Makimallo tu Napafutuan

1-2. (a) Ngatta magalangan ittam nu mittan nga ikagi i kurug nga mataga-tageno tam kani Jehova? (b) Ngatta makasiguradu ittam nga talaga ginnan ni Jehova i pakimallo tam ira?

MATAGENO mu kari nu mittan nga pakatotoli ngana laman i pakimallo mu anna ariammu mekagi kani Jehova i matageno mu? Ari laman tu siko i kunnatun. Kanayun gare nga napakaru i kuattam yayya nga baka mappabibibi ittam nu makimallo ittam. Baka gapa ari tam nga mekagi kani Jehova i kurug nga mataga-tageno tam megafu ta nonopattam nga ari ittam mepappangngo nga makibbida nisa.

² Ituddu na Biblia nga ari tu i kasta na uvovug ira nga usattam ta pakimallo tam i innan ni Jehova. Ikaya na nga makimallo ittam maggafu ta futu. Gigginnan na i “pakimemallo na totolay nga minappakalinno.” (Sal. 10:17) Kakayà na nga ginnan ngamin nga kagiattam megafu ta talaga ikavurungan na ittam.—Sal. 139:​1-3.

3. Anni ira nga pakkiavu i tabbagattam taw nga artikulo?

³ Awayya na tu iyavu tam danaw: Ngatta puede tam kagian kani Jehova i ngamin? Anni i kuattam tapenu napafutuan i pakimallo tam? Ngatta makoffun nittam i pannono ta pakimallo ira ta Biblia tapenu mabbalin tu napafutuan i pakimallo tam? Anni i kuattam nu ari tam ammu i ipakimallo tam megafu ta problemadu ittam? Ammuattam i tabbag tatun ira.

IKAGIM I NGAMIN KANI JEHOVA

4. Anni nakuan i nonopattam tapenu mekagi tam i ngamin kani Jehova? (Salmo 119:145)

⁴ Matalo nga kofun si Jehova anna agga-nono na i pammakapianattam. Nu nonopattam yatun, mekagi tam i ngamin nisa. Kunnatun i ninono na nattura ta Salmo 119 turi ta nakimallo yayya kani Jehova. Egga ira i problema natun nga salmista. Pinara-parake da yayya. (Sal. 119:​23, 69, 78) Nakkafi gapa i nono na megafu ta nakaliwatan na ira. (Sal. 119:5) Ngem maski kunnatun, nikaguman na lagapa nga ikagi kani Jehova i mayan na futu na.—Bibbigan i Salmo 119:145.

5. Ngatta makimallo ka lagapa kani Jehova maski nu makokkonsensia ka ta nakkamaliammu ira? Mangiyawa tu angngarigan.

⁵ Kakayà ni Jehova nga makimallo ta nisa maski danuri nakangngua tu madammo nga liwa. (Isa. 55:​6, 7) Yayya nga makimallo ittam lagapa nakuan kani Jehova maski nu makokkonsensia ittam. Nonopan yaw nga angngarigan: Ammu na tadday nga piloto nga awayya na kontakan i air traffic controller ira nu mawag na i uffun. Ngem kunnasi nu nawawan yayya onu nagugal yayya? Mappasirang kari yayya nga mappoffun megafu ta nakkamali yayya? Siempre ari. Kunnatun ittam nakuan gapa. Maski nu ari ittam siguradu nu anni i kuattam onu maski nakaliwa ittam, ari tam lapa nakuan magalangan nga makimallo kani Jehova.—Sal. 119:​25, 176.

I KUAMMU TAPENU NAPAFUTUAN I PAKIMALLO MU

6-7. Ngatta mas mabbalin tu napafutuan i pakimallo tam nu pannonopattam i kualidad ira ni Jehova? Mangiyawa tu angngarigan. (Innan gapa i footnote.)

⁶ Nu ikagi tam kani Jehova i talaga nononopattam anna i mataga-tageno tam, mabbalin tu mas napafutuan i pakimallo tam nisa. Anni gafu i kuattam tapenu mabbalin tu kunnatun i pakimallo tam ira?

