Eke na Egwurugwu Mbụ

Ị̀ MA ihe mbụ Noa mere mgbe ya na ezinụlọ ya si n’ụgbọ ahụ pụta? Ọ chụụrụ Chineke àjà, ma ọ bụ nye ya onyinye. Ị pụrụ ịhụ ka ọ na-eme nke a na foto dị n’okpuru ebe a. Noa ji ụmụ anụmanụ a chụọrọ Chineke àjà iji kelee ya maka ịzọpụta ya na ezinụlọ ya n’oké iju mmiri ahụ.

Ì chere na onyinye ahụ dị Jehova mma? Ee, ọ dị ya. Ọ gwakwara Noa na ya agaghị eji iju mmiri bibie ụwa ọzọ.

Ọ dịghị anya, ala niile wee kọọ, Noa na ezinụlọ ya wee malite ndụ ọhụrụ mgbe ha pụtasịrị n’ụgbọ ahụ. Chineke gọziri ha wee sị ha: ‘Unu ga-amụ ọtụtụ ụmụ. Unu ga-abakwa ụba ruo mgbe mmadụ ga-ebizu n’ala niile.’

Ma, mgbe ndị mmadụ ga-emesị nụ banyere oké iju mmiri ahụ, ha pụrụ ịtụ egwu na a ga-enwe iju mmiri yiri ya ọzọ. N’ihi ya, Chineke nyere ihe ga na-echetara ndị mmadụ nkwa o kwere nke bụ́ na ya agaghị eme ka iju mmiri rikpuo ụwa ọzọ. Ị̀ ma ihe o wepụtara iji na-echetara ha? Ọ bụ eke na egwurugwu.

A na-ahụkarị ya na mbara igwe n’oge anyanwụ na-amụ mgbe mmiri zosịrị. Ha pụrụ inwe ọtụtụ àgwà mara mma. Ị̀ hụtụla otu? Ị̀ na-ahụ nke dị na foto a?

Chineke wee sị: ‘Ana m ekwe nkwa na iju mmiri agaghị ebibi mmadụ niile na anụmanụ niile ọzọ. M na-etinye eke na egwurugwu m n’igwe ojii. Mgbe ọ pụtara, m ga-ahụ ya wee cheta nkwa nke a mụ onwe m kwere.’

Ya mere, mgbe ị na-ahụ eke na egwurugwu, gịnị ka ọ na-echetara gị? Ọ bụ nkwa ahụ Chineke kwere na ya agaghị eji oké iju mmiri ebibi ụwa ọzọ.