Ndị Na-eto Eto, ‘Na-emenụ Ihe Ga-ewetara Unu Nzọpụta’

1. Gịnị mere baptizim ji dị ezigbo mkpa? (Lee ihe e sere ná mmalite isiokwu a.)

KWA afọ, a na-eme ọtụtụ puku ndị anyị na-amụrụ ihe baptizim. Ọtụtụ n’ime ha bụ ndị na-eto eto, ụfọdụ n’ime ha erubeghịdị afọ iri na atọ. O nwere ike ịbụ na a mụrụ ha n’ọgbakọ. Ì so na ha? Ọ bụrụ otú ahụ, i mere nke ọma. E kwesiri ime Onye Kraịst ọ bụla baptizim, ka e nwee ike ịzọpụta ya, nakwa ka ọ dịrị ndụ mgbe ebighị ebi.—Mat. 28:19, 20; 1 Pita 3:21.

2. Gịnị mere na ụjọ ekwesịghị ịtụ gị inyefe Jehova onwe gị?

² Ọ bụ eziokwu na baptizim na-eme ka Jehova na-agọzi anyị, ma e nwere ọtụtụ ọrụ ị ga-arụ. Olee ụdị ọrụ ọ bụ? N’ụbọchị ahụ e mere gị baptizim, nwanna kwuru okwu baptizim jụrụ gị, sị: “N’ihi àjà Jizọs Kraịst chụrụ, ì chegharịala, hapụ mmehie gị, nyefeekwa Jehova onwe gị ime uche ya?” Ị zara ee. Ihe a ị zara bụ nkwa i kwere Jehova na ị ga na-ahụ ya n’anya, nakwa na ị ga na-eji ofufe ya kpọrọ ihe karịa ihe ọ bụla ọzọ. Nkwa a abụghị obere ihe. Ì kwesịrị ịkwa mmakwaara maka ya? Mbanụ. Ị gaghị akwa mmakwaara ma i kwe ka Jehova na-eduzi gị. Ndị na-amaghị Jehova so n’ụwa Setan. Ekwensu achọghị ka a zọpụta gị. Nke bụ́ eziokwu bụ na obi ga-atọ ya ụtọ ma ndụ ebighị ebi kwaa gị, n’ihi na ị na-efe ya ma jụ ka Jehova na-achị gị.

3. Olee otú Jehova sirila gọzie gị n’ihi na i nyefere ya onwe gị?

³ Chegodị otú Jehova sirila gọzie gị n’ihi na i nyefere ya onwe gị, e meekwa gị baptizim. Ugbu a i nyeferela ya onwe gị, i nwere ike iji obi ike kwuo, sị: “Jehova nọnyeere m; agaghị m atụ egwu. Gịnị ka mmadụ pụrụ ime m?” (Ọma 118:6) O nweghị ihe ọma karịrị mmadụ ikwe ka Chineke na-eduzi ya, nakwa ịmata na o ji gị na-eme ọnụ.

IHE Ị GA-EJI AKA GỊ EKPEBI

4, 5. (a) Gịnị mere anyị nwere ike iji kwuo na mmadụ inyefe Jehova onwe ya bụ ihe mmadụ ga-eji aka ya ekpebi? (b) Olee nsogbu ndị nwere ike ịbịara Onye Kraịst ọ bụla n’agbanyeghị afọ ndụ ya?

⁴ Ebe ị bụ Onye Kraịst emerela baptizim, adịm ná mma gị na Chineke adịghị ka ụlọ ma ọ bụ ala i nwere ike iketa n’aka ndị mụrụ gị. Ọ bụ gị ga-eme ihe a ga-eji azọpụta gị, ọ bụrụgodị na gị na ndị mụrụ gị ka bi. Gịnị mere o ji dị mkpa ka i buru ya n’obi? Ọ bụ n’ihi na anyị amaghị ụdị ọnwụnwa nwere ike ịbịara anyị echi. Dị ka ihe atụ, ọ bụrụ na e mere gị baptizim mgbe ị na-erubeghị afọ iri na atọ, e nwere ike inwe ihe ọhụrụ ndị ị ga na-eche nakwa nsogbu ọhụrụ ndị gị na ha na-alụ ugbu a ị na-erubeghị afọ iri abụọ. Otu nwa agbọghọbịa kwuru, sị: “Iwe agaghị ewe nwatakịrị bụ́ Onyeàmà Jehova n’ihi na ọ taghị keeki e ji cheta ụbọchị ọmụmụ n’ụlọ akwụkwọ ha. Ma, n’ime afọ ole na ole mgbe agụụ inwe mmekọahụ ga-agụsi ya ike, e kwesịrị ime ka o kwetasie ike na irubere iwu Jehova isi ga-akacha abara ya uru mgbe niile.”

