Jiri Ozi Gị Dị Nsọ Kpọrọ Ihe

IJI ruo ihe mgbaru ọsọ ọ bụla bara uru, anyị aghaghị ịdị njikere ịchụ àjà ụfọdụ. Ịghọ onye dọkịta na-ewe ọtụtụ afọ nke ịmụ ihe na mkpebi siri ike, tinyere ego. Onye na-eme egwuregwu mmega ahụ nke nwere ihe ịga nke ọma etinyewo ihe ka n’oge ntorobịa ya nile na-arụ ọrụ n’usoro ndị ji nke nta nke nta na-esiwanye ike ná nchụso na-adịghị ada ada nke izu okè. Onye nwere nkà n’ịkpọ ngwá egwú piano pụrụ ileghachi anya azụ n’otu aka ahụ n’afọ ndị ahụ ọ na-eme mmụgharị e tinyere uche nile na ya.

Otú ọ dị, e nwere otu ihe mgbaru ọsọ nke na-eweta nkwụghachi ụgwọ dị ukwuu karịa àjà ọ bụla a pụrụ ịchụ n’ihi ya. Gịnị ka ọ bụ? Ọ bụ ihe ùgwù nke ịbụ onye na-ejere Onye Kasị Ihe Nile Elu, bụ́ Jehova Chineke ozi. Àjà ọ bụla anyị chụrụ n’ụdị oge, ego, ma ọ bụ ike, ihe ùgwù nke ijere Onye Okike anyị ozi dị nsọ na-eweta nkwụghachi ụgwọ ndị a na-apụghị ịtụ n’ihe ọ̀tụ̀tụ̀. Okwu ndị ahụ nke Pọl onyeozi bụ eziokwu: “Nsọpụrụ Chineke bara uru nye ihe nile, ebe o nwere nkwa nke ndụ, ma nke ndụ ugbu a ma nke gaje ịbịa.” (1 Timoti 4:8) Ka anyị lee otú nke ahụ si bụrụ eziokwu.

Mgbe Mbụ Anyị Mụtara Banyere Chineke

Ihe ka ná ndị na-azaghachi nke ọma n’ozi ọma ahụ malitekwa ịmụ Bible ma eleghị anya adịghị amata ókè mgbanwe ndị ọ ga-arụpụta ná ndụ ha ga-aharu. Nke mbụ, onye ọhụrụ na-amụ Bible pụrụ ịtụfu ndị enyi ụfọdụ ndị na-apụghị ịghọta ihe mere na ọ nakwaghị esonyere ha ná nchụso ndị ọ na-amata ugbu a dị ka ndị na-adịghị asọpụrụ Chineke. (1 Pita 4:4) Ụfọdụ pụrụ inweta mmegide ezinụlọ, bụrụkwa ndị ọ pụrụ iwute ịhụ ka ndị ha hụrụ n’anya na-egosipụta enweghị mmasị, ọbụna ịkpọasị, n’ebe Jehova nọ. (Matiu 10:36) Nke ahụ pụrụ ịbụ àjà siri ike ịchụ.

N’ebe ọrụ ma ọ bụ n’ụlọ akwụkwọ, a ga-enwekwa àjà a ga-achụ. Onye ọhụrụ ahụ na-amụ Bible ka oge na-aga ga-akwụsị ikere òkè ná nnọkọ oriri na ememe ndị ọzọ dị iche iche nke ụwa. Ọ gakwaghị na-aṅa ntị n’okwu na-adịghị ọcha nke ndị ọrụ ma ọ bụ ụmụ akwụkwọ ibe ya, ma ọ bụkwanụ soro ha na-agbanwerịta okwu ndị rere ure. Kama nke ahụ, ọ ga-agbalị itinye ndụmọdụ ahụ a na-achọta ná Ndị Efesọs 5:​3, 4 n’ọrụ: “Ma ịkwa iko, na adịghị ọcha nile, ma ọ bụ anyaukwu, ka a ghara ịkpọ ọbụna aha ya n’etiti unu, dị ka o kwesịrị ndị nsọ; ma ọ bụ ihe ihere, ma ọ bụ ikwu okwu nzuzu, ma ọ bụ okwu na-abaghị n’ihe, nke na-ekwesịghị: ma kama nke ahụ ikele ekele.”

