MAGIGIAMMU NGA ARTIKULO 8
KANSION 130 Mamakoma
Pamakoma ni Jehova—Kunnasim Maparigan?
“Mawag tu makkapaka-pakoma kamu ta kunna nipamakoma na Yafu nikamu.”—COL. 3:13.
I MAGIGIAMMU TAM
I kuattam ira tapenu mapakoma i nakataki ta nittam.
1-2. (a) Kanni ittam nga marigatan nga mamakoma? (b) Kunnasi nga nipasingan ni Denise nga namakoma yayya?
MARIGATAKKA kari nga mamakoma? Aru ta nittam i kunnatun, jebi ngana nu mataka-taki i kinagi onu kingngua na tanakuan ta nittam. Ngem egga ira i makua tam tapenu alsan i taki na nono tam anna mamakoma ittam. Kunnatun i naekspiriensa ni Sister Denisea nga nerumu-ruma i nipasingan na nga pamakoma. Tagga ta 2017, nat-tour ira na familia na ta bagu vuka nga World Headquarters na Saksi ira ni Jehova. Turi ta palabbe ngana ira, binangga ira na takay megafu ta nawawanan tu kontrol i driver natun. Nawanan tu malay si Denise tatun nga aksidente. Turi ta nakkamalay ngana yayya, nammuan na tu grabe i nesimmu ta ána na tapus natay i atawa na nga si Brian. Kunnaw i kagian ni Denise nu manono na yatun nga nesimmu, “Kitettaki yatun anna ari ku ammu nu anni i kuakku.” Turi kua, nammuan na nga aksidente laman i nesimmu. Nakafokus mabba i driver anna ari yayya nga nakenum onu naka-drugs. Yatutta mas nikiddona i imammo kani Jehova.
2 Nakasowan tu aksidente nga pamatay i driver nga namangga ta nira. Nu mapakurug nga nakaliwa yayya, puede yayya nga mefuku. Ngem kinagi na korte kani Denise nga nakadepende ta testimonia na i sentensia natun nga lalaki. Istorian ni Denise: “Mawag tu istoriakku uli i pinakagrabe ira nga nesimmu ta pattolè. Gitta na egga i navvuka ta bigi-bigag ku nga nadage ngana tapus vinuvvutadda tu asin yatun.” Piga ligguan laman i nappasa, nattestimonia si Denise ta korte anna inarubang na i tolay nga mataka-taki i kingngua na ta familia na. Anni i kinagi na? Nakimemallo si Denise ta hues nga ikallo na i lalaki.b Kabalin na nga nabbida, siminangi i hues. Kinagi na: “Ta 25 ragun nga pinattrabahù bilang hues, awan paga tu naginnà tu kunnaw tawe ta unag na korte. Awan paga tu kafamilia na biktima nga nakimemallo nga ikallo ku i suspek. Sangawe ngà pagalaman nakaginna tu testimonia nga mangipasingan tu aya anna pamakoma.”
3. Anni i nakaduffun kani Denise nga mamakoma?
3 Anni i nakaduffun kani Denise nga mamakoma? Pinannonopan na tu mapia i pamakoma ni Jehova. (Mik. 7:18) Nu appresiattam i pamakoma ni Jehova ta nittam, mabbalin ittam gapa tu minammakoma.
4. Anni i kayà ni Jehova nga kuattam? (Efeso 4:32)
4 Kayà ni Jehova nga pakomattam i tanakuan nga kunna pinamakoma na nittam. (Bibbigan i Efeso 4:32.) Ekspektan na nga pakomattam danuri nakataki ta nittam. (Sal. 86:5; Luc. 17:4) Gigiammuattam taw nga artikulo i tallu nga makoffun tapenu mabbalin ittam tu mas minammakoma.
ARI MU NGA BALEWALAAN I MATAGA-TAGENO MU
5. Segun ta Proverbio 12:18, anni i matageno tam nu egga i nakataki ta nittam?
5 Baka fermi nga matakitan ittam ta ikagi onu kuan na tanakuan ta nittam, jebi nu madukko nga kofuttam yayya onu kafamilia. (Sal. 55:12-14) Nu karuan, ta sobra nga taki na kingngua da nittam, gitta na naduddug ittam. (Bibbigan i Proverbio 12:18.) Baka balewalaattam onu kattam ngana laman nga nonopan nga natakitan ittam. Ngem nu kuattam yatun, gitta tam i naduddug tapus pagurayattam laman nga agga-duddug i dutchal ta nittam. Ari tam gafu nonopan nga mawawan lapa saw i taki na nono tam megafu laman ta balewalaattam yatun.