⁵ Ma, ọ bụghị naanị ndị na-eto eto na-enwe nsogbu ndị ọhụrụ ha na ha na-alụ. Ma ndị e mere baptizim mgbe ha torola eto na-enwe ọtụtụ nsogbu ha na-atụghị anya na ọ ga-abịara ha. Ụfọdụ n’ime ha nwere ike ịbụ nsogbu ndị a na-enwe na alụmdi na nwunye, ọrịa, ma ọ bụ inweta ọrụ. N’agbanyeghị afọ ndụ anyị, onye ọ bụla n’ime anyị kwesịrị ịnọgide na-eme ihe dị Jehova mma ma nsogbu bịara anyị.—Jems 1:12-14.

6. (a) Gịnị ka ọ pụtara na i kwere Jehova nkwa na ị ga na-efe ya n’agbanyeghị ihe ọ bụla merenụ? (b) Olee ihe ị ga-amụta ná Ndị Filipaị 4:11-13?

⁶ Ka i nwee ike na-eme ihe dị Jehova mma, echefula na i kwere Jehova nkwa na ị ga na-efe ya n’agbanyeghị ihe ọ bụla merenụ. Nke a pụtara na ị gwara Ọkaakaa eluigwe na ụwa na ị ga na-efe ya ọ bụrụgodị na ndị enyi gị ma ọ bụ ndị mụrụ gị akwụsị ife ya. (Ọma 27:10) N’agbanyeghị ihe ọ bụla merenụ, na-arịọ Jehova ka o nyere gị aka imezu nkwa i kwere ya.—Gụọ Ndị Filipaị 4:11-13.

7. Gịnị ka ‘iji egwu na ịma jijiji’ na-eme ihe a ga-eji zọpụta gị pụtara?

⁷ Jehova chọrọ ka ị bụrụ enyi ya. Ma, ị ga-agbalịsi ike na-eme ka gị na ya bụrụ enyi ma na-eme ihe a ga-eji azọpụta gị. Ndị Filipaị 2:12 kwuru, sị: “Jirinụ egwu na ịma jijiji na-eme ihe ga-ewetara unu nzọpụta.” Ihe a gosiri na i kwesịrị ichebara otú gị na Jehova ga-esi nọgide na-adị ná mma echiche, ma na-eme ihe ọ chọrọ n’agbanyeghị nsogbu ọ bụla nwere ike ịbịara gị. I kwesịghị ịna-eche na i mekataghị kwụsị ife Jehova. Ụfọdụ ndị ferela Jehova ọtụtụ afọ akwụsịla ife ya. N’ihi ya, olee ihe ndị nwere ike inyere gị aka ka ị na-eme ihe a ga-eji azọpụta gị?

ỊMỤ BAỊBỤL DỊ MKPA

8. Gịnị ka ịmụ Baịbụl n’onwe gị pụtara? Gịnịkwa mere o ji dị mkpa?

⁸ Ka anyị nwee ike ịbụ enyi Jehova, anyị kwesịrị ịna-ege ya ntị ma na-agwa ya okwu. Otú kacha mma anyị nwere ike isi na-ege ya ntị bụ ịna-amụ Baịbụl n’onwe anyị. Nke a pụtara na ị ga na-agụ Okwu Chineke nakwa akwụkwọ ndị anyị ji amụ Baịbụl. Ma ịmụ Baịbụl abụghị naanị iburu ihe ụfọdụ n’isi otú ahụ i nwere ike ime mgbe unu chọrọ ile ule n’ụlọ akwụkwọ. Kama, ọ dị ka ebe ị na-eme njem ka ị chọpụta ihe ọhụrụ banyere Jehova. Nke a ga-enyere gị aka ịbịaru Chineke nso, ya abịaruokwa gị nso.—Jems 4:8.

