Proverbio 17:17—“Kofun nga Mangaya ta Ngamin nga Tiempo”

Kebalinan na Proverbio 17:17

Mapattalakkan i kurug nga kofun. Kagitta na madukko nga mawwagi, matalo anna minangngikavurung ira, mas ngana ta mariga ira nga tiempo.

“I kurug nga kofun ay mangipasingan tu aya ta ngamin nga tiempo.” Awayya na nga kebalinan gapa naw ira nga uvovug nga “kanayun mangipasingan tu aya i kofun.” I Hebreo nga uvovug nga “aya” nga nakagi taw nga teksto, ari na laman tukuyan i emosion onu panageno na tadday. Ari makasarili yaw nga aya nga mepasingan gukaban na annangngua. (1 Corinto 13:4-7) I makkofun nga kunnatun i pangaya da ta kataggi-tadday, mas maddukko ira nu mapurueban i relasiodda, angngarigan na nu egga i ariadda pakka-alippawatan onu problema ira ta pattolay. Sigga-paran ira nga mamakoma ta kataggi-tadday. (Proverbio 10:12) Ari nga mamassil i tadday nga kofun nu egga i makasta nga mesimmu ta kofun na. Nu ari, magayayya yayya ta kofun na.​—Roma 12:15.

“I kurug nga kofun . . . wagi nga meyana ta tiempo na ziga.” Nebase yaw nga teksto ta kuruga madukko nga relasion na mawwagi. Yari ta nu kuattam i adde na mawayya tam nu meparubang ta problema i kofuttam, kagitta tam i kurug nga wagi nisa. Kunne na gapa, ari nga makkafi i madukko nga pakkofun megafu ta kapurueba ira. Nu ari, mas nga malladda yatun megafu ta aya anna respeto.

Konteksto na Proverbio 17:17

Mabibbig ta libru na Proverbio i ka-uto ira anna tabarang nga netura ta ababba nga mamappanono ta mabbibbig. Magaru tatun i nitura ni Patul Solomon. Imbes nga itura na yatun ta estilo nga Hebreo nga poem nu sitaw mar-rhyme i uvovug ira, nangusa yayya tu mapparehu onu makkaduma nga ideya tapenu mapalawan i punto. Tadday nga angngarigan na makkaparehu nga ideya i Proverbio 17:17, nu sitaw suportan na mekarua nga parte na teksto i ollu nga parte. Tadday gapa nga angngarigan na makkaduma nga ideya i Proverbio 18:24. “Egga ira i makkaravulu nga makka-dara-daral, ngem egga i kofun nga mas madukko anne ta wagi.”

Turi ta nitura ni Solomon i Proverbio 17:17, awayya na nga agga-nono na i madukko nga pakkofun na yama na nga si David anna si Jonatan nga ana ni Patul Saul. (1 Samuel 13:16; 18:1; 19:1-3; 20:30-34, 41, 42; 23:16-18) Maski nu ari nga mawwagi si David anna Jonatan mas madukko paga ira ta mawwagi. Sigga-paran paga lagu si Jonatan nga isakrifisio i inango na para ta kofun na.a

Tanakuan Paga nga Translation na Proverbio 17:17

“I kofun nga mangaya ta ngamin nga tiempo, anna mabbalin tu wagi ta tiempo na problema.”​—The Bible in Basic English.

“Kanayun nga kofun i tadday nga kofun, neyana yayya nga wagi ta tiempo na kapurueba.”​—The Moffatt Translation of the Bible.

“Ipasingan na kofun nga kofun yayya ta ngamin nga tiempo—megafu ta kapurueba, neyana yayya nga wagi.”​—The Complete Jewish Study Bible.

Girawan yaw nga ababba nga video tapenu masingan i sumario na libru na Proverbio.