⁷ Pannonopan i kualidad ira ni Jehova.a Nu pannonopattam i kualidad ira ni Jehova, mas mekagi tam nisa nu anni talaga i nononopattam. (Sal. 145:​8, 9, 18) Kunnatun i natageno ni Sister Kristine nga vayolente i yama na. Istorian na: “Marigatan ngà nga kibbidan si Jehova nga kunna yamà. Abbo ku gare tu ari nà ngana nga ayatan megafu ta liwa ku ira.” Anni nga kualidad ni Jehova i nakoffun nisa? Kinagi na: “Ninonono ku i matalo nga aya ni Jehova. Gafu tatun, mas mangurug ngà ngana nga iddeddu nà ni Jehova. Ammù gapa tu ari nà nga pagurayan. Maski nu makaliwa ngà, iddeddu nà lapa anna duffunan nà. Nu nonopakku nga minaggiddeddu si Jehova, mas mabi ku mekagi nisa nu anni ira i mamagayayya anna i mamarraddam niakan.”

8-9. Ngatta makasta nu nonopattam labbi i ikagi tam nige tam nga makimallo? Mangistoria tu angngarigan.

⁸ Nonopammu labbi nu anni i ikagim. Nage mu makimallo, awayyam iyavu danaw ta baggim: ‘Anni ira i problemà sangawe? Egga kari i mawag tu pakomakku? Egga kari i panguli ta pattolè nga mawag ku i uffun ni Jehova?’ (2 Pat. 19:​15-19) Puede tam gapa nga parigan i pakimallo nga nituddu ni Jesus. Nonopattam nu anni i awayya tam nga ikagi kani Jehova meyannung ta ngagan na, ta Pappatulan na, anna ta uray na.—Mat. 6:​9, 10.

⁹ Angngarigan na, turi ta nakannammuan ni Sister Aliska nga aranni ngana matay i atawa na megafu ta egga i cancer na ta uto, narigatan yayya nga makimallo. Kunnaw i manono na: “Sobra i stress ku yari ta marigatan ngà nga nonopan nu anni i ipakimallo ku.” Anni i nakaduffun nisa? Kinagi na: “Nige ku makimallo, nonopakku labbi nu anni i ikagì kani Jehova tapenu ari laman tu puru meyannung ta baggì anna ta taki na atawà i mekagì nisa. Megafu tatun, nabbalin ngà tu mas kalmadu anna mas mepakimallo ku ngana kani Jehova i meyannung ta madduruma nga gannug.”

10. Ngatta ari ittam nakuan mappabibibi nu makimallo ittam? (Innan gapa i letratu ira.)

¹⁰ Ari ka mappabibibi nu makimallo ka. Siempre, awayya tam lagapa i makimallo tu napafutuan maski nu ababba laman yatun. Ngem nu makimallo ittam tu mas apiddu, magga mas mekagi tam kani Jehova nu anni talaga i mataga-tageno tam.b Istorian ni Elijah nga atawa ni Aliska: “Mamippiga ngà makimallo ta tangaggaw. Megafu tatun, mas nabbalin ngà tu madukko kani Jehova megafu ta ari ngà mappabibibi ta pakimallo ku. Ammù gare nga mapasensia si Jehova anna innaggan na tu mabalikku i pakimallo ku.” Puruebammu yaw: Mangiskediul ka tu oras anna mannono ka tu lugar nu sitaw awayyam i makimallo nga awan tu maka-istorbo niko. Nu makimallo ka tu mas apiddu, puedem gapa nga iyassikan yatun. Kanayummu nga kuan danatun.

PANNONOPAN I NAPAFUTUAN IRA NGA PAKIMALLO TA BIBLIA

11. Anni i meyuffun na nu pannonopammu i napafutuan ira nga pakimallo ta Biblia? (Innan gapa i kahon nga “Kunnaw Kari Gapa i Matageno Mu?”)

¹¹ Makaduffun nu pannonopammu i napafutuan ira nga pakimallo anna i kansion onu salmo ira nga egga ta Biblia. Nu magigiammum gare nu kunnasi nga kinagi na aripan ira na Dios i kurug nga mataga-tageno da, mapaguyu ka gapa nga ikagi i ngamin kani Jehova. Awayya na gapa tu makala ka ta nira tu awayyam ilagum ta pakimallo mu. Magga makaleg ka gapa tu pakimallo ira nga eksakto ta pappasa-pasammu.

12. Anni ira i iyavu tam ta baggi tam nu pannonopattam i tadday nga pakimallo ta Biblia?

¹² Nu pannonopammu i tadday nga pakimallo ta Biblia, iyavu mu ta baggim: ‘Sinni kari i nakimallo taw anna ngatta kunnaw i nipakimallo na? Kunnaw kari gapa i kayà ku nga ipakimallo? Anni ira i magigiammù tatun nga pakimallo?’ Baka mawag tu mar-research ka tapenu matabbag danatun, ngem sulit i appursigim. Ammuattam ngana i karuan nga angngarigan.