Mgbanwe ndị dị otú ahụ pụrụ ime onye ahụ na-amụ Bible onye a kpapụrụ iche. Nke ahụ pụrụ isi ike karịsịa nye onye ntorobịa ka nọ n’ụlọ akwụkwọ. N’inwe otu ezumike ma ọ bụ ọzọ ọ na-eche ihu, tinyere ozizi ndị na-emegide Chineke, dị ka evolushọn, na nrụgide na-adị oge nile nke isonyere ìgwè mmadụ, ndị Kraịst na-eto eto aghaghị ịnọ na-alụ ọgụ oge nile maka okwukwe ahụ. Ịgbaso ụzọ nile nke Chineke ga-eme ha ka ha dị iche, ọ pụkwara ịrụpụta ịkwa emo site n’aka ụmụ akwụkwọ ibe ha na ndị nkụzi. Nke a siri ike ịnakwere karịsịa n’agbata afọ iri na atọ na iri na itoolu bụ́ afọ ndị ihe na-emetụtakarị mmadụ n’ahụ, ma nnwapụta nke Chineke ruru àjà ahụ.

Hà Bụ Àjà n’Ezie?

Ihe ndị ọzọ na-eyi ka ha bụ àjà ná mmalite na-emesịa ghọọ ngọzi. Ụfọdụ aghaghị ịhapụ àgwà ise ụtaba. (2 Ndị Kọrint 7:1) Nke a pụrụ ịbụ mgba na ọgụ, ma lee aha ngọzi ọ bụ mgbe e mesịrị merie omume ọjọọ ahụ! A pụkwara ikwu otu ihe ahụ banyere imeri iri ahụ nke ọgwụ ọjọọ ndị ọzọ ma ọ bụ mmanya na-aba n’anya. Lee ka ndụ si bụrụ nke ka mma ma e nweghị àgwà ndị na-ebibi ebibi dị otú ahụ! Ndị ọzọ aghaghị idozi okwu alụmdi na nwunye ha. Ndị na-ebikọ n’alụghị di na nwunye aghaghị ịlụ ma ọ bụ kwụsị ibikọ ọnụ. (Ndị Hibru 13:4) Ndị nwere ọtụtụ nwunye ha na ha bi aghaghị ịnọgide nanị ha na nwunye ha lụrụ n’okorobịa. (Ilu 5:18) Mgbanwe ndị dị otú ahụ na-agụnye ịchụ àjà, ma ha na-eweta udo n’ezinụlọ.

Chee Echiche Banyere Nkwụghachi Ụgwọ Ya

Ihe ịrụ ụka adịghị ya, onye ọ bụla nke na-erubere iwu Jehova isi na-erite uru n’ezie. Nke mbụ ná ndụ ya, onye ahụ na-amụ Bible na-amalite ịgwa Onye Okike ya okwu na-eji aha Ya, bụ́ Jehova, eme ihe. (Abụ Ọma 83:18) Onye ahụ na-amụ ihe na-abịa hụ Jehova n’anya ka ọ na-amụta banyere ihe ndị dị ebube O meworo na ndị ọ ka ga-emere ihe a kpọrọ mmadụ. Ná mba dị iche iche ebe ịtụ ụjọ ndị nwụrụ anwụ zuru ebe nile, ọ na-atụfu ụjọ nkwenkwe ụgha nke a, na-amara na ndị nwụrụ anwụ nọ n’ụra na-echere mbilite n’ọnwụ. (Eklisiastis 9:​5, 10) Lee aha ahụ efe ọ bụ ịghọta na Jehova adịghị ata ndị mmadụ ahụhụ ruo mgbe ebighị ebi n’ime hell! Ee, eziokwu ahụ na-eme n’ezie ka ọ pụọ n’ohu.​—⁠Jọn 8:32.

Ka onye mmụta ahụ na-ekwekọkwu ndụ ya karị n’ụkpụrụ Jehova, ọ na-enweta akọ na uche dị ọcha na ùgwù onwe onye. Ịmụta ibi ndụ dị ka ezi onye Kraịst na-enyere ya aka ilekọta ezinụlọ ya nke ọma karị, bụ́ nke na-eweta oké afọ ojuju na ọṅụ. E nwekwara ịbịa nzukọ ndị Kraịst n’Ụlọ Nzukọ Alaeze. Lee ahụmahụ na-enye obi ụtọ ọ bụ! Ndị a bụ ndị na-egosi n’ezie ịhụnanya ahụ na-ekpo ọkụ nke Bible kwuru na a ga-eji mata ndị Chineke. (Abụ Ọma 133:1; Jọn 13:35) Okwu ha dị ọcha ma na-ewuli elu ka ha na-ekwu “banyere oké ọrụ nile nke Chineke.” (Ọrụ 2:11) Ee, izute “òtù ndị bụ ụmụnna” bụ ihe na-enye obi ụtọ. (1 Pita 2:17) Ụdị mkpakọrịta ọma dị otú ahụ na-enyere onye ahụ na-amụ Bible aka ‘iyikwasị mmadụ ọhụrụ ahụ, nke e kere dị ka Chineke chọrọ n’ime ezi omume na ịdị ọcha nke eziokwu ahụ.’​—⁠Ndị Efesọs 4:24.

