4 | Praktikal ira nga Tabarang ta Biblia

I Kayà Na Kagian

Maski nu ari tu libru ta medisina i Biblia, mangiyawa yaw tu praktikal ira nga tabarang nga pammakapianattam. Makaduffun danatun nga tabarang ta totolay nga egga i mental nga taki da. Innattam i karuan nga angngarigan.

Nu Kunnasi Yaw Makaduffun

“Ari nga magawag ta manguru danuri i mapia i gawa-gawayyad-da nu ari danuri makkataki laman.”—MATEO 9:12.

Kagian na Biblia nga nu mataki ittam, baka mawag tam i mappadoktor. Naduffunan i aru nga totolay gafu ta nammuadda i fustu nga informasion meyannung ta mental nga taki da anna gafu ta nappadoktor ira.

“I kasossonna na kalla-kallo ay egga i mapia nga iyawa na.”—1 TIMOTEO 4:8.

Nu tangngallammu i baggim, dakal i efekto na ta mental nga gawa-gawayyammu. Angngarigan na, magehersisio ka, kumakka tu masustansia, anna kumpleto nakuan i katrug mu.

“I magayayya nga futu ay makasta nga uru, ngem i nadammakkan nga espiritu ay makofu ta sikan na tadday.”—PROVERBIO 17:22.

Makaduffun i pabbibbig tu makapagaram ira nga teksto ta Biblia anna i pas-set anna paggawa tu goal ira tapenu mabbalin ittam tu magayayya. Nu positibo ka anna nu inanamammu nga makkasta gabbalaman i gawa-gawayyammu, mabbalikka tu balanse ta pangarubammu ta mental nga taki mu.

“I ka-uto ay egga ta mapakalinno ira.”—PROVERBIO 11:2.

Awayya na nga marigatakka nga kuan i ngangamin, yayya nga mappaduffukka ta tanakuan. Kakayà daka nga duffunan na kokkofun anna kafamiliam, ngem baka kadda ammu nu kunnasi. Ikagim ta nira nu anni i mawag mu. Ariammu nakuan ekspektan nga makua da i ngangamin. Kanayukka lallagu nga mappabalo ta anni laman nga meduffudda.

Nu Kunnasi nga Nakaduffun i Praktikal ira nga Tabarang ta Biblia

“Ammù nga ari tu normal i mataga-tageno ku, yayya nga nappadoktor ngà. Na-diagnose na doktor i taki ku. Megafu tatun, nalippawa ku nu anni talaga i taki ku anna nammuakku nu anni ira i puedè nga kuan tapenu maimmugurakku i gawa-gawayyakku.”—Nicole,a egga i bipolar disorder na.

“Nakaduffun ta nio i regular nga pabbibbig mi tu Biblia ni bako ku tapenu mapannu tu positibo anna makapatuyag ira nga gannug i nono ku ta gafu paga laman na aggaw. Tapus, ta aggaw ira nga marigi-rigatan ngà, egga i sakto nga teksto nga makatukkal ta futù.”—Peter, egga i depression na.

“Kakku makagi-kagi ta tanakuan i taki ku ta mappasirang ngà. Ngem egga i close friend ku nga masippo nga naggigginna ta nio anna natindian na i mataga-tageno ku. Zinuffunan nà tapenu makkasta i panageno ku anna tapenu kakku manono nga magitetadday ngà.”—Ji-yoo, egga i eating disorder na.

“Naduffunan nà na Biblia tapenu mabbaling tu balanse anna rasonable ta pattrabahu anna pagibannag. I tabarang na ira i nakaduffun nio tapenu marubakku i taki ku nga mamazziga nio.”—Timothy, egga i obsessive-compulsive disorder na.