Chineke Kwere Nkwa na Ụwa Anyị A Ga-adịgide

Ọ bụ ihe a ka ndị na-eme nchọpụta si ná mba dị iche iche kwubiri mgbe ha mechara nchọpụta gbasara otú ụwa si na-ekpo oké ọkụ. Ọ bụrụ na i kweere na Chineke, Onye ihe banyere ụmụ mmadụ na-emetụ n’obi, ihe a ndị sayensị kwuru nwere ike ime ka i cheta otú Chineke si kee ụwa anyị a ka o jiri aka ya na-edozi onwe ya.

Ma, n’ihi otú ndị mmadụ mebirurula ụwa a, ọ gaghịzi ejili aka ya dozie ihe niile e mebiri na ya. Gịnị mere obi ga-eji sie anyị ike na Chineke ga-eme ihe maka ya?

Lee amaokwu Baịbụl ndị dị n’igbe dị na peeji a. Ha na-eme ka obi sie anyị ike na ụwa anyị a ga-adịgide, dịkwa mma karịa otú ọ dị ugbu a.

• Ọ bụ Chineke kere ụwa anyị a. “Ná mmalite, Chineke kere eluigwe na ụwa.”​—Jenesis 1:1

• Chineke sịrị na ọ bụ ya nwe ụwa anyị a. “Ọ bụ Jehovaa nwe ụwa na ihe niile dị n’ime ya.​—Abụ Ọma 24:1

• Chineke kere ụwa anyị a ka ọ dịgide. “Ọ tọsiri ntọala ụwa ike. A gaghị ebupụli ya ebupụ ruo mgbe niile ebighị ebi.” ​—Abụ Ọma 104:5

• Chineke kwere nkwa na a ga na-enwe ihe ndị dị ndụ n’ụwa a ruo mgbe ebighị ebi. ‘Ezi Chineke, Onye kere ụwa, ekeghị ya na nkịtị, kama o kere ya ka ndị mmadụ biri na ya.​—Aịzaya 45:18

• Chineke kwere nkwa na ụmụ mmadụ ga-adị ndụ n’ụwa a ruo mgbe ebighị ebi. “Ndị ezi omume ga-enweta ụwa, ha ga-ebikwa na ya ruo mgbe ebighị ebi.​—Abụ Ọma 37:29

Chineke kere ụwa a otú ụmụ mmadụ ga-enwe ike ibi na ya n’emebighị ihe ndị dị na ya. Baịbụl kwuru na mgbe oge a kara aka ruru, Jehova Chineke ga-eme ka mbibi ndị mmadụ na-ebibi ụwa n’ihi anyaukwu kwụsị​—Mkpughe 11:18

Baịbụl kwere nkwa na n’oge ahụ, Chinke ga-eme ka ụwa anyị a bụrụ ọmarịcha paradaịs nakwa na ọ ga-asaghe aka ya “were ihe na-agụ ihe ọ bụla dị ndụ nyejuo ya afọ.​—Abụ Ọma 145:16