9. Olee ihe ndị nyerela gị aka ịmụ Baịbụl n’onwe gị?

⁹ Nzukọ Jehova ewepụtala ọtụtụ ihe nwere ike inyere gị aka ịmụ ihe nke ọma. Dị ka ihe atụ, na jw.org, e nwere isiokwu bụ́ “Ihe Ndị E Ji Amụ Baịbụl” dị n’ebe e dere “Ndị Na-eto Eto.” Ihe a nwere ike inyere gị aka ime ihe ndị ị mụtara ná ndị a kọrọ akụkọ ha na Baịbụl. E nwekwara ihe ọzọ na jw.org ga-enyere gị aka ịghọta ihe Baịbụl na-akụzi. Ọ dị n’ebe e dere “Ihe Ndị Ga-enyere Gị Aka.” Ha ga-enyere gị aka ime ka okwukwe gị sikwuo ike, nyekwara gị aka ịma otú ị ga-esi akọwara ndị ọzọ ihe ndị i kweere. I nwekwara ike ịhụ ihe ga-enyere gị aka ịna-amụ Baịbụl n’onwe gị n’isiokwu bụ́ “Ndị Na-eto Eto Na-ajụ, Sị . . . Olee Ihe M Nwere Ike Ime Ka Ịgụ Baịbụl Na-atọ M Ụtọ?” Ọ dị na Teta! April 2009. Mmadụ ịmụ Baịbụl na ichebara ihe ndị ọ na-amụ echiche ga-eme ka onye ahụ na-eme ihe a ga-eji azọpụta ya.—Gụọ Abụ Ọma 119:105.

EKPERE DỊ MKPA

10. Gịnị mere ekpere ji dị Onye Kraịst merela baptizim mkpa?

¹⁰ Mgbe anyị na-amụ Baịbụl, anyị na-ege Jehova ntị. Mgbe anyị na-ekpekwa ekpere, anyị na-agwa ya okwu. Onye Kraịst ekwesịghị iwere ekpere ka ihe ọ na-eme iji mezuo iwu ma ọ bụ ihe ọ ga na-eme ka ihe na-agaziri ya. Kama, ọ bụ otú anyị si agwa Onye kere anyị okwu. Jehova chọrọ ịnụ olu anyị. (Gụọ Ndị Filipaị 4:6.) Mgbe ị na-echegbu onwe gị n’ihi otu ihe ma ọ bụ ihe ọzọ, Baịbụl kwuru ka ị “tụkwasị Jehova ibu arọ gị.” (Ọma 55:22) Ì kwetara n’ihe a Baịbụl kwuru? Ọtụtụ nde ụmụnna ga-agwa gị na ihe a Baịbụl kwuru enyerela ha aka. O nwekwara ike inyere gị aka.

11. Gịnị mere i kwesịrị iji na-ekele Jehova mgbe niile?

¹¹ Ma, anyị ekwesịghị ikpe ekpere naanị mgbe anyị chọrọ ka Jehova nyere anyị aka. Baịbụl kwuru, sị: ‘Gosinụ na unu bụ ndị nwere ekele.’ (Kọl. 3:15) Mgbe ụfọdụ, anyị nwere ike na-echegbu onwe anyị banyere nsogbu anyị nke na anyị agaghị echeta ihe ọma niile Jehova meerela anyị. N’ihi ya, gbalịa mee ihe a. N’ụbọchị ọ bụla, chee ma ọ̀ dịkarịa ala ihe atọ Jehova meerela gị, ma kelee ya maka ihe ndị ahụ. Otu nwa agbọghọ aha ya bụ Abigail, bụ́ onye e mere baptizim mgbe ọ dị afọ iri na abụọ, kwuru, sị: “Echere m na anyị kwesịrị ikele Jehova karịa onye ọ bụla ọzọ ma n’eluigwe ma n’ụwa a. Anyị kwesịkwara ikele ya mgbe ọ bụla maka ihe ndị o meere anyị. Mgbe ụfọdụ, Abigail na-ajụ onwe ya ajụjụ a, sị: “Ọ bụrụ na anyị ekeleghị Jehova maka ihe ndị o meere anyị taa, ya eruo echi, ihe ndị ahụ efunahụ anyị, oleezi ihe anyị ji n’aka?”