6. Anni i reaksiottam nu egga i nakataki ta nittam?
6 Nu egga i nakataki ta nittam, baka mallussaw ittam ta ollu. Kagian na Biblia nga baka fermi paga lagu i poray tam. Ngem tabarangngan ittam natun nga ari tam nakuan pabbayagan i poray tam. (Sal. 4:4; Efe. 4:26) Ngatta? Megafu ta afektan na mataga-tageno tam i kuattam. Maruddu nga ari tu makasta i efekto na poray. (Sant. 1:20) Tandaanammu: Awayya na nga makaporay ka ta gafu, ngem egga lapa ngana niko nu pabbayagammu.
Awayya na nga makaporay ka ta gafu, ngem egga lapa ngana niko nu pabbayagammu
7. Anni paga i matageno tam nu egga i nakataki ta nittam?
7 Nu egga i nakataki ta nittam, baka egga paga i karuan nga matageno tam. Kunnatun i naekspiriensa ni Sister Ann: “Ta kabbikku, pinanawan ni Papa si Mama, tapus inatawa na i katulung mi nga manangngaw nio. Gitta na napagurayan ngà. Kustu nakka-ana ngana ira, natageno ku tu egga ngana i nanali nio. Ziminakal ngà nga awan tu mangiddu ta nio.” Istorian gapa ni Sister Georgette i natageno na kustu namabay i atawa na: “Close kami ngana namegafu paga ta kabbimmi. Makkavulu kami paga lagu nga nappayunir! Fermi i taki na nio na kingngua na.” Kagian gapa ni Sister Naomi: “Kakku vuluvuga nanono nga illokuan nà na atawà. Yayya nga kustu inamin na nga nabayag ngana nga itatagu na i paggiraw tu pornograpia, gittà i nailloku.”
8. (a) Anni i karuan nga rason nu ngatta pakomattam nakuan i tanakuan? (b) Anni ira i pammakapiattam nu mamakoma ittam? (Innan i kahon nga “Kunnasi nu Ari Tam nga Makattaman i Kingngua na Tadday?”)
8 Ari tam kontroladu i kagian onu kuan na tanakuan nittam, ngem makontrol tam i reaksiottam. Anni i kakastan nga kuattam? Mamakoma. Ngatta? Megafu ta iddukattam si Jehova anna kayà na nga mabbalin ittam tu minammakoma. Nu mataki lagapa i nono tam anna manaki tam i mamakoma, baka ari tam nga mapannonopan i kuattam anna mafektan i gawa-gawayyattam. (Prov. 14:17, 29, 30) Kunnatun i naekspiriensa ni Sister Christine. Istorian na: “Nu mataki i nono ku, ari ngà kuruga gumala-galo. Komforme laman gapa i kana-kanakku. Kakku kuruga makakatrug anna mas marigatan ngà nga makontrol i emosiokku. Tapus afektan natun i pattratù ta atawà anna ta tanakuan.”
9. Ngatta alsattam nakuan i taki na nono tam?
9 Maski nu ari nga makkiddaw tu dispensa i nakataki ta nittam, egga lagapa i makua tam tapenu ari ittam kuruga matakitan. Kunnasi? Istorian ni Georgette nga nakagi ta ollu: “Nappasa labbi i piga tu tiempo, ngem nalsà balaman i taki na nono ku ta dati nga atawà. Gafu tatun, kuruga memammo i panageno ku.” Nu alsattam i taki na nono tam, ari ngana nga afektan natun i pattratu tam ta tanakuan. Iddiddattam gapa tu regalu i baggi tam. Puede tam ngana gare nga kattaman i nesimmu anna mabbalin tu magayayya uli. (Prov. 11:17) Ngem anni i kuammu nu marigatakka lagapa nga mamakoma?
