Ebe A Ga-enweta Nkasi Obi

Ọ̀ DỊTỤWO mgbe ọ bụla ị na-enweghị obi ụtọ, mgbe ọ bụ nanị gị nọ?— Ọ̀ dịtụwo mgbe ị na-adị na-eche ma ọ̀ dị onye ọ bụla hụrụ gị n’anya?— Ọ na-eme ụmụaka ụfọdụ. Ma Chineke na-ekwe nkwa, sị: ‘Mụ onwe m agaghị echezọ gị.’ (Aịsaịa 49:15) Nke ahụ ọ́ bụghị ihe magburu onwe ya iche n’echiche?— Ee, Jehova Chineke hụrụ anyị n’anya n’ezie!

Otu onye so dee Bible sịrị: “Nna m na nne m ahapụwo m, ma Jehova ga-ekubata m.” (Abụ Ọma 27:10) Ịmata nke ahụ pụrụ ịbụ ezigbo ihe nkasi obi nye anyị, ọ́ bụghị ya?— Ee, Jehova na-agwa anyị, sị: ‘Atụla egwu, gị ka M nọnyeere: . . . M ga-enyere gị aka.’—Aịsaịa 41:10.

Otú ọ dị, mgbe ụfọdụ, Jehova na-ekwe ka Setan wetara anyị nsogbu. Jehova ọbụna na-ekwe ka Setan lee ndị ohu Ya ule. N’otu oge, Ekwensu mere ka Jizọs taa ahụhụ nke ukwuu nke na Jizọs tikuru Jehova, sị: “Chineke m, Chineke m, gịnị mere i jiworo gbahapụ m?” (Matiu 27:46) Ọ bụ ezie na Jizọs nọ na-ata ahụhụ, ọ ka maara na Jehova hụrụ ya n’anya. (Jọn 10:17) Ma, Jizọs makwaara na Chineke na-ekwe ka Setan lee ndị ohu Ya ule na ọ na-ekwekwa ka Setan mee ka ha taa ahụhụ. N’isiakwụkwọ ọzọ, anyị ga-akọwa ihe mere Chineke ji ekwe ka Setan na-eme nke a.

Mgbe anyị bụ ụmụaka, ọ na-esi ike mgbe ụfọdụ ka anyị ghara ịtụ ụjọ. Dị ka ihe atụ, ọ̀ dịtụla mgbe i furu?— Ụjọ ọ̀ tụrụ gị?— Ụjọ na-atụ ọtụtụ ụmụaka. N’otu oge, Onye Ozizi Ukwu ahụ kọrọ otu akụkọ banyere ihe ifu efu. Ma, ọ bụghị nwatakịrị furu. Ọ bụ atụrụ.

N’ụzọ ụfọdụ, i yiri atụrụ. N’ụzọ dị aṅaa? Ọ dị mma, atụrụ anaghị ebu oké ibu ma ọ bụ esi ike. Ha chọkwara onye ga na-elekọta ha ma na-echebe ha. A na-akpọ onye na-elekọta atụrụ onye ọzụzụ atụrụ.

N’akụkọ ya, Jizọs kọrọ banyere otu onye ọzụzụ atụrụ nke nwere otu narị atụrụ. Ma, otu n’ime atụrụ ya furu. O nwere ike ịbụ na atụrụ ahụ chọrọ ịhụ ihe dị n’akụkụ nke ọzọ nke otu ugwu. Ma, n’oge na-adịghị anya, atụrụ ahụ kpafuru site n’ebe ndị nke ọzọ nọ. Cheedị echiche otú ọ dị atụrụ ahụ mgbe o legharịrị anya wee hụ na ọ bụ nanị ya nọ?—

Gịnị ka onye ọzụzụ atụrụ ahụ ga-eme mgbe ọ matara na otu atụrụ ahụ na-efu efu? Ọ̀ ga-asị na ọ bụ atụrụ ahụ kpatara ya, n’ihi ya, na ya agaghị enye onwe ya nsogbu ije chọwa ya? Ka ọ̀ ga-ahapụ atụrụ 99 ahụ n’ebe ọ na-adịghị ihe ga-eme ha gaa chọwa nanị otu ahụ? Ò kwesịrị ịta ahụhụ ahụ nile n’ihi otu atụrụ?— Ọ bụrụ na ọ bụ gị bụ atụrụ ahụ furu efu, ị̀ ga-achọ ka onye ọzụzụ atụrụ ahụ chọwa gị?—

Onye ọzụzụ atụrụ ahụ hụrụ atụrụ ya nile n’anya nke ukwuu, ọbụna nke ahụ furu efu. Ya mere, ọ gara chọwa nke ahụ na-efu efu. Chee echiche ụdị obi ụtọ atụrụ ahụ furu efu na-aghaghị inweworị mgbe ọ hụrụ onye ọzụzụ atụrụ ahụ ka ọ na-abịa! Jizọs kwukwara na onye ọzụzụ atụrụ ahụ ṅụrịrị ọṅụ na ya achọtawo atụrụ ya. Ọ ṅụrịrị ọṅụ maka atụrụ ahụ karịa otú ọ ṅụrịrị maka atụrụ 99 ahụ na-efughị efu. Ònyezi dị ka onye ọzụzụ atụrụ ahụ Jizọs kọrọ akụkọ maka ya? Ònye na-elekọta anyị otú onye ọzụzụ atụrụ ahụ si lekọta atụrụ ya?— Jizọs sịrị na Nna ya nke nọ n’eluigwe na-elekọta anyị otú ahụ. Ọ bụkwa Jehova bụ Nna ya.

