MAGIGIAMMU NGA ARTIKULO 15
KANSION 30 Yamà, Kofun, Anna Dios Ku
Mammakapia Ittam nu ‘Dios i Aranniattam’
“Niakan ay kuruga makapabbaw tu i Dios ay aranniak-ku.”—SAL. 73:28.
I MAGIGIAMMU TAM
Nu kunnasi ittam nga mas maddukko kani Jehova anna i pammakapiattam tatun.
1-2. (a) Anni ira i mawag tu kuattam tapenu mabbalin tu madukko nga kofuttam i tadday? (b) Anni i gigiammuattam taw nga artikulo?
EGGA kari i madukko nga kofummu? Anni i kingnguam tapenu mabbalin yayya tu kofummu? Awayya na tu egga i tiempo nga mavvulu kamu dua, nammuammu i problema na ira, anna i ikaya anna ikalussaw na ira. Nammuammu gapa i makasta ira nga ugali na nga kakayà mu nga parigan. Megafu tatun, iddeddu mu yatun nga kofummu.
2 Mawag i tiempo anna i pangikaguman tapenu mabbalin tu madukko nga kofummu i tadday. Kunnatun gapa i mawag tu kuattam tapenu mas maddukko ittam kani Jehova nga Dios. Gigiammuattam taw nga artikulo nu kunnasi ittam mas maddukko ta Dios tam anna i pammakapiattam tatun. Ammuattam tu ollu nu ngatta makasta nga makiddukko ittam ta kapianan nga Kofuttam nga si Jehova.
3. Ngatta pannonopattam nakuan tu mapia i pammakapiattam ira ta pakiddukko kani Jehova? Mangiyawa tu angngarigan.
3 Magga umanugu ka nga mammakapia ittam nu makiddukko ittam kani Jehova. Ngem nu pannonopattam tu mapia nu kunnasi ittam mismu mammakapia tatun, ari ittam magimmang nga makiddukko ta nisa. (Sal. 63:6-8) Angngarigan na, ammu tam nga mammakapia ittam nu kuman ittam tu masustansia, magexercise ittam, makkatrug tu mapia, anna minum tu aru nga danum. Ngem aru lagapa i ari nga mannono ta importansia danatun yatutta mapagurayadda i gawa-gawayyadda. Ngem nu mas pannonopattam i pammakapianattam nu immugurattam i gawa-gawayyattam, mas mapaguyu ittam nga itulu-tuloy nga kuan yatun. Awayya na gapa nga ammu tam nga mammakapia ittam nu makiddukko ittam kani Jehova. Ngem nu pannonopattam tu mapia i pammakapiattam tatun, mapaguyu ittam nga kanayun nga mas makiddukko ta Kofuttam.—Sal. 119:27-30.
4. Anni i kinagi na salmista ta Salmo 73:28?
4 Bibbigan i Salmo 73:28. I nattura ta Salmo 73 ay tadday nga Levita nga masserbi bilang musikeru ta templo ni Jehova. Posible nga aru dagun ngana nga matalo yayya nga maddayaw kani Jehova. Ngem natageno na nga mawag tu ipanono na ta baggi na anna ta tanakuan nga parehu nga pammakapiadda nu ‘i Dios ay aranniadda.’ Anni i karuan ta pammakapiattam tatun?
MAGAYAYYA ITTAM NU ‘ARANNIATTAM I DIOS’
5. (a) Ngatta magayayya ittam nu mas makiddukko ittam ta Dios? (b) Base ta Proverbio 2:6-16, kunnasi naka protektan anna maduffunan na sirib ni Jehova?
5 Mas magayayya ittam nu mas maddukko ittam kani Jehova. (Sal. 65:4) Aru i rasottam nu ngatta mas magayayya ittam. Angngarigan na, nu bibbigattam i kagian na ta nittam ta Biblia anna tuppalattam yayya, mabbalin ittam tu masirib. Protektan ittam natun nga sirib ta marake ira nga influwensia anna ta pangngua tu madammo ira nga liwa. (Bibbigan i Proverbio 2:6-16.) Yatutta kagian na Biblia: “Magayayya i tolay nga nakaleg tu sirib anna i tolay nga egga pakalippawa na.”—Prov. 3:13.