13. Anni i magigiammu tam ta pakimallo ni Hana? (1 Samuel 1:​10, 11) (Innan gapa i letratu.)

¹³ Bibbigan i 1 Samuel 1:​10, 11. Turi ta nipakimallo yaw ni Hana, egga i dua nga dakal nga problema na. Fuera paga ta baug yayya, para-parigatan gapa yayya na tadday paga nga atawa na atawa na. (1 Sam. 1:​4-7) Nakimallo si Hana anna ari yayya nappabibibi. Kinagi na ngamin kani Jehova i pakavurungan na yayya nga nabanna-bannayan yayya. Nu egga gapa i problema nga kanayun nga mamazziga niko, anni i magigiammum ta pakimallo ni Hana? (1 Sam. 1:​12, 18) Mabanna-bannayan ittam gapa nu ‘ipammakatalo tam ta YAFU i vuru-vurung tam ira.’ Ikagi tam gafu kani Jehova i ngamin nga problema tam anna i efekto natun ta nittam.—Sal. 55:22.

14. (a) Anni paga i magigiammu tam kani Hana? (b) Ngatta mas napafutuan i pakimallo tam ira nu pannonopattam tu mapia i Biblia? (Innan i footnote.)

¹⁴ Pappasa na piga ragun kabalin nga neyana ni Hana si Samuel, niyangay na yayya ta Atannang nga Pari nga si Eli. (1 Sam. 1:​24-28) Napafutuan nga nakimallo tari si Hana anna kinagi na tu kumbinsidu yayya nga protektan ni Jehova i matalo ira nga aripan na.c (1 Sam. 2:​1, 8, 9) Ari nga nawawan i problema ira ni Hana ngem mas naffokus yayya ta panguffun ni Jehova nisa. Anni i magigiammu tam tatun? Mas maattammattam i problema tam ira nu maffokus ittam ta panguffun ni Jehova nittam magadde sangawe.

15. Anni i magigiammu tam ta pakimallo ni profeta Jeremias nu ari tu patas i mesissimmu nittam? (Jeremias 12:1)

¹⁵ Bibbigan i Jeremias 12:1. Naobserba ni profeta Jeremias nga nu sinni paga danuri i marake ay ira paga lallagu i makasta i pattoleda. Megafu tatun, nakkafi i nono na. Natakitan gapa yayya megafu ta inuyu-uyaw yayya na kasi-Israelita na ira. (Jer. 20:​7, 8) Mantindiattam i mataga-tageno na nu mauyu-uyaw ittam gapa anna nu masingattam nga makasta i pattolay danuri na marake. Kinagi ni Jeremias kani Jehova tu dismayadu yayya tatun ira nga mesissimmu. Ngem ari na vuluvuga ninono nga ari tu patas si Jehova. Turi ta nasingan na nga dinisiplina ni Jehova i totolena nga matagga i ulu da, mas nakkomfiansa yayya tu patas i Dios. (Jer. 32:19) Awayya tam gapa nga ikagi kani Jehova ta pakimallo i mamaddismaya ira ta nittam. Ikagi tam gapa nisa tu mattalo ittam nga itunung na lagapa saw i ari tu patas nga mesissimmu nittam.

16. Anni i magigiammu tam ta agga-fuku nga Levita nu limitadu ngana i makua tam gafu ta situasiottam? (Salmo 42:​1-4) (Innan gapa i letratu ira.)

¹⁶ Bibbigan i Salmo 42:​1-4. Yatun nga salmo ay nitura na tadday nga agga-fuku nga Levita. Megafu tatun, ari na nga makavulu i kapangngurug na ira. Kinagi na tatun nga salmo i kurug nga mataga-tageno na. Turi ta kingngua na yatun, nanono na nga maski nu agga-fuku yayya, chansa na yatun tapenu dayawan si Jehova (Sal. 42:5) Pinannonopan na gapa i panangngal ni Jehova ta nisa. (Sal. 42:8) Kagittam kari gapa tu situasion i Levita? Baka agga-diakka laman ta balay nu megafu ta mataki ka onu nefuku ka megafu ta maddayaw ka kani Jehova. Awayya na tu egga ira i tiempo nga okey ka ngem baka egga gapa ira i tiempo nga makkafi i nono mu. Anni gafu i makasta nga kuammu? Ikagim kani Jehova ta pakimallo i ngamin nga manonono anna mataga-tageno mu. Makoffun gare yatun tapenu malippawa mu i kurug nga mataga-tageno mu, metoli i memammo nga nono mu, anna maakseptam anna mapasensiammu i situasion.

