Makayam nga Addetan i Espiritual ira nga Goal Mu

1. Ta anni nga marigatan i aru ta nittam?

EGGA ngana kari i nanono mu tu espiritual nga goal, ngem narigatakka nga addetan yatun?b Kunnatun gapa i karuan. Angngarigan na, kayà ni Philip nga mapakasta i pakimallo na anna ikaya na nga mamikkaru na nga kuan yatun. Ngem marigatan yayya nga magaleg tu tiempo para tatun. Goal gapa ni Erika nga mabi nga duttal ta miting para ta field service. Ngem kanayun lagapa yayya nga ma-late. Namippiga nga pinurueban ni Tomáš nga bibbigan i interu Biblia. Kinagi na: “Ari ku ma-enjoy i pabbibbig tu Biblia. Namittallù ngana nga pinurueban yatun. Ngem kada kua, makadde ngà laman ta Levitico tapus magimmang ngà ngana.”

2. Ngatta ari nakuan makkafi i nono tam nu ari tam paga nga nadde i espiritual nga goal tam?

² Nu egga i goal mu ngem ari mu paga nga nadde, ari nakuan nga makkafi i nono mu. Kawagan gare i tiempo anna pappursigi maski ta simple ira nga goal. Nu ikagumammu lagapa nga addetan i goal mu, ipasingan natun nga tagibalorammu i relasiommu kani Jehova anna ikaya mu nga iyawa ta nisa i kapianan. Tagibaloran ni Jehova i kukukuammu. Siempre, ari na ekspektan nga kuammu i gannug nga ari mu mabba nga makaya. (Sal. 103:14; Mik. 6:8) Nu mannono ka gafu tu goal, ibagay mu yatun ta situasiommu anna yari i makayam. Anni gafu i kuammu tapenu madde mu i goal mu? Pabbiridattam i karuan nga suhestion.

IMPORTANTE I MASIKAN NGA PAKKARAGA

3. Ngatta importante i masikan nga pakkaraga?

³ Importante i masikan nga pakkaraga tapenu madde tam i espiritual ira nga goal tam. Nu masikan i pakkaraga tam onu magaganassan ittam nga addetan i goal tam ira, mappursigi ittam. Awayya tam nga ikumpara i masikan nga pakkaraga ta paddag nga mangitubba ta sailboat mappange ta angngayan na. Nu tulu-tuloy i paddag, siguradu nga madde na mabbarangay i angngayan na. Nu masikan gapa i paddag, baka mas mabi yayya nga makadde. Kunnatun gapa nu mas masikan i pakkaraga tam, mas dakal gapa i chansa nga madde tam i goal tam ira. “Nu masikan i pakkaraga mu, mas nga mappursigi ka,” kagian ni Brother David nga taga-El Salvador. “Mas mappursigi ka nga ari mappefugag ta maski anni tapenu madde mu i goal mu.” Anni gafu i kuammu tapenu mas massikan i pakkaraga mu?

4. Anni i awayya tam nga ipakimallo? (Filipos 2:13) (Innan gapa i letratu.)

⁴ Makimallo nga mas massikan i pakkaraga mu. Mapasikan ni Jehova i pakkaraga mu nga addetan i goal mu gukaban na espiritu na. (Bibbigan i Filipos 2:13.) Nu mittan, mannono ittam tu goal megafu ta ammu tam nga mawag tu kuattam yatun. Makasta yatun. Ngem baka awan talaga tu pakkaraga tam nga addetan yatun. Kunnatun si Sister Norina nga taga-Uganda. Goal na nga mapeggan tu Bible study. Ngem awan kuruga tu pakkaraga na nga addetan yatun megafu ta abbo na tu ari yayya nga malalaki nga manuddu. Anni i nakoffun ta nisa? Istorian na: “Kadaggaw ku nga ipakimallo kani Jehova nga pasikannan na nakuan i pakkaraga ku nga mapeggan tu Bible study. Tapus pinakastà gapa i abilidad ku nga manuddu. Pappasa na piga vulan, napansikku nga mas nagganas ngà. Tatun gabbalaman nga dagun, nakapegafu ngà tu dua nga Bible study.”

