nga mekatalo anna natalibagu.’ Kunnatun gapa i ipakimemallo ku ta Dios tapenu mabbalin tu positibo i paningakku ta baggì. Nabannayan ngà gapa ta nakagi ta versikulo 17. Kunna: ‘O Dios, . . . ariam-mu nga uyawan i matulù anna minabbabawi nga futu.’ Nipasiguradu nio na teksto nga iddeddukan nà na Dios.

“Nu agga-nono ku i ehemplo ira ta Biblia anna i iyayawa na Dios ta nio ta maddaggun, massikan i pagiddanamà ta mappange. Nabbalin tu kuru-kurug niakan i promesa ira ta Biblia. Danatun i namassikan ta nono ku tapenu ari ngà sumuku.”