17. (a) Anni i magigiammu tam ta pakimallo ni profeta Jonas? (Jonas 2:​1, 2) (b) Kunnasi nga makoffun i pakimallo ira ta Salmo ira nu egga i problema tam? (Innan i footnote.)

¹⁷ Bibbigan i Jonas 2:​1, 2. Pakimallo yatun ni profeta Jonas turi ta egga yayya ta san na dakal nga manango. Maski nu ari yayya nagginna kani Jehova, kumbinsidu yayya nga ginnan ni Jehova i pakimallo na. Tatun nga pakimallo na, aru i kinagi na nga mabibbig tam ta Salmo ira.d Posible nga ammammu ni Jonas danatun ira nga Salmo. Turi ta pinannonopan na danatun, nabbalin yayya tu kumbinsidu nga uffunan yayya ni Jehova. Makasta gafu gapa nu mam-memorize ittam tu teksto ira. Sonu makimallo ittam kani Jehova megafu ta egga i problema tam, manono tam danatun nga teksto anna mabanna-bannayan ittam.

MAKIMALLO KA LAGAPA MASKI MARIGATAKKA NGA KUAN YATUN

18-19. Anni i ipasiguradu nittam na Roma 8:​26, 27 nu ari tam ammu i ipakimallo tam? Mangistoria tu angngarigan.

¹⁸ Bibbigan i Roma 8:​26, 27. Baka gafu ta problemadu ittam, ari tam ngana nga ammu i ipakimallo tam. Ta kunnatun ira nga situasion, i masanto nga espiritu na Dios i “makimemallo” para ta nittam. Anni i ikaya kagian natun? I masanto nga espiritu i inusa ni Jehova tapenu metura ta Biblia i aru ira nga pakimallo. Nu ari tam gafu ammu nu anni i ipakimallo tam, nonopan ni Jehova nga i ikaya tam talaga kagian ay yari ira i pakimallo nga egga ta Biblia. Alawatan ni Jehova danatun bilang pakimallo tam anna awayya na tu tabbagan na danatun.

¹⁹ Yatun i nakoffun kani Sister Yelena nga taga-Russia. Naaresto yayya megafu ta makimallo yayya anna mabbibbig tu Biblia. Fermi i stress ni Yelena yatutta marigatan yayya nga makimallo. Istorian na: “Nanono ku tatun nga tiempo nga nu ariakku ngana ammu i ipakimallo ku megafu ta problemadu ngà, i mabbalin tu pakimallo ku ay danuri pakimallo na aripan ira ni Jehova nga netura ta Biblia anna alawatan na yatun ira nga pakimallo. Talaga nabanna-bannayan ngà tatun maski nu kunnaw kaziga i situasiokku.”

20. Nu fermi i pavvuru-vurung tam, kunnasi tam meprepara i nono tam nga makimallo?

²⁰ Nu fermi i pavvuru-vurung tam, baka marigatan ittam nga maffokus ta pakimallo tam. Ngem tapenu meprepara tam i nono tam tatun, awayya tam i magginna tu audio recording na libru na Salmo ira. Puede tam gapa itura i mataga-tageno tam gitta na kingngua ni Patul David. (Sal. 18, 34, 142; superskripsion ira.) Ngem siempre, awan mabba tu espesipiko ira nga dob nga mawag tu tuttulattam tapenu meprepara tam i nono tam nga makimallo. (Sal. 141:2) Kuammu nu anni i ammum nga makoffun niko.

21. Ngatta awayya tam nga mekagi i ngamin kani Jehova ta pakimallo tam?

²¹ Magayayya ittam megafu ta ammu ngana ni Jehova i mataga-tageno tam nage tam paga ikagi yatun nisa. (Sal. 139:4) Ngem kakayà na nu ikagi tam nga mattalo ittam nisa anna iyistoria tam i ngamin nga mataga-tageno tam nisa. Ari ka gafu nga magalangan nga makimallo ta Yamam ta langi. Parigammu i pakimallo ira nga netura ta Biblia. Nu makimallo ka, ikagim gapa i ngamin ta nisa. Iyistoriam nu ngatta magayayya ka anna nu ngatta maraddam ka. Kurug nga kofummu si Jehova yayya nga magga uffunan naka!