I MAS MAKASTA NGA KUAMMU TA MATAGA-TAGENO MU
10. Ngatta pappasattam nakuan i tiempo adde ta mawawan i taki nga mataga-tageno tam? (Innan gapa i letratu ira.)
10 Anni i kuammu tapenu mawawan i taki nga mataga-tageno mu? Pappasammu labbi i tiempo. Nonopammu yaw: Kabalin nga mapporu i tadday nga tolay nga grabe i nika-aksidente na, mawag na i tiempo tapenu mammapia. Kunnatun gapa nu natakitan ittam. Kawagattam nga pappasan i tiempo adde ta mawawan yatun nige tam nga napafutuan nga mapakoma i tadday.—Ecl. 3:3; 1 Ped. 1:22.
Nu maaksidente ittam, mawag tam i tiempo tapenu mapporu anna mammapia; kunnatun gapa nu egga i nakataki ta nittam (Innan i parapo 10)
11. Kunnasi nga makoffun i pakimallo tapenu mabbalikka tu minammakoma?
11 Makimallo ka. Ikiddom kani Jehova nga uffunan naka nga mabbalin tu minammakoma.c Inistoria ni Ann nga nakagi ta nappasa nga parapo nu kunnasi nga nakoffun ta nisa i pakimallo. Kagian na: “Nikiddò kani Jehova nga pakoman na i kada tadday ta familia mi megafu ta nakkamaliammi ira. Tapus sinurakakku i yamà anna i bagu nga atawa na anna kinagì ta nira nga napakomà ngana ira.” Aminan ni Ann nga narigatan yayya nga kuan yatun. Ngem kagian na: “Paray nakuan ta mapaguyu i yamà anna i atawa na nga ammuan i mas aru paga meyannung kani Jehova megafu ta pangikagumakku nga parigan i pamakoma ni Jehova.”
12. Ngatta mattalo ittam nakuan kani Jehova imbes tu ta mataga-tageno tam? (Proverbio 3:5, 6)
12 Mattalo ka kani Jehova, ari tu ta mataga-tageno mu. (Bibbigan i Proverbio 3:5, 6.) Kanayun nga ammu ni Jehova i kapianan para ta nittam. (Isa. 55:8, 9) Arian na vuluvuga ipakua i gannug nga makataki ta nittam. Yayya nga nu pagaramman na ittam nga mamakoma, pammakapiattam yatun. (Sal. 40:4; Isa. 48:17, 18) Ngem nu i mataga-tageno tam laman i pattalakkattam, baka marigatan ittam nga mamakoma. (Prov. 14:12; Jer. 17:9) Kunnaw i istorian ni Naomi nga nakagi ta nappasa ira nga parapo: “Ta gafu na, manono ku nga fustu laman nga ari ku pakoman i atawà ta paggirona tu pornograpia. Maganassing ngà gare nga baka illokuan nà mana saw onu makattaman na nga sobra i taki na kingngua na niakan. Nirasokku gapa nga mantindian mabba ni Jehova yatun nga mataga-tageno ku. Ngem nanono ku nga maski nu mantindian ni Jehova i mataga-tageno ku, ari na kayà kagian nga umanugu yayya tatun. Ammu na i mataga-tageno ku anna ammu na gapa nga mappasa labbi i tiempo nige nga mawawan i taki na nono. Ngem kayà na gapa nga mamakoma ngà.”d
UFFUNAMMU I BAGGIM NGA MABBALIN TU POSITIBO
13. Segun ta Roma 12:18-21, anni i mawag tu kuattam?
13 Nu pakomattam i tolay nga grabe nga nakataki ta nittam, makalanno kari nga ari tam ngana laman nga pabbidan i nesimmu? Ari. Nu wagi i nakataki ta nittam, kayà tam nga metoli i memammo nga relasiottam ta nisa. (Mat. 5:23, 24) Imbes tu mangipappan ittam tu taki na nono, mas makasta nu ikallo anna pakomattam yayya. (Bibbigan i Roma 12:18-21; 1 Ped. 3:9) Kunnasi tam nga makua yatun?