Jehova Chineke bụ Onye Ọzụzụ Atụrụ Ukwu nke ndị ya. Ọ hụrụ ndị nile na-ejere ya ozi n’anya, gụnyere ụmụaka dị ka gị. Ọ chọghị ka onye ọ bụla n’ime anyị merụọ ahụ́ ma ọ bụ ka anyị nwụọ. N’ezie, ọ bụ nnọọ ihe na-emesi obi ike ịmata na ihe banyere anyị na-emetụ Chineke n’obi nke ukwuu otú ahụ!—Matiu 18:12-14.

Ì kwere n’ezie na Jehova Chineke?— Ọ̀ bụ onye dị adị n’ezie nye gị?— Ọ bụ eziokwu na anyị apụghị ịhụ Jehova anya. Ọ bụ n’ihi na ọ bụ Mmụọ. O nwere ahụ́ nke anyị na-apụghị ịhụ anya. Ma ọ bụ onye dị adị n’ezie, ọ pụkwara ịhụ anyị. Ọ ma mgbe anyị chọrọ enyemaka. Anyị pụkwara ịgwa ya okwu n’ekpere, otú anyị na-agwa onye ọzọ nọ n’ụwa okwu. Jehova chọrọ ka anyị na-eme nke a.

Ya mere, ọ bụrụ na ọ dị mgbe ọ bụla ị na-enweghị obi ụtọ ma ọ bụ nọrọ nanị gị, gịnị ka i kwesịrị ime?— Gwa Jehova okwu. Bịaruo ya nso, ọ ga-akasịkwa gị obi ma nyere gị aka. Cheta na Jehova hụrụ gị n’anya, ọbụna mgbe ị na-eche na ọ bụ nanị gị nọ. Ka anyị weta Bible anyị. N’ebe a n’Abụ Ọma nke 23, a gwara anyị, malite n’amaokwu nke 1, sị: “Jehova bụ onye na-azụ m dị ka atụrụ; ọ dịghị ihe kọrọ m. N’ebe ịta nri nke ahịhịa ndụ ka Ọ na-eme ka m makpuru: n’akụkụ mmiri nke izu ike ka Ọ na-edu m nwayọọ.”

Rịba ama ihe onye dere ya kwukwasịrị, n’amaokwu nke 4: “A sị na ejee m ije na ndagwurugwu onyinyo ọnwụ, m gaghị atụ egwu ihe ọjọọ ọ bụla; n’ihi na Gị onwe gị nọnyeere m: ndele Gị na mkpanaka Gị, ha onwe ha na-akasi m obi.” Nke a bụ mmetụta ndị mmadụ na-enwe mgbe ọ bụ Jehova bụ Chineke ha. Ha na-enweta nkasi obi mgbe ha nọ ná nsogbu. Ọ̀ na-adị gị otú ahụ?—

Dị ka onye ọzụzụ atụrụ na-ahụ n’anya si elekọta ìgwè atụrụ ya, otú a ka Jehova si elekọta ndị ya nke ọma. Ọ na-egosi ha ụzọ ziri ezi ha ga-eso, ha na-ejikwa obi ụtọ na-eso ya. Ọbụna mgbe nsogbu gbara ha gburugburu, ọ dịghị mkpa ka ha tụọ egwu. Onye ọzụzụ atụrụ na-eji ndele ya ma ọ bụ mkpanaka ya echebe atụrụ ya pụọ n’aka anụ ọhịa ndị pụrụ imerụ ha ahụ́. Bible kọrọ otú onye ọzụzụ atụrụ ahụ na-eto eto, bụ́ Devid, si chebe atụrụ ya pụọ n’aka ọdụm na anụ ọhịa bea. (1 Samuel 17:34-36) Ndị Chineke makwaara na Jehova ga-echebekwa ha. Ha pụrụ inwe obi iru ala n’ihi na Chineke nọnyeere ha.

Jehova hụrụ atụrụ ya n’anya n’ezie, ọ na-elekọtakwa ha n’ụzọ dị nro. Bible na-ekwu, sị: ‘Dị ka onye ọzụzụ atụrụ ka ọ ga na-edu atụrụ ya. Ọ ga-eji aka ya chịkọta ndị dị ntakịrị.’— Aịsaịa 40:11.

Ọ́ dịghị enye gị obi ụtọ ịmata na Jehova dị otú ahụ?— Ị̀ chọrọ ịbụ otu n’ime atụrụ ya?— Atụrụ na-ege ntị n’olu onye ọzụzụ atụrụ ha. Ha na-anọ ya nso. Ị̀ na-ege Jehova ntị?— Ị̀ na-anọ ya nso?— Ya bụrụ otú ahụ, ọ dịghị mkpa ka ị tụọ egwu ma ọlị. Jehova ga-anọnyere gị.