6. Ngatta nawawwan na salmista i pagayayya na?
6 Siempre, egga gapa i tiempo nga maraddam i kokkofun ni Jehova. Nawawwan na nattura ta Salmo 73 i pagayayya na turi ta namegafu yayya mannono tu negatibo nga gannug. Napporay anna namassil yayya megafu ta makasta i pattolay danuri na marake nga awan tu pakialam da ta Dios anna ta estandarte na ira. Ninono na paga lagu nga nu sinni paga i marake anna i parayag, ira paga i mas mariku anna mas makasta i gawa-gawayyadda, anna ari paga lagu nga mazziga-riga. (Sal. 73:3-7, 12) Namroblema i salmista adde ta nanono na nga awan tu kwenta na passerbi na kani Jehova. Megafu ta daddam na, nakagi na: “Awan kari tu kwenta na nipattolè ta marenu anna i kawan na katagaruliak-ku?”—Sal. 73:13.
7. Anni i makua tam nu maraddam ittam? (Innan gapa i letratu.)
7 Maski paga nu sobra i daddam na salmista, egga i kingngua na tapenu metunung i appana-panono na. ‘Simillung yayya ta templo’ na Dios nu sitaw nitunung ni Jehova i appana-panono na. (Sal. 73:17-19) Nu maraddam ittam, ammu yatun na kapianan nga Kofuttam. Awayya tam makimallo nisa anna kiddawan i uffun na tapenu ammu tam nu anni i kuattam. Mamasikan ta nittam i tabarang ta Uvovug na anna i pamagaram na wawwaragi tapenu tulu-tuloy ittam nga masserbi nisa maski nu maraddam ittam. Nu aru i kavurungan na nono tam, duffunan ittam ni Jehova nga mabbalin tu kalmadu.—Sal. 94:19.a
I Levita nga nattura ta Salmo 73 nga agga-taddag ta ‘templo’ na Dios (Innan i parapo 7)
MAKAPAGAYAYYA I PATTOLAY ANNA EGGA I IDDANAMA NU ‘ARANNIATTAM I DIOS’
8. Anni paga i pammakapiattam nu makiddukko ittam ta Dios?
8 Egga paga i dua nga pammakapiattam nu makiddukko ittam ta Dios. Ollu, makapagayayya i pattoletam. Mekadua, egga i makasta nga iddanama tam ta mappange. (Jer. 29:11) Gigiammuattam tu mapia yatun ira nga pammakapiattam.
9. Ngatta magayayya i pattolay tam nu makiddukko ittam ta Dios?
9 Makapagayayya nittam i pakiddukko ta Dios. Nonopan danuri na ari mangurug ta Dios nga awan tu kwenta na pattolay anna duttal saw i tiempo nga matay ittam ngamin. Ngem ta paggigiammu tam ta Biblia, nakumbinsi ittam nga ‘egga i Dios ay tu bala-balattan na danuri magaleg sa.’ (Heb. 11:6) Naparatu ittam nga mawag tu passerbiattam si Jehova. Yatutta mas magayayya ittam nu passerbiattam yayya.—Deut. 10:12, 13.
10. Base ta Salmo 37:29, anni i iddanama danuri na mattalo kani Jehova?
10 Aru nga totolay i awan tu kurug nga iddanama da ta mappange. Mattrabahu ira, makitawa, makka-ana, anna mapprepara ira para ta retirement da. Awan i Dios ta plano da. Ngem danuri masserbi kani Jehova ay magiddanama nisa. (Sal. 25:3-5; 1 Tim. 6:17) Mattalo ittam ta Dios nga nakiddukkotattam anna ta promesa na. Nelagum ta iddanama tam ta mappange i paddayaw nisa tu mannanayun ta Paraiso.—Bibbigan i Salmo 37:29.
11. Anni i mesimmu nu makikkofun ittam ta Dios, anna anni i matageno na tatun?
11 Aru paga i pammakapiattam ta pakiddukko ta Dios. Angngarigan na, nipromesa ni Jehova tu pakoman na i liwa danuri na mabbabawi nga madukko nisa. (Isa. 1:18) Megafu tatun, ari ittam madammakkan ta sobra nga pakkakonsensia megafu ta nappasa ira nga nakaliwatattam. (Sal. 32:1-5) Magayayya ittam gapa nu mapagayayya tam si Jehova. (Prov. 23:15) Siguradu nga aru paga i manono tam nga pammakapiattam nu kofuttam i Dios. Kunnasim gafu metulu-tuloy nga makiddukko ta Dios?
ARI ITTAM MAGIMMANG NGA ‘ARANNIAN I DIOS’
12. Anni i kingnguam tapenu mas maddukko ka ta Dios?
12 Nu tadday ka nga bawtisadu, siguradu nga aru ngana i kingnguam tapenu makiddukko kani Jehova. Nagigiammum i aru nga kinakurug meyannung kani Jehova nga Dios anna kani Jesu-Cristo, nabbabawyammu i nappasa ira nga nakaliwatammu, nassikan i pangurug mu ta Dios, anna nikagumammu nga mattuppal nisa. Ngem tapenu mas maddukko ittam ta Dios, mawag nga ari ittam magimmang nga kuan danatun.—Col. 2:6.
13. Anni i tallu nga makua tam tapenu ari ittam magimmang nga makiddukko kani Jehova?
13 Anni i makua tam tapenu mas maddukko kani Jehova? (1) Mawag tu kanayuttam nga bibbigan anna gigiammuan i Biblia. Nu mabbibbig ittam, ari laman nakuan tu basta gigiammuattam i meyannung ta Dios. Alippawatattam gapa i appana-panono na, i kayà na nga ipakua nittam, anna mattolay ittam mekunnay tatun. (Efe. 5:15-17) (2) Mawag tu pasikannattam i pangurug tam gukaban na pannono tu mapia ta pangipasingan na tu aya nittam. (3) Mawag tu kanayuttam ikalussaw i gannug ira nga ikalussona anna lisian danuri mangngua tu kunnatun.—Sal. 1:1; 101:3.
14. Base ta 1 Corinto 10:31, anni i makua tam ta kada aggaw tapenu mapagayayya si Jehova? (Innan gapa i letratu ira.)
14 Bibbigan i 1 Corinto 10:31. Mawag tu kuattam i mamagayayya kani Jehova. Ngem ari laman nakuan tu pallayyagayya anna pakistudy i kasali tatun. Mawag gapa tu makapagayayya kani Jehova i kukukuattam ta inaggaw. Angngarigan na, mapagayayya tam si Jehova nu kanayun ittam makkagi tu kurug anna minangngiyawa ittam. (2 Cor. 8:21; 9:7) Ikaya na gapa tu tagibalorattam i inango nga regalu na. Mas maddukko ittam ta Nangiyawa tu inango nu magimmugug ittam ta kanattam anna inumattam anna nu kuattam i adde na mawayya tam tapenu immuguran i baggi tam. Nu ikagumattam nga pagayayyatan si Jehova maski ta baraddi nga gannug, mas maddukko ittam ta nisa.—Luc. 16:10.
I pagimmugug nga mad-drive, pagalaga ta baggi gukaban na pagexercise, pakkakan tu masustansia ira, anna i pabbalin tu minangngiyawa ay karuan ta makua tam tapenu mapagayayya si Jehova (Innan i parapo 14)
15. Anni i ikaya ni Jehova nga pattratu tam ta tanakuan?
15 Masippo si Jehova ta ngamin nga totolay, masserbi man ira nisa onu ari. (Mat. 5:45) Ikaya na gapa tu masippo ittam ta tanakuan. Angngarigan na, mawag tu ‘ari tam nga para-paraketan i sinni laman, ibita tam i makirrama, anna massissippo ittam ta ngamin nga totolay.’ (Tito 3:2) Ari tam gafu tagibadditan maski danuri ari nga mangurug kani Jehova. (2 Tim. 2:23-25) Mas maddukko ittam kani Jehova nu kanayun ittam nga masippo ta ngamin.
