Ihe Ekpere Pụtara

“N’asụsụ Hibru, okwu bụ isi dịịrị ekpere sitere na mkpọrọgwụ okwu bụ, ‘ikpe ikpe’, ụdị ahụ nke na-egosi onye o metụtara, bụ́ nke e ji emekarị ihe . . . pụtakwara n’ụzọ nkịtị, ‘ikpe onwe onye ikpe.’” Otú ahụ ka akwụkwọ bụ The Authorised Daily Prayer Book kwuru. Ihe nke a pụtara bụ na otu n’ime ọrụ ndị ekpere na-arụ bụ na o kwesịrị inyere onye ahụ aka ịhụ ma ọ̀ na-erukwa eru n’ụkpụrụ na ihe ọ̀tụ̀tụ̀ ezi omume nile nke Chineke.

N’ihi nke a, n’ime Bible dum, a na-agwa anyị na ọ gwụlakwa ma mmadụ ọ̀ na-eme uche Chineke, a gaghị anara ekpere ya nke ọma. “Jehova dị anya n’ebe ndị na-emebi iwu nọ: ma ekpere ndị ezi omume ka ọ na-anụ.”—Ilu 15:29; 1 Jọn 5:14.

Nnyocha onwe onye n’ihu Jehova Chineke kwesịrị nnọọ ime ka onye ahụ na-ekpe ekpere nwee obi umeala, nweekwa mwute n’ihi ihe o mere. Nke a na-emesiwanye ihe atụ ahụ Jisọs mere ike banyere onye Farisii ahụ dị mpako na onye ọna ụtụ ahụ nwere mwute, bụ́ ndị bịara n’ụlọ nsọ ahụ ikpe ekpere.—Luk 18:9-14.

Otú a, ma ànyị na-ekpere Jehova ekpere iji kelee ya, nye ya otuto, ma ọ bụ rịọ ya arịrịọ, ekpere na-abụ oge nnyocha onwe onye mgbe nile. N’ụzọ dị otú a, ekpere na-adọta anyị nso n’ebe Jehova nọ, na-ewusikwa mmekọrịta anyị na ya ike.