Ihe Mgbochi Hà Na-akụda Gị Aka?

IHE mgbochi! Ọ dịghị onye nwere mmasị na ha n’ezie; ma anyị nile aghaghị ịnagide ha ruo n’ókè ụfọdụ. Otú ọ dị, ị̀ na-enwe nkụda obi mgbe ụfọdụ n’ihi na ndụ gị yiri ka ọ bụ nke a kpaara ókè gabiga ókè? Ma eleghị anya ị ga-enwe mmetụta ka mma ma ọ bụrụ na ị gbanwee otú i si ele ihe anya. Kama ịdị na-ewe iwe n’ihi ihe ị na-enweghị ike ime, gịnị ma i jiri nnwere onwe ọ bụla i nwere mee ihe n’ụzọ kasị mma?

Dị ka ihe atụ, ọ dị ọtụtụ ndị dara ogbenye ka ya bụrụ na ha bụ aka ji akụ. Otú ọ dị, ọ bụ ezie na ịda ogbenye na-akpara ihe ndị anyị pụrụ ime n’usoro ihe nke a ókè, ihe ndị dị mkpa ná ndụ na-eru mmadụ nile aka. Ndị ogbenye tinyere ndị ọgaranya na-adaba n’ịhụnanya, na-alụ di ma ọ bụ nwunye, na-azụlite ụmụ, na-enwe ezi ọbụbụenyi, na ihe ndị ọzọ. Nke ka mkpa, ndị ogbenye tinyere ndị ọgaranya na-amata Jehova ma na-elepụ anya maka ụwa ọhụrụ ahụ e kwere ná nkwa. Ndị ogbenye tinyere ndị ọgaranya na-enwe ọganihu n’amamihe na ihe ọmụma ndị Kraịst bụ́ ndị dị mma karịa akụ na ụba. (Ilu 2:​1-⁠9; Eklisiastis 7:12) Mmadụ nile​—⁠ndị ọgaranya na ndị ogbenye⁠—​pụrụ imere onwe ha aha magburu onwe ya n’ebe Chineke nọ. (Eklisiastis 7:1) N’oge Pọl, ọgbakọ ndị Kraịst bụ nke ndị nọ n’ọkwá dị ala mejupụtara n’ụzọ ka ukwuu​—⁠ụfọdụ n’ime ha bụ ndị ohu⁠—​bụ́ ndị jiri nnwere onwe ọ bụla nke ọnọdụ ha nyere ha mee ihe n’ụzọ amamihe.​—⁠1 Ndị Kọrint 1:​26-⁠29.

Ịbụisi nke Akwụkwọ Nsọ Kwadoro

N’alụmdi na nwunye nke onye Kraịst, onye bụ nwunye nọ n’okpuru di ya​—⁠ndokwa a haziri iji baara ezinụlọ dum uru. (Ndị Efesọs 5:​22-⁠24) Onye bụ nwunye ò kwesịrị iche na e wedara ya ala n’ihi nke a? Ọ dịghị ma ọlị. Di na nwunye bụ ndị na-arụkọ ọrụ ọnụ. Ịbụisi nke nwoke, mgbe e mere ya n’ụzọ yiri nke Kraịst, na-atụkwasị ihe mgbochi ole na ole n’ahụ nwunye ya ma na-ahapụrụ ya ọtụtụ ohere ịchọpụta nkà ndị o nwere. (Ndị Efesọs 5:​25, 31) ‘Nwanyị ahụ na-ejide onwe ya’ nke Ilu isi 31 bụ onye ji ọrụ ndị na-adọrọ mmasị na ndị siri ike n’aka. N’ụzọ doro anya, ịnọ n’okpuru di ya abụrụghị ya ihe na-akpasu iwe.​—⁠Ilu 31:​10-⁠29.

N’otu aka ahụ, e meghị ndokwa ọ bụla ka nwanyị butere ndị ikom ruru eru ụzọ n’ọgbakọ ndị Kraịst. (1 Ndị Kọrint 14:34; 1 Timoti 2:​11, 12) Ndị inyom bụ́ ndị Kraịst hà kwesịrị inwe obi ilu n’okpuru ihe mgbochi ahụ? Ee e. Ihe ka n’ime ha na-enwe ekele ịhụ ka a na-elekọta akụkụ ahụ nke ije ozi ndị Kraịst n’ụzọ ọchịchị Chineke. Obi dị ha ụtọ irite uru site ná nlekọta ọzụzụ atụrụ na izi ihe nke ndị okenye a họpụtara ahọpụta ma na-etinye onwe ha n’ọrụ ahụ dị mkpa nke ime nkwusa na ime ndị na-eso ụzọ. (Matiu 24:14; 28:19, 20) Ndị inyom bụ́ ndị Kraịst na-arụzu ihe dị ukwuu n’akụkụ a, nke a na-ewetakwara ha nsọpụrụ n’anya Jehova Chineke.​—⁠Abụ Ọma 68:11; Ilu 3:35.