5. Anni i awayya tam nga pannonopan tu mapia tapenu mas massikan i pakkaraga tam?

⁵ Pannonopan tu mapia i kingngua ira ni Jehova para ta niko. (Sal. 143:5) Pinannonopan tu mapia ni apostol Pablo i allo ni Jehova ta nisa. Yatun i namaguyu ta nisa tapenu mallallappo para kani Jehova. (1 Cor. 15:9, 10; 1 Tim. 1:12-14) Nu mas gapa nga pannonopammu tu mapia i kingngua ira ni Jehova para ta niko, mas magganas ka nga addetan i goal mu ira. (Sal. 116:12) Inistoria na tadday nga sister nga taga-Honduras i nakoffun ta nisa tapenu madde na i goal na nga marregular payunir. Kunna: “Pinannonopakku tu mapia nu kunnasi nà ka-iddu ni Jehova. Niyaranni nà ta totolena. Ikavurungan nà anna protektan nà. Megafu tatun nga pannono ku tu mapia, mas iniddu ku yayya anna mas nallallappo ngà.”

6. Anni paga i makoffun ta nittam tapenu mas nga addetattam i goal tam?

⁶ Maffokus ta bendision ira nu madde mu i goal mu. Inistoria ni Erika nga nakagi ta gafu i nakoffun ta nisa tapenu ari ngana yayya nga ma-late. Kunna: “Napansin ku nga aru i ariakku nga makua nu ma-late ngà ta meeting place. Ngem nu mabi ngà nga duttal, makumustà paga i wawwaragi anna egga i tiempò para ta nira. Egga gapa ira i maginnà nga praktikal nga suhestion tapenu ma-enjoy ku anna mapakastà paga i pallayyagayyà.” Naffokus si Erika ta pammakapian na ira nu ari yayya nga ma-late. Megafu tatun, nadde na i goal na. Anni ira nga bendision i awayya na nga paffokusammu? Nu goal mu nga mas paga nga bibbigan i Biblia onu pakastan i pakimallo mu, pannonopammu nakuan nu kunnasi natun nga mapaladda i relasiommu kani Jehova. (Sal. 145:18, 19) Nu goal mu gapa nga ipasingan i tadday nga Cristiano nga kualidad, maffokus ka nu kunnasi natun nga mapakasta i relasiommu ta tanakuan. (Col. 3:14) Puruebammu nga ilista i ngamin nga rason nu ngatta ikaya mu nga addetan i goal mu. Kanayummu nakuan nga innan yatun nga listam. Kinagi ni Tomáš nga nakagi ta gafu: “Nu mas aru i rasokku nga addetan i tadday nga goal, mas mappursigi ngà tapenu madde ku yatun.”

7. Anni i nakoffun kani Julio anna ta atawa na tapenu madde da i goal da?

⁷ Makikavulu ta mamagaram niko nga addetan i goal mu. (Prov. 13:20) Inistoria ni Julio nu anni i nakoffun ta nira na atawa na tapenu madde da i goal da nga magali nu sitaw mas dakal i pakawagan. Kunna: “Nakikkofukkami tari ira ta mamagaram nikami nga addetan i goal mi anna nipakibbida mi ta nira i meyannung tatun. Nadde ngana gare na aru ta nira i goal ira nga ikaya mi. Yayya nga makeyawa ira tu makoffun ira nga suhestion. Iyavu gapa na kokkofummi nu kumusta ngana i goal mi anna pinagaram dakami turi ta kawagammi yatun.”