URU Ọ BARA MMADỤ IJI AKA YA HỤ IHE NA-EGOSI NA JEHOVA DỊ MMA

12, 13. Gịnị mere o ji dị mkpa ka i chee banyere ihe ndị merela ná ndụ gị nke gosiri gị na Jehova dị mma?

¹² Jehova nyeere Eze Devid aka idi ọtụtụ nsogbu ndị bịaara ya. N’ihi ya, o kwuru ihe na-egosi na Jehova dị mma. Ọ sịrị: “Detụnụ Jehova ire ma hụ na ọ dị mma; Obi ụtọ na-adịrị dimkpa nke gbabara n’ime ya.” (Ọma 34:8) Amaokwu a na-egosi na ọ na-aba uru ka mmadụ jiri aka ya hụ ihe na-egosi na Jehova dị mma. Ị na-agụ Baịbụl na akwụkwọ anyị, na-aga ọmụmụ ihe, ị ga-amụta otú Chineke sirila nyere ndị ọzọ aka ịna-efe ya. Ma, ka gị na Jehova na-adịkwu ná mma, ị ga-ahụ otú Jehova si na-enyere gị aka. Olee ihe ndị merela ná ndụ gị nke gosiri gị na Jehova dị mma?

¹³ E nweela ụzọ dị iche iche Ndị Kraịst niile sirila chọpụta na Jehova dị mma. Jehova gwara onye ọ bụla n’ime anyị ka anyị bịaruo ya na Ọkpara ya nso. Jizọs kwuru, sị: “Ọ dịghị onye pụrụ ịbịakwute m ma ọ bụrụ na Nna m, bụ́ onye zitere m, adọtaghị ya.” (Jọn 6:44) Ì chere na ihe a Jizọs kwuru gbasara gị? Nwa okoro ma ọ bụ agbọghọ nwere ike ịna-eche, sị ‘Jehova dọtara ndị mụrụ m, mụ esorozie ha.’ Ma, mgbe i nyefere Jehova onwe gị, e meekwa gị baptizim, i gosiri na gị na Jehova adịla n’ezigbo mma. Ma ugbu a, ị marala onye ọ bụ n’eziokwu. Baịbụl gwara anyị, sị: “Ọ bụrụ na onye ọ bụla hụrụ Chineke n’anya, onye a bụ onye Ọ maara.” (1 Kọr. 8:3) Ejila ebere Jehova meere gị kwe ka ị nọrọ ná nzukọ ya eti epele.

14, 15. Olee otú ozi ọma nwere ike isi mee ka okwukwe gị sikwuo ike?

¹⁴ Otú ọzọ ị ga-esi chọpụta na Jehova dị mma bụ ma Jehova nye gị obi ike ị ga-eji gwa ndị ọzọ banyere ihe ndị i kweere. I nwere ike ime otú ahụ n’ozi ọma nakwa n’ụlọ akwụkwọ. Ọ na-esiri ụfọdụ ike izi ndị enyi ha ozi ọma n’ụlọ akwụkwọ. Ọ ga-abụ na ị ma ihe kpatara ya. O nwere ike ịbụ na ị na-eche banyere ihe ha ga-eme ma i zie ha ozi ọma. Izi ìgwè mmadụ ozi ọma nwere ike ịkacha tụọ gị ụjọ karịa izi ndị mmadụ ozi ọma otu otu. Gịnị nwere ike inyere gị aka?

¹⁵ Nke mbụ, chee ihe mere i ji kwetasie ike n’ihe ndị i kweere. Ùnu nwere ihe ndị ga-enyere gị aka ịghọta ihe Baịbụl na-akụzi n’asụsụ unu na jw.org? Ọ bụrụ na o doghị gị anya ma ùnu nwere ya, gbalịa chọọ ha. E wepụtara ha iji nