Kpachara Anya n’Ịhọrọ Ntụrụndụ

Mmetụta dị aṅaa ka ntụrụndụ na-enwe n’ahụ ụmụaka? Alvin Poussaint, bụ́ onye ọkà nkụzi na dọkịta nke rụworo ọrụ n’etiti ụmụaka ruo ihe dị ka afọ 30, kwenyesiri ike na ile ihe nkiri ndị na-egosi mmekọahụ na ime ihe ike na-akụziri ndị ntorobịa na akparamàgwà dị otú ahụ dị otú o kwesịrị. Ọ na-akọwapụtakwa ihe ize ndụ ọzọ: “Ahụwo m ka ụmụaka si n’ile ihe nkiri sịnịma ndị dị otú ahụ lọta wee ghọọ ndị na-atụ ụjọ—ma ọ bụ ndị na-ese okwu nke ukwuu. Ahụwo m ndị ọzọ ka ha laghachiri azụ n’ịrapara mmadụ n’ahụ ma ọ bụ ịmị mkpịsị aka ma ọ bụ ịnyụ mamịrị n’àkwà.” Dị ka dọkịta a si kwuo, ndị ọkachamara edetuwo ihe omume ndị ọzọ pụrụ ịkpata ụdị akparamàgwà ndị ahụ—iti ihe ma ọ bụ mmetọ n’ụzọ mmekọahụ ma ọ bụ ibi n’ógbè a na-alụ agha, ka anyị kpọọ nanị ole na ole. “Ọ dịghị onye ọ bụla n’ime anyị ga-ama ụma tinye nwatakịrị n’ọnọdụ ndị ahụ,” ka ọ na-akọwa, “ma anyị adịghị egbochi ha ile ihe nkiri sịnịma ndị na-egosi ihe ndị ga-atụ anyị ụjọ ikwe ka ha kirie n’ìhè.”

Ndị Kraịst nwere ezi ihe mere ha ga-eji na-eme nhọrọ ma jide n’aka na ntụrụndụ ha na-ahọrọ adịghị emebi ụkpụrụ Bible. Dị ka ihe atụ, Abụ Ọma 11:5 na-ekwu, sị: “Jehova na-anwa onye ezi omume: ma onye na-emebi iwu na onye na-ahụ ihe ike n’anya ka mkpụrụ obi Ya na-akpọ asị.” Onye Kraịst bụ́ Pọl onyeozi dekwara, sị: “Ya mere, meenụ ka ihe nile dị unu n’ahụ nke dị n’elu ụwa nwụọ; ịkwa iko, adịghị ọcha, ọchịchọ ọjọọ, agụụ ihe ọjọọ, na anyaukwu . . . Tụpụkwanụ ihe ndị a nile; bụ́ iwe, ọnụma, obi ọjọọ, nkwulu, ikwu okwu ihere na-esi n’ọnụ unu pụta.”—Ndị Kọlọsi 3:5, 8.

N’ihi ya, ndị mụrụ ụmụ kwesịrị ilezi anya na ntụrụndụ ha na-ahọtara ụmụ ha—na onwe ha—adịghị akwalite “ọrụ nile nke anụ ahụ.” (Ndị Galetia 5:19-21) Ha kwesịrị ịdị na-eme nhọrọ, na-atụle ma ọdịdị ma otú ntụrụndụ ha haruru.—Ndị Efesọs 5:15-17.