14. Anni i mawag tu ikagumattam nga kuan, anna ngatta?
14 I makasta ira nga kualidad tam i inninnan ni Jehova. Mawag tu parigattam yayya. Innattam gapa nakuan i makasta ira nga ugali na nakataki ta nittam. (2 Cro. 16:9; Sal. 130:3) Nu marake nga ugali gare i ala-alegattam ta tadday nga tolay, magga yatun laman i masingattam. Ngem nu i makasta nga ugali da i ala-alegattam, mas mabi para nittam nga pakoman ira. Kunnaw i kinagi ni Brother Jarrod, “Mas mabi para niakan nga pakoman i tadday nga wagi nu nonopakku i napakaru nga makasta nga ugali na, imbes tu agga-nono ku i kingngua na nga nakataki nio.”
15. Ngatta awayya na nga makoffun nu ikagi tam ta tolay nga pinakoma tam ngana yayya?
15 I tadday nga importante nga kuattam ay ikagi ta tolay nga pinakoma tam ngana yayya. Ngatta? Kunnaw i istorian ni Naomi nga nakagi ta nappasa ira nga parapo: “Niyavu na atawà ta nio, ‘Pinakoma mà ngana kari?’ Turi ta puruebakku nga ikagi nga ‘Pinakoma taka ngana,’ kakku mekaga-kagi yatun. Tatukku nga nanono nga ari ku paga talaga nga napafutuan nga napakoma yayya. Ngem pappasa na tiempo, nakuà gabbalaman nga ikagi, ‘Pinakoma taka ngana.’ Nakalua i atawà gafu ta nabanna-bannayan yayya tatun. Kakku ekspektan nga maski sakan nalappawan i gakò. Namegafu tatun nga tiempo, sisinu nga nattalo ngà ngana uli ta atawà anna best friends kami mana uli.”
16. Anni i nagigiammum meyannung ta pamakoma?
16 Kayà ni Jehova nga mabbalin ittam tu minammakoma. (Col. 3:13) Baka marigatan ittam nga pakoman i tanakuan. Ngem makua tam yatun nu ari tam nga balewalaan i mataga-tageno tam anna kuattam i adde na mawayya tam tapenu mawawan i taki na nono tam. Tapus uffunattam i baggi tam tapenu mabbalin tu positibo.—Innan i kahon nga “I Tallu nga Kuammu Tapenu Makuam i Mamakoma.”
NONOPAN I PAMMAKAPIATTAM NU MAMAKOMA ITTAM
17. Kunnasi ittam mammakapia nu mamakoma ittam?
17 Aru i rasottam tapenu mamakoma. Ikonsidera i karuan tatun. Ollu, maparigattam anna mapagayayya tam i minaggallallo nga Yama tam nga si Jehova. (Luc. 6:36) Mekadua, mepasingattam i pappabalo tam ta pamakoma nittam ni Jehova. (Mat. 6:12) Mekatallu, mas makkasta i gawa-gawayyattam anna ari madaral i pakkorofuttam.
18-19. Anni i awayya na nga mesimmu nu mamakoma ittam?
18 Nu pakomattam i tanakuan, egga ira i ari ekspektan nga makasta nga resulta natun. Manono mu si Denise nga nakagi ta gafu naw nga artikulo? Arian na ammu nga yari lalaki nga aksidente nga nakabangga ta nira ay dati ngana nga plinano na i mappakamatay sonu mabalin i hearing. Ngem turi ta naginna na i testimonia ni Denise nga pakoman na ngana laman yayya, napaguyu yayya nga makipaggigiammu tu Biblia ta Saksi ira ni Jehova.
19 Awayya na tu matageno tam nga i tadday ta pinakamaziga nga mawag tam nga kuan ay mamakoma. Ngem yatun gapa i tadday ta pinakamamagayayya ta nittam. (Mat. 5:7) Mawag gafu nga kuattam i adde na mawayya tam nga parigan i pamakoma ni Jehova.
KANSION 125 Magayayya i Minaggallallo
a Natalian i karuan nga ngagan.
b Ta kunnatun nga situasion, personal nga desision lapa na kada Cristiano nu anni i kuan na.
c Innan ta jw.org i video ira na orihinal ira nga kansion nga “Magpatawaran Tayo,” “Magpatawad Mula sa Puso,” anna i “Ibalik ang Pagkakaibigan.”
d Maski nu liwa i paggiraw tu pornograpia anna makataki yatun, ari nga nebase-Biblia nga rason yatun tapenu idiborsio na inosente nga atawa i nakaliwa nga atawa na.