Nzọụkwụ nke Nraranye

Ka mmadụ na-aga n’ihu n’ihe ọmụma, ịhụnanya maka Jehova na-emesị kpalie ya ịrara ndụ ya nye ya na igosipụta nke a site na baptism ime mmiri. (Matiu 28:​19, 20) Ndụmọdụ Jisọs bụ na tupu e were nzọụkwụ nke a, ka ndị na-eso ụzọ ya gụkọọ ihe ọ ga-efu. (Luk 14:28) Cheta, onye Kraịst raara onwe ya nye na-ebute uche Jehova ụzọ ma na-agbakụta ihe nke anụ ahụ azụ. Ọ na-arụsi ọrụ ike ịhapụ “ọrụ nile nke anụ ahụ” ma zụlite “mkpụrụ nke Mmụọ Nsọ.” (Ndị Galetia 5:​19-⁠24) Ndụmọdụ ahụ a na-achọta ná Ndị Rom 12:2 na-arụ ọrụ ka zuo ezuo ugbu a ná ndụ ya: “Unu ekwekwala ka e mee ka unu yie ajọ oge a: kama ka e nwoghaa unu site n’ime ka uche unu bụrụ ihe ọhụrụ, ka unu wee nwapụta ihe bụ ihe Chineke na-achọ, bụ ezi ihe nke dịkwa Ya ezi ụtọ nke zukwara okè.” Otú a, onye Kraịst raara onwe ya nye na-eji echiche nke inwe nzube nke e mere ka ọ dịghachi ọhụrụ na-ebi ndụ ya.

Ma, tụlee ihe ọ na-enweta. Nke mbụ, o nweela ugbu a mmekọrịta onwe onye nke ya na Onye Okike nke eluigwe na ala. A na-agụ ya n’onye ezi omume n’olileanya nke ịbụ enyi Chineke! (Jemes 2:23) N’inwe nghọta dị omimi karị, ọ na-agwa Chineke okwu dị ka “Nna anyị Nke bi n’eluigwe.” (Matiu 6:9) Ngọzi ọzọ na-abịara onye ọhụrụ ahụ raara ndụ ya nye bụ ịmata na ndụ nwere nzube n’ezie, nakwa na ya na-ebi ndụ ya n’ụzọ kwekọrọ ná nzube ahụ. (Eklisiastis 12:13) N’ịgbaso idu ndú nke Jisọs, ọ pụrụ ime Ekwensu onye ụgha site n’ịnọgide na-ekwesị ntụkwasị obi. Lee ọṅụ nke ahụ na-ewetara obi Jehova!​—⁠Ilu 27:11.

Otú ọ dị, ka onye Kraịst na-atachi obi n’ụzọ ahụ nke ikwesị ntụkwasị obi, e nwere àjà ndị ọzọ a ga-achụ. Ọ na-ewe oge iji nwee ọmụmụ ihe nwere nzube nke onwe onye na nke ọgbakọ nke Okwu Chineke. (Abụ Ọma 1:​1-⁠3; Ndị Hibru 10:25) A ghaghị ịzụchapụta oge maka ozi ubi site n’ihe omume ndị ọzọ. (Ndị Efesọs 5:16) A chọkwara oge na mgbalị iji jee nzukọ Ndịàmà Jehova na iji jee mgbakọ ha dị iche iche. Ọ pụrụ ịchọ iji onwe onye chụọ àjà iji kere òkè n’iji ego kwadoo Ụlọ Nzukọ Alaeze na ọrụ ime nkwusa zuru ụwa ọnụ. Otú ọ dị, dị ka ọtụtụ nde ndị Kraịst pụrụ ịgba akaebe ya, iji obi dum na-ekere òkè n’ụdị ihe ndị ahụ na-eweta obi ụtọ. Jisọs sịrị: “Ọ dị ngọzi inye ihe karịa ịnara ihe.”​—⁠Ọrụ 20:35.