‘UMARANNI ITTAM TA DIOS’ NU MAKALIWA ITTAM
16. Anni i natageno na nattura ta Salmo 73 ta pappasa na tiempo?
16 Kunnasi nu ta pappasa na tiempo, natageno mu nga ari ka mepangngo ta aya ni Jehova? Daddamman i nesimmu ta nattura ta Salmo 73. Kinagi na: “Maggi nga nesiddukal ngà; i takkì ay maggi nga neduya.” (Sal. 73:2) Inamin na nga “natakitan” yayya, ‘ari na nalippawa’ si Jehova, anna nabbalin yayya tu “kunna ulapa nga ayam” ta arubang ni Jehova. (Sal. 73:21, 22) Ngem megafu kari ta ugal nga pagimamma na ay ninono na nga ari ngana yayya ayatan anna pakoman ni Jehova?
17. (a) Maski nu fermi i pinakkafi na nono na salmista, anni i kingngua na? (b) Anni i magigiammu tam ta nesimmu nisa? (Innan gapa i letratu ira.)
17 Nu natageno na salmista tu gitta na pinagurayan yayya ni Jehova, awayya na tu ari nga nabbayag yatun. Maski fermi i pinakkafi na nono na, ammu na tu kawagan na i mas maddukko kani Jehova. Masingan yatun taw ira nga kinagi na: “Nu kunnuri paga, kanayun ngà ta biko mu nga naddian, ay kemmitam-mà ta limà nga ziwanan. Ta panabarang mu ay em-mà nga irolluan, anna alawatam-mà nga sigga-dayaw ta pangurianan.” (Sal. 73:23, 24) Mawag gapa tu kiddawattam kani Jehova tu pasikannan na ittam nu matageno tam tu nakkafi i pangurug tam onu fermi i nikadismaya tam ta nakaliwatattam ira. (Sal. 73:26; 94:18) Maski nu nakangngua ittam tu madammo ira nga liwa, awayya tam i makatoli kani Jehova megafu ta nipasiguradu na nga “minammakoma” yayya. (Sal. 86:5) Nu fermi i pinakkafi na nono tam, mawag tu mas maddukko ittam ta Dios tam.—Sal. 103:13, 14.
Nu matageno tam tu makafi ittam ta espiritual, mawag tu mas makiddukko ittam kani Jehova gukaban na pangiyawa tu mas aru nga tiempo ta paddayaw ta nisa (Innan i parapo 17)
MANNANAYUN NGA ‘UMARANNI TA DIOS’
18. Ngatta awayya tam i makiddukko kani Jehova tu mannanayun?
18 Awayya tam i makiddukko kani Jehova tu mannanayun. Ariattam saw mofutan tu awayya tam nga gigiammuan meyannung ta nisa. Kagian na Biblia nga ‘awan tu maski sinni nga makalippawa’ ta kukukuan ni Jehova, ta sirib na, anna ta pakannammu na.—Roma 11:33.
19. Anni i nipasiguradu nittam na Salmo ira meyannung ta mappange?
19 Mabibbig ta Salmo 79:13: “Sikami nga totolem nga kunna karnerum ira, ay mabbala-balo kami nikaw adde ta adde noka, ay adde ta ngangangay nga daya-rayawam-mika.” Makasiguradu ka gapa nga mabendisionakka nu ari ka magimmang nga makiddukko ta Dios anna makagim gapa yaw: “I Dios i mamasikan laggapa; awan tu tanakuan nga mawag ku nu ari laman yaya.”—Sal. 73:26.
KANSION 32 Si Jehova i Dayawan!
a Nu kanayun nga mavurung onu maraddam i tadday anna ari mawawan yatun nga panageno na, baka mawag na ngana i mappa-checkup ta doktor. Para ta mas aru nga informasion, innan i Passifusifutan, Num. 1 2023.