NU AWAN KURUGA TU GANAS TAM

8. Anni i awayya na nga mesimmu nu addetattam laman i goal tam ta tiempo nga magaganassan ittam? (Innan gapa i letratu.)

⁸ Nu mittan, egga ira i aggaw nga awan tu gaganas tam. Ngem ikaya kari kagian natun nga ari tam ngana nga madde i goal tam? Ari. Nonopan yaw. Metubba na masikan nga paddag i barangay mappange ta angngayan na. Ngem manguloli i sikan na paddag tapus ta karuan nga aggaw, awan paga lagu tu pappaddag. Kayà kari kagian natun nga ari ngana maka-abante i mabbarangay? Ari gapa. Angngarigan na, egga i makina na karuan nga barangay. Paluga gapa ta karuan. Awayya nga usan na mabbarangay danatun tapenu maka-abante maffunta ta angngayan na. Mekumpara i paddag ta pakkaraga onu ganas tam. Awayya na nga egga ira i aggaw nga magaganas ittam, ngem ta karuan nga aggaw ari ittam nga maganassan. Nu addetattam laman gafu i goal tam ta tiempo nga magaganassan ittam, baka ari tam ngana vuluvuga madde yatun. Ngem nu kunnasi nga mangusa i mabbarangay tu karuan paga nga gannug tapenu makadde ta angngayan na maski nu awan kuruga tu paddag, awayya tam lagapa nga addetan i goal tam maski ta tiempo nga awan kuruga tu ganas tam. Maski nu mawag tam nga fersan i baggi tam, sulit mabba. Nige tam nga pabbiridan i puede tam ira nga kuan, tabbagattam labbi i tadday nga pakkiavu.

9. Marake kari nu fersattam i baggi tam nga addetan i tadday nga goal maski nu awan kuruga tu ganas tam? Ipakanawag.

⁹ Ikaya ni Jehova nga magayayya anna napafutuan ittam nga masserbi ta nisa. (Sal. 100:2; 2 Cor. 9:7) Mawag paga kari gafu nga addetattam i goal tam nu awan mabba kuruga tu ganas tam? Kunnatun si apostol Pablo. Kinagi na: “Penamak-ku i baggì nga magattam anna gaggaddak-ku ta mapia i nono ku.” (1 Cor. 9:25-27) Finersa ni Pablo i baggi na nga kuan i fustu maski nu awan kuruga tu pakkaraga na nga kuan yatun. Magayayya kari si Jehova ta kingngua ni Pablo? Siempre! Binendisionan yayya ni Jehova ta pappursigi na.—2 Tim. 4:7, 8.

10. Anni ira i benefisio na nu addetattam lagapa i goal tam maski nu awan kuruga tu ganas tam?

¹⁰ Magayayya gapa si Jehova nu masingan na nga addetattam lagapa i goal tam maski nu awan mabba kuruga tu ganas tam. Maski nu ammu na nga ari tam kanayun nga ikaya i kukukuattam, magayayya lagapa yayya ta kuattam yatun megafu ta aya tam ta nisa. Nu kunnasi nga binendisionan ni Jehova si Pablo, bendisionan na gapa i pappursigi tam. (Sal. 126:5) Nu masingattam gapa i bendision ni Jehova, baka magganas ittam paga lagu. Kunnaw i kinagi ni Sister Lucyna nga taga-Poland: “Nu mittan matalakag ngà nga mallayyagayya, mas ngana nu nabannag ngà. Ngem kabalin na pallayyagayya, magayayya ngà. Talaga bendision yatun.” Innattam ngana gafu i makua tam nu awan kuruga tu ganas tam.