Ụgwọ ọrụ nke ịkwado ọrụ Jehova na-emesịa karịa ihe ndị ọ na-ewe. Ka anyị na-eto ná ntozu okè, ozi anyị na-aghọ nke na-amịpụta mkpụrụ, na-enyekwa ọṅụ karị. N’ezie, ọ dịghị ihe pụrụ iweta afọ ojuju dị ukwuu ka ịkụziri onye ọzọ eziokwu Bible na ịhụ ka onye ahụ na-anakwere ofufe Jehova. Ọ bụrụkwa na onye ọhụrụ ahụ na-efe ofufe bụ onye òtù ezinụlọ, ma eleghị anya nwa nke a zụliteworo ‘n’ịdụ ọdụ nke Onyenwe anyị,’ nke ahụ na-eweta ọṅụ pụrụ iche. (Ndị Efesọs 6:4) Anyị na-ahụ ngọzi bara ụba nke Jehova ná mgbalị anyị ịbụ ‘ndị anyị na ya na-arụkọ ọrụ.’​—⁠1 Ndị Kọrint 3:9.

Ụgwọ Ọrụ Ndị Ọzọ Maka Ozi Ikwesị Ntụkwasị Obi

N’eziokwu, anyị ga-enwe nsogbu ruo ogologo oge usoro ihe nke a dịruru. O yiri ka nsogbu ahụ ga-esiwanye ike ka oge Ekwensu na-adịwanye mkpirikpi. Anyị pụrụ inweta mkpagbu ma ọ bụ idi ọnwụnwa. Ma ịmata na Chineke nọnyeere anyị na-akasi anyị obi na-enyekwa anyị ume iji tachie obi. (1 Ndị Kọrint 10:13; 2 Timoti 3:12) Ụfọdụ ndị Kraịst ibe anyị ediwo ọtụtụ afọ nke mmeso obi ọjọọ, ma ha nọgidere n’ihi ịhụnanya ha maka Chineke. Ndị na-atachi obi n’ụdị ule dị iche iche n’ụzọ na-aga nke ọma na-enwe ụdị mmetụta nke ndị ozi ahụ nwere mgbe a pịara ha ihe wee hapụ ha ka ha laa. Ọrụ Ndị Ozi 5:41 na-akọ, sị: “Ya mere ha siri n’ihu nnọkọ ikpe ahụ laa, na-aṅụrị na a gụrụ ha ná ndị kwesịrị ka e mee ha ihe ihere n’ihi Aha ahụ.”

Ụgwọ ọrụ nke ntachi obi karịrị nke ukwuu ihe ọ na-ewe ọbụna ugbu a. Ma cheta, nsọpụrụ Chineke “nwere nkwa” ọ bụghị nanị nke “ndụ ugbu a” kamakwa “nke gaje ịbịa.” (1 Timoti 4:8) Lee ka olileanya nke onye na-atachi obi si magbuo onwe ya! Ọ bụrụ na i kwesịrị ntụkwasị obi, ị ga-alanarị oké mkpagbu ahụ nke ga-aka ọgwụgwụ nke usoro ihe nke a akara. Ma ọ bụ ọ bụrụ na ị nwụọ tupu ihe omume ahụ ga-eme ihe akụkọ, a ga-akpọlite gị n’ọnwụ banye n’ime ụwa ọhụrụ ahụ nke ga-esochi. (Daniel 12:1; Jọn 11:​23-⁠25) Chee echiche banyere mmetụta oké ọṅụ ị ga-enwe mgbe ahụ mgbe ị ga-enwe ike ikwu, sị: “Site n’enyemaka Jehova, enwetawo m ya!” Lee ka o si bụrụ ihe na-akpali akpali iketa òkè n’ụwa ahụ, bụ nke ‘ihe ọmụma Jehova ga-ejupụta, dị ka mmiri si ekpuchi oké osimiri.’​—⁠Aịsaịa 11:9.

Ee, ọ na-efu ihe ijere Chineke ozi. Ma e jiri ya tụnyere ụgwọ ọrụ ya, ihe ọ na-efu dị nnọọ ntakịrị. (Ndị Filipaị 3:​7, 8) N’ihi ihe nile Chineke na-emere ndị na-ejere ya ozi ugbu a na ndị ọ ga-eme n’ọdịnihu, anyị na-ekwughachi okwu ndị ahụ nke onye ọbụ abụ: “M̀ ga-esi aṅaa nyeghachi Jehova mmeso ọma Ya nile O mesoworo m?”​—⁠Abụ Ọma 116:12.