Ndị Nkwusa Alaeze Na-akọ
“Guzogidenụ Ekwensu, Ọ Ga-agbapụkwa n’Ebe Unu Nọ”
NA NARỊ afọ mbụ, otu ìgwè nke na-enwe mmasị ‘n’ime mgbaasị’ n’Efesọs nabatara ozi ndị Kraịst site n’ịkpọ akwụkwọ mgbaasị ha ọkụ n’ihu ọha. (Ọrụ 19:19) A gbakọtara ọnụ ego akwụkwọ ndị a ịbụ 50,000 mkpụrụ ego ọlaọcha. Ọ bụrụ na Bible na-ezo aka na denarịọs, mkpụrụ ego ọlaọcha nke ndị Rom, ọ ga-abụworị ma ọ dịkarịa nta ₦814,000!
Taa, e nwere ọtụtụ ndị n’otu mgbe nwere akwụkwọ ndị na-ekwu banyere mgbaasị ma bụrụ ndị gosipụtara mkpebi siri ike yiri nke ndị Efesọs oge ochie ahụ. Tụlee ahụmahụ a na-esonụ sitere Canada.
Ihe dị ka afọ ise gara aga, otu onye n’ime Ndịàmà Jehova na-ekwusa site n’ụlọ ruo n’ụlọ mgbe n’otu ọnụ ụzọ otu nwanyị aha ya bụ́ Nora n’ụzọ nkịtị dọbatara ya n’ime ụlọ. Ruo ọtụtụ ogologo afọ nke ịchọ ihe ime mmụọ, Nora enwetawo ọtụtụ narị nke akwụkwọ okpukpe na nke mgbaasị, ma ọ chọrọ ịma ihe Bible nwere ikwu banyere olileanya nke ndị nwụrụ anwụ. Onyeàmà ahụ nyefere ya traktị ahụ bụ́ Olileanya Dị Aṅaa Dịịrị Ndị Anyị Hụrụ n’Anya Nwụrụ Anwụ? A zara ajụjụ ndị Nora jụrụ, ọ nakwaara ụtụ maka magazin Ụlọ Nche na Teta!
Ka oge na-aga ọ kwapụrụ, ya na Ndịàmà Jehova ahụghịkwa ọzọ. Otú ọ dị, ọ nọgidere na-anata magazin ndị ahụ site n’adres ọhụrụ ya. Ọ tụkwara ọda maka ụfọdụ n’ime mbipụta ndị dabeere na Bible a kpọtụrụ aha n’ime magazin ndị ahụ. Mgbe oge ụfọdụ gasịrị, otu onye n’ime Ndịàmà Jehova bịara n’ọnụ ụzọ ya. N’ịbụ onye ọ masịrị na Onyeàmà ahụ gara kpọmkwem na Bible mgbe ọ na-aza ajụjụ, Nora nabatara ya ma gwa ya ka ọ bịaghachi maka ikwurịtakwu okwu.
Otú ọ dị, o siiri Onyeàmà ahụ ike ịhụ Nora ọzọ. E mere nleta mgbe mgbe n’oge ndị dị iche iche n’ụbọchị nakwa n’oge ndị dị iche n’izu n’enweghị ihe ịga nke ọma. Otú ọ dị, mgbe oge na-aga, e nyeghachiri nnọgidesi ike ya ụgwọ ọrụ, o nwetakwara ezi ihe ọ rụpụtara. A malitere ọmụmụ Bible a na-amụchi anya, nke a na-enwe ugboro atọ kwa izu otú Nora gbara isi akwara ka a na-eme. Ihe ndị ọ na-amụta kpaliri ya ịgwa ndị enyi ya na ndị òtù ezinụlọ ya okwu, na-akpata atọ n’ime ha ịrịọ ka Ndịàmà Jehova duziere ha ọmụmụ Bible.
Site n’ọmụmụ ihe ya Nora bịara ghọta na e nwere ọtụtụ okpukpe ụgha na ndị amụma ụgha kama nanị otu ụzọ na-eduje ná ndụ. Ruo ọtụtụ afọ ọ nọwo na-achọ azịza nye ajụjụ ya n’okpukpe ụgha dị iche iche, ma mgbe ọ mụtasịrị ihe Bible nwere ikwu banyere ndị mmụọ ọjọọ, o mere omume ka ndị Efesọs oge ochie ahụ a kpọtụrụ uche n’Ọrụ Ndị Ozi 19:19. O hichapụrụ ọ́bọ̀ akwụkwọ ya ma, n’ụbọchị ole na ole, bibisie ihe karịrị otu puku akwụkwọ na-ekwu banyere mgbaasị na ozizi okpukpe ụgha dị iche iche. N’ime akwụkwọ ndị o bibiri, otu mpịakọta nwere akwụkwọ anọ bụ n’ọnụ ego karịrị ₦17,600!
N’ụzọ doro anya ịbụ ndị ihe Nora mere dị ilu n’obi, ndị mmụọ ọjọọ ahụ menyere ya egwu ruo ihe dị ka izu abụọ. Otú ọ dị, ndị mmụọ ọjọọ a enweghị ike igbochi ya ịnọgide n’ọmụmụ Bible ya na mkpakọrịta nke ya na nzukọ Jehova nke oge a.
Ụdị ahụmahụ ndị dị otú ahụ na-eme ihe atụ eziokwu nke okwu Bible: “Doonụ onwe unu n’okpuru Chineke; ma guzogidenụ Ekwensu, ọ ga-agbapụkwa n’ebe unu nọ.”—Jemes 4:7.