11. Kunnasi na ittam nga uffunan ni Jehova tapenu mafugaddattam i baggi tam?

¹¹ Ipakimallo nga mafugaddammu i baggim. I pangifugag ta baggi ay i abilidad nga makontrol i mataga-tageno anna i annangngua. Maruddu nga tumukoy yatun nga uvovug ta pangifugag ta baggi tam ta pangngua tu marake. Ngem kawagan gapa i pangifugag ta baggi tapenu makua tam i fustu, mas ngana nu mariga i kuattam onu awan kuruga tu ganas tam. Daddammattam nga aspeto na vunga na masanto nga espiritu i pangifugag ta baggi. Yatutta kiddawammu kani Jehova i masanto nga espiritu na tapenu moffunakka nga mas mafugaddammu i baggim. (Luc. 11:13; Gal. 5:22, 23) Kayà ni David nga nakagi ta gafu nga mas mabbalin tu regular i personal study na. Inistoria na nu kunnasi nga nakoffun ta nisa i pakimallo. Kinagi na: “Mappoffun ngà kani Jehova tapenu mafugaddakku i baggì. Ta uffun na, nakapegafu ngà tu makasta nga rutina ta personal study anna regular ku ngana nga makua yatun.”

12. Kunnasi nga makoffun i Eclesiastes 11:4 tapenu madde tam i espiritual ira nga goal tam?

¹² Ari nga innaggan i perfekto nga situasion. Taw nga mundo, ari vuluvuga nga duttal i perfekto nga situasion. Nu innaggattam gare yatun, baka ari tam ngana nga madde i goal tam. (Bibbigan i Eclesiastes 11:4.) Kinagi ni Brother Dayniel: “Awan tu perfekto nga situasion. Yayya nga ari tam ngana nga innaggan yatun. Basta mamegafu ittam ngana lapa.” Kunnaw gapa i kagian ni Brother Paul nga taga-Uganda nu ngatta ari ittam nakuan nga mattala-talattan: “Nu igafu tam ngana lapa nga addetan i goal tam maski nu mariga i paddia-paddian, iddattam tu rason si Jehova tapenu bendisionan na ittam.”—Mal. 3:10.

13. Ngatta makasta nga mamegafu ittam ta baraddi nga goal?

¹³ Mamegafu ta baraddi nga goal. Baka mariga i goal tam yari tu awan kuruga tu ganas tam nga addetan yatun. Nu kunnatun i goal mu, awayya na kari tu gadda-gadduammu yatun ta baraddi nga goal? Nu goal mu nga ipasingan i tadday nga kualidad, awayya na kari tu ipasingammu labbi yatun ta baraddi nga gannug? Nu goal mu gapa nga mabibbig i interu Biblia, awayya na kari tu mabbibbig ka labbi tu sinaggi-ababba? Marigatan si Tomáš nga nakagi ta gafu nga addetan i goal na nga bibbigan i Biblia ta tanga-ragun. Kinagi na: “Napansikku nga kuruga aru i planò nga bibbigan. Marigatan ngà nga balinan yatun. Yayya nga inulì yatun. Sangawe, pilippiga laman nga versikulo i bibbigakku ta kada aggaw tapus pannonopakku danatun tu mapia. Megafu tatun, ma-enjoy ku ngana i pabbibbig ku.” Gafu ta na-enjoy ni Tomáš i pabbibbig na, sisinu nga mas inammungan na i oras nga mabbibbig yayya. Turi kua, nabibbig na gabbalaman i interu nga Biblia.c

ARI NGA PAKKAFIAN I NONO MU NU EGGA IRA I MAKEFUGAG

14. Anni ira i awayya na tu makefugag ta nittam?

¹⁴ Kaddaraddam ta maski nu fermi nga magaganassan ittam onu disiplinadu ittam, baka egga lagapa ira i makefugag. Angngarigan na, awayya na tu egga ira i “ari ekspektan nga mesimmu” nga mangagaw ta tiempo nga kawagattam nakuan tapenu addetan i goal tam. (Ecl. 9:11) Baka egga gapa i luttuag tu problema nga mamakkafi ta nono tam anna makofu ta sikattam. (Prov. 24:10) Megafu gapa ta imperfekto ittam, awayya na tu magugal ittam. Yatutta mas mariga lallagu nga gawatan i goal tam. (Roma 7:23) Onu baka nabannag ittam laman. (Mat. 26:43) Anni gafu i makoffun ta nittam tapenu malampasattam i makefugag ira?

