‘Ihe Atụ nke Njikọ na Òtù Ụmụnna’

Otú ahụ ka otu nwanyị si kọwaa omume Ndịàmà Jehova mgbe otu onye òtù ezinụlọ ya nwụnahụrụ ya. Ọ na-akọwa, sị:

“N’aha mụ na ndị ezinụlọ m, ọ ga-amasị m ikele Ndịàmà nke ọgbakọ na-asụ asụsụ Italian n’ime Freiburg, Germany. E wezụga nwanne m nwoke bụ́ Antonio na nwunye ya, bụ́ Anna, ezinụlọ m abụghị Ndịàmà Jehova. Anyị akatọwo nhọrọ okpukpe ha ruo ogologo oge, ọ bụ ezie na anyị akwanyeworo ya ùgwù mgbe nile.

“Otú ọ dị, ugbu a anyị aghaghị ịgbanwe obi anyị. N’eziokwu, anyị ahụwo ihe atụ nke òtù ụmụnna na ịhụnanya nke anyị na-agaraghị atụ anya ya ma ọlị.

“N’ụzọ dị mwute, Anna nwụchuru ọnwụ n’ihe mberede okporo ụzọ. Ebe anyị bi n’Itali, anyị nwere ike ịnọ nwanne m nwoke bụ́ Antonio na ụmụ ya nso nanị ruo n’ókè ụfọdụ. Otú ọ dị, ụmụnna ya bụ́ Ndịàmà abịawo inye aka. Ha enyeworo ya aka site n’ọnụnọ ha nọ ya, okwu ha, okwukwe ha, nkwado ihe onwunwe, omume, na nke ego ha. Ebe m na-apụghị ikele ọgbakọ ahụ n’onwe m, m ga-achọ ikele ha site na magazin unu maka ihe atụ ha nke njikọ na òtù ụmụnna nke anyị na-agaghị echefu.”

E nwere obi ekele maka okwu obiọma nke nwanyị a. Dị ka o kwuru, Ndịàmà Jehova bụ òtù ụmụnna zuru ụwa ọnụ. (1 Pita 2:17) Ha na-azụlite mmekọrịta ịhụnanya siri ike n’etiti onwe ha, na-amara na ịhụnanya bụ “ihe nkekọ nke izu okè.” (Ndị Kọlọsi 3:14) Ọbụna n’ọnọdụ ọdachi kasịnụ, bụ́ nke pụrụ ịdakwasị anyị nile, Ndịàmà Jehova na-araparasi ike n’ebe Chineke na ndị ya nọ.—Ilu 18:24; Eklisiastis 9:11; Jọn 13:34, 35.