Anni Klase na Totolay i Saksi ira ni Jehova?

Sinni ira kilalam nga Saksi ni Jehova? I karuan nikami ay puede nga karrubam, katrabahum onu kaklasem. Onu baka nakiyuvovug ngana ira nikaw meyannung ta Biblia. Sinni kami talaga? Ngatta ikagkagimi ta tanakuan i pangurugmi?

Ordinario kami nga totolay. Nadduruma i naggafanan anna estado na pattolemi. Tanakuan i relihion na karuan nikami dati. Ari gapa mangurug ta Dios i karuan. Nige nga nabbaling kami tu Saksi, ginigiammumi tu mapia i tuddu ira na Biblia. (Kingngua 17:11) Kinurugmi i nagigiammumi yari tu nadesisionammi nga dayarayawan si Jehova nga Dios.

Nabenefisiowakkami ta paggigiammu tu Biblia. Kagitta na karuan ira, egga gapa problema anna pakkafiammi. Ngem gukaban na inaggaw nga pangiyaplika ta prinsipio ira na Biblia, kuruga dakal i makasta nga efektona ta pattolemi. (Salmo 128:1, 2) Yatun i tadday nga rason nu ngatta ikagkagimi ta tanakuan i makasta nga nagigiammumi ta Biblia.

Mattolay kami segun ta nadiosan ira nga prinsipio. Yaw ira nga prinsipio na Biblia i mamakasta ta pattolemi anna tudduan nakami nga mabbaling tu marespeto, mapammakatalakkan anna masippo. Makoffun yaw tapenu mabbaling tu mapia anna responsable i tadday nga tolay, anna ipagaramna i imammo ta familia anna atannang nga estandarte ta moral. Gafu ta kombinsidu kami nga “i Dios ari tu mangireruma,” ta interu mundo kagittami i tattadday nga familia nga awan tu pangireruma anna passirina megafu ta politika. Maski nu ordinario kami nga totolay, neruma kami nga grupo.​—Kingngua 4:13; 10:34, 35.

• Anni i neparehuan na Saksi ira ni Jehova ta tanakuan nga totolay?

• Anni ira nga prinsipio i nagigiammu na Saksi ira ta Biblia?