Ndị Nkwusa Alaeze Na-akọ

“Ihe Ncheta nke Mmụọ Ịrụkọ Ọrụ”

NSO ọnụ ọnụ ebe dịkarịsịrị ná ndịda nke Spain ka nnukwute okwute limestone a maara dị ka Oké Nkume Gibraltar topụrụ. Ruo ọtụtụ narị afọ, nkume a abụwo ihe akaebe na-adịghị ekwu okwu nye esemokwu ndọrọ ndọrọ ọchịchị na enweghị nkwekọrịta mba dị iche iche. N’ụzọ dị iche, Oké Nkume Gibraltar nọ n’azụ ihe ngosipụta nke ịrụkọ ọrụ ọnụ na ịdị n’otu nke dị ụkọ n’ụwa taa.

Nanị kilomita atọ site n’Oké Nkume ahụ ka obodo La Línea, Spain dị. N’ebe ahụ owuwu nke otu Ụlọ Nzukọ Alaeze nke Ndịàmà Jehova kpọkọtara ọtụtụ narị ndị ọrụ afọ ofufo na-anụ ọkụ n’obi itinye oge na ume ha. Ka ha na-arụsi ọrụ ike iguzobe ebe dị mma maka ofufe nke Onye Okike ahụ, bụ́ Jehova Chineke, ọbụna nnukwute Oké Nkume Gibraltar dị n’azụ enwekwaghị mkpa ọ dị ma e jiri ya tụnyere ọrụ e ji n’aka.

Ndị nkwusa Alaeze nọ n’akụkụ ahụ nke ụwa na-ezite akụkọ na-esonụ:

“Narị itoolu nke ndị ọrụ na-anụ ọkụ n’obi rụrụ ọrụ ehihie na abalị, na-amalite n’ehihie Friday, September 24, 1993. Ka ọ na-eru elekere anya asaa n’uhuruchi Sunday, e guzobewo ihe mgbaama ọhụrụ na-eme ka a mata ụlọ ahụ dị ka Ụlọ Nzukọ Alaeze nke Ndịàmà Jehova, e jikwa ihe owuwu ọhụrụ ahụ na-adọrọ adọrọ na-eme ihe maka nzukọ ihu ọha mbụ ya.

“Ọtụtụ Ndịàmà sitere na Gibraltar dị nso gafere ókèala iji nyere ụmụnna ha aka bụ́ ndị Spain. ‘Nkewa ndọrọ ndọrọ ọchịchị adịghị eme ka mmụọ anyị nke ịbụ òtù ụmụnna zuru ụwa ọnụ jụọ oyi,’ ka otu n’ime ndị ọrụ afọ ofufo ahụ, bụ́ onye obodo Gibraltar, kọwara. O kwukwasịrị: ‘Ọtụtụ afọ gara aga, ndị enyi sitere La Línea bịara inyere anyị aka iwu Ụlọ Nzukọ Alaeze nke anyị na Gibraltar, ya mere ugbu a anyị nwere obi ụtọ imere ha ihe ọma dị ka ha meere anyị.’

“Iji tinyekwuo ihe ná mgbalị sitere n’obi dum nke ọgbakọ abụọ nke Ndịàmà Jehova na ọtụtụ narị ndị enyemaka nwere nkà bụ́ ndị sitere n’ógbè Andalusia, obodo La Línea kpebiri inye mbara ala dị mkpa dị ka onyinye. ‘Dị ka ihe ọdịnala, ndị ọchịchị Spain ógbè ahụ enyewo ala mgbe nile maka iwu chọọchị ndị Katọlik,’ ka chiifu nke La Línea kọwara n’oge nleta o letara ebe owuwu ihe ahụ. ‘Gịnị mere a gaghị eme otu ihe ahụ maka okpukpe ndị ọzọ? Achọghị ọdịmma onwe onye nanị nke ndị ọrụ afọ ofufe ahụ masịrị m nke ukwuu, echekwara m na ha kwesịrị inweta nkwado anyị. Anyị chọkwuru ụdị mmụọ nke a n’ụwa nke oge a kewasịrị ekewa.’

“O zoro aka n’Ụlọ Nzukọ Alaeze ahụ dị ka ‘ihe ncheta nke mmụọ ịrụkọ ọrụ.’ N’ezie, akụkụ kasị adọrọ mmasị abụghị ma ụkpụrụ a tụrụ maka ya ma ọ bụ otú ụlọ ahụ hà. Kama nke ahụ, ihe masịrị ọtụtụ ndị n’ógbè ahụ bụ eziokwu bụ na nanị ndị ọrụ afọ ofufo wuru ya, e wukwara ya nanị n’ime 48 hour!”

O doro anya na Ndịàmà Jehova na La Línea na gburugburu ya nile na-emezu okwu ndị dị ná Ndị Galetia 6:10. N’ebe ahụ Pọl onyeozi gwara ndị kwere ekwe ibe ya okwu ịdọ aka ná ntị, sị: “Ya mere otú a, otú anyị nwere oge, ka anyị na-arụ ezi ihe n’ebe mmadụ nile nọ, ma ka anyị na-arụ ezi ihe karịsịa n’ebe ndị ezinụlọ nke okwukwe anyị nọ.”