Ihe Mgbochi n’Ebe Ndị Na-eto Eto Nọ

Ndị na-eto eto kwa na-eme mkpesa mgbe ụfọdụ na e gbochiri ndụ ha gabiga ókè, ọtụtụ mgbe n’ihi na ha nọ n’okpuru ịchịisi nke ndị mụrụ ha. Ma nke a bụkwa nke Akwụkwọ Nsọ kwadoro. (Ndị Efesọs 6:1) Kama ịbụ ndị ihe mgbochi ndị mụrụ ha tụkwasịrị ha kpasuru iwe, ndị Kraịst na-eto eto bụ́ ndị maara ihe na-elekwasị anya n’inweta ọṅụ ná nnwere onwe ndị ha nwere​—⁠nke na-agụnyekarị nnwere onwe pụọ n’ibu ọrụ ndị dị arọ. Otú a, ha pụrụ iji ike na ọnọdụ ntorobịa ha mee ihe iji kwadebe onwe ha maka ndụ mgbe e toruworo ogo mmadụ.

Otu onye bụbu onye nlekọta sekit na Brazil ka na-echeta nnọọ otu nwatakịrị nwoke dị afọ 12 nke so n’otu ìgwè dịpụrụ adịpụ bụ́ onye e gbochiri n’ihe ndị ọ pụrụ ime. Onye na-elekọta ihe ndekọ ji ọrụ ego n’aka, o nweghịkwa ike ịdị na-elebara ìgwè ahụ anya nke ukwuu, ma o mere ndokwa ka nwatakịrị nwoke a na-enyere ya aka. Ọ maara ebe fọm nile dị, dịkwa njikere mgbe nile inye aka. Mmasị ya bụ nke na-agba ume, ọ bụkwa onye ibe na-ekwesị ntụkwasị obi n’ozi ubi. Nwa okorobịa ahụ bụ onye okenye a họpụtara ahọpụta ugbu a.

E nwere ọtụtụ ọnọdụ ndị pụrụ ịkpara nnwere onwe mmadụ ókè. Ụfọdụ bụ ndị ọrịa na-egbochi. Ụfọdụ na-ebi n’ezinụlọ ndị kewara ekewa na-ahụkwa ka ọchịchọ dị iche iche nke di ma ọ bụ nwunye na-ekweghị ekwe kpaara nnwere onwe ha ókè. Ọ bụ ezie na ọ ga-adị ndị ahụ nwere ihe mgbochi ka ya bụrụ n’ihe dịtụ iche, ha ka pụrụ ibi ndụ na-enye afọ ojuju. Magazin a edewo ọtụtụ ihe banyere ndị dị otú ahụ bụ́ ndị bụworo ihe oké agbamume nye ndị ọzọ n’ihi na ha na-adabere n’ebe Jehova nọ ma jiri ọnọdụ ha na-eme ihe kasịnụ ha pụrụ ime.

N’ikwu banyere otu ọnọdụ nke a na-ahụkarị n’oge nke ya, Pọl onyeozi sịrị: “À kpọrọ gị mgbe ị bụ ohu? ya egbula gị mgbu n’obi: ma ọ bụrụkwa na ị pụrụ inwere onwe gị, karịa nke ahụ were ya mee ihe.” (1 Ndị Kọrint 7:21) Lee otú o si bụrụ ile ihe anya n’ụzọ ziri ezi! Ọnọdụ ụfọdụ na-agbanwe. Ndị na-eto eto na-etopụta. Ndị di ma ọ bụ nwunye na-emegide emegide mgbe ụfọdụ na-anata eziokwu. A mawo na ọnọdụ akụ na ụba na-emeziwanye. Ndị na-arịa ọrịa pụrụ ịgbaketụ. N’ọnọdụ ndị ọzọ, ọ pụrụ ịbụ na ihe agaghị agbanwe ruo mgbe ụwa ọhụrụ Jehova bịara. Otú o sina dị, gịnị ka a gaje irite site n’iwe iwe n’ihi na mmadụ enweghị ike ime ihe ndị ọzọ nwere ike ime?

Ọ̀ dịtụwo mgbe i kiriri nnụnụ ka ha na-efegharị n’eluigwe n’elu ụwa wee nwee mmasị n’ịma mma na nnwere onwe nke mfegharị ha? Ma eleghị anya ọ dị gị ka ya bụrụ na i nwere ike ife otú ahụ. Otú ọ dị, ị pụghị, ọ dịghịkwa mgbe ị ga-enwe ike ife otú nnụnụ si efe! Ma o yiri ka ị dịghị eme mkpesa. Kama nke ahụ, ị na-aṅụrị ọṅụ n’ikike ndị Chineke nyere gị. Ị na-eme nke ọma ịdị na-agagharị n’elu ala. N’otu aka ahụ, n’agbanyeghị ihe bụ ọnọdụ anyị ná ndụ, ọ bụrụ na anyị etinye uche n’ihe ndị anyị pụrụ ime kama iwe iwe n’ihi ihe anyị na-apụghị ime, ndụ ga-abụ ihe na-enye afọ ojuju, anyị ga-achọtakwa ọṅụ n’ozi Jehova.​—⁠Abụ Ọma 126:​5, 6.

[Foto dị na peeji nke 28]

Ị̀ na-eche na ndị mụrụ gị na-egechibido gị?