Naggafu Kari ta Dios i Makakkasta nga Balita?

1. Sinni Awtor na Biblia?

Netura ta Biblia i makakkasta nga balita nga mattolay tu mannanayun i totolay ta davvun. (Salmo 37:29) Egga 66 nga babaraddi tu libru na. Inusa na Dios i maturu tu 40 matalo nga lallaki tu nangitura ta. Nitura ni Moises i ollu tu lima nga libru 3,500 dagun i nappasa. Si apostol Juan gapa i nangitura ta ultimu nga libru 1,900 dagun i nappasa. Sinni maka-ideya ta nitura naw na lallaki? Nakibbida onu naki-ergo i Dios tannira gukaban na masanto nga espiritu na. (2 Samuel 23:2) Niturada i ginnonopan na Dios ari tu i ginnonopadda. Nu kunnari gavu, si Jehova i Awtor na Biblia.​—Bibbigammu i 2 Timoteo 3:16; 2 Pedro 1:20, 21.

Girawan i video nga Sinni i Autor na Biblia?

2. Kunnasi ittam nga makasiguradu tu naggafu ta Dios i Biblia?

Ammu tam tu naggafu ta Dios i Biblia gafu ta ikagina nu anni eksakto nga detalye na mesimmu ta mappange. Awan tu tolay nga makakua ta kunnatun. (Josue 23:14) I Makapangngua-sa-ngamin nga Dios lamang i fuffustu nga makakagi nu anni mesimmu ta mappange.​—Bibbigammu i Isaias 42:9; 46:10.

Ekspektattam tu kuruga neruma-ruma i libru nga naggafu ta Dios. Binillion tu kopia na Biblia i nepalima ta minagatu nga madduruma nga lengguahe. Maski paga nabayag ngana i Biblia, mekunnay i netura sa ta napakurug nga tuddu na siensia. Kunne na gapa, ari tu makkorontra i nitura na 40 nga lallaki.a Tadday paga, i kagian na Biblia meyannung ta ayâ ay naggafu laman ta kurug nga Dios—i Dios na ayâ. Egga paga pakapangngua na Biblia tu manguli ta totolay para ta pammakapiadda. Danaw nga ebidensia i makakumbinsi ta minillion nga totolay tu naggafu ta Dios i Biblia.​—Bibbigammu i 1 Tesalonica 2:13.

Girawan i video nga Kunnasi Tam Masiguradu nga Kurug i Biblia?

3. Meyannung ta anni i Biblia?

Nakasentro tuddu na Biblia ta makakkasta nga balita meyannung ta meddu nga gakkag na Dios ta totolay. Ipakanawagna nu kunnasi nawawan da Adan anna Eva i privilehio nga mattolay ta paraiso nga davvun. Anna nu kunnasi gabbalaman metoli i Paraiso ta mappange.​—Bibbigammu i Apocalipsis 21:4, 5.

Mabibbig paga ta Biblia i dorob na Dios maski ira prinsipio anna tabarang na. Netura paga tatun i historia na pakilallang na Dios ta totolay. Yatun i mangipasingan nittam nu anni i personalidad na. Yari lagu tu moffunannaka tu kannammuammu i Dios anna nu kunnasi ka mabbalin tu kofun na.​—Bibbigammu i Salmo 19:7, 11; Santiago 2:23; 4:8.

4. Kunnasim malippawa i Biblia?

Moffunannaka na brosiur nga malippawa i Biblia gitta na kiningngua ni Jesus. Kada mangiyusa tu teksto, itudduna “nu anni i kebalingan na Masanto nga Tura.”​—Bibbigammu i Lucas 24:27, 45.

Kuruga makapabbaw i makakkasta nga balita nga naggafu ta Dios anne ta maski anni nga gannug. Ngem awan tu interes na karuan taw nga balita anna ikalussaw paga yaw na tanakuan. Ariammu ipamavulun tu pakafiadda nono mu. Nakadepende ta paddidiamum meyannung ta Dios i iddanamam nga mattolay tu mannanayun.​—Bibbigammu i Juan 17:3.