15. Nu egga i makefugag ta niko, kayà kari kagian natun nga magimmakka ngana? Ipakanawag. (Salmo 145:14)

¹⁵ Daddamman nga nu egga i makefugag ta paggawa ta goal mu, ari kayà kagian natun nga magimmakka ngana nga gawatan yatun. Kagian na Biblia nga awayya na tu mamippiga ittam nga mesiddukal gafu ta problema. Ngem manawag gapa i kagian natun nga awayya tam lagapa nga makabangun, ta uffun ni Jehova. (Bibbigan i Salmo 145:14.) Kunnaw i kagian ni Brother Philip nga nakagi ta gafu nu kunnasi na nga gukuran nu nadde na i goal na: “Ariakku nga maffokus ta nu mamippiga nga kakku nadde i goal ku. Lallagu, maffokus ngà nu mamippiga nga nikagumakku nga addetan uli yatun.” Kunnaw i kagian ni David nga nakagi ta nappasa nga parapo: “Nu egga ira i makefugag ta paggawa ku ta goal ku, ikagumakku nga nonopan tu ari nga makagurun ta nio danatun. Nu ari lagu, chansà danatun tapenu ipasingakku kani Jehova nu kunnasì yayya ka-iddu.” Wan, nu tulu-tuloy ka laman maski nu egga i makefugag, mapakurug mu kani Jehova nga kayà mu nga pagayayyatan yayya. Siguradu nga magayayya si Jehova nu masingi-singan naka nga ikakkagumammu lagapa nga addetan i goal mu!

16. Nu egga ira i makefugag ta nittam, anni i magigiammu tam tatun?

¹⁶ Nu egga i makefugag, innan i magigiammum tatun. Nonopammu nu ngatta nakefugag yatun ta niko anna iyavu mu ta baggim, ‘Egga kari i mawag nga uliakku tapenu ari uli mesimmu yatun?’ (Prov. 27:12) Ngem nu mittan, seniales i makefugag ira ta nittam nga baka ari tu realistiko i goal tam. Nu matageno mu nga kunnatun i goal mu, pannonopammu uli yatun tapenu masingammu nu rasonable lagapa para ta niko nga addetan yatun.d Ari mabba nga nonopan ni Jehova nga ari tu makasta i nattuppalammu gafu laman ta ari mu nadde i tadday nga goal nga imposible mabba talaga nga madde mu.—2 Cor. 8:12.

17. Ngatta ari tam nakuan nga kattaman i goal ira nga nadde tam ngana?

¹⁷ Ari mu kattaman i goal ira nga nadde mu ngana. Kagian na Biblia nga ‘i Dios ay matunung, yayya nga arian na nga kattaman i kingnguam.’ (Heb. 6:10) Maski gapa nakuan siko, ari mu nga kattaman yatun. Pannonopammu i goal ira nga nadde mu ngana. Awayya na tu kasali tatun i pangultiba tu madukko nga relasion kani Jehova, pakiyuvovug ta tanakuan meyannung ta nisa, onu pappa-baptize. Napprogreso ka ngana anna nadde mu i espiritual ira nga goal mu ta nappasa. Metulu-tuloy mu gafu lagapa i mapprogreso tapenu madde mu i goal mu sangawe.—Fil. 3:16.

18. Anni nakuan i kuattam habang ikakkagumattam nga addetan i goal tam? (Innan gapa i letratu.)

¹⁸ Magayayya i mabbarangay nu madde na i angngayan na. Ta uffun gapa ni Jehova, makayam nga addetan i goal mu. Ngem daddamman nga aru gapa nga mabbarangay i magayayya ta masingi-singadda ta pabbiahe da. Kunnatun gapa habang ikakkagumammu nga addetan i espiritual nga goal mu. Mabbalikka gapa nakuan tu magayayya habang masingi-singammu nga dudduffunan anna bebbendisionan naka ni Jehova adde ta madde mu i goal mu ira. (2 Cor. 4:7) Nu ari ka molang, mas aru noka i bendision nga alawatammu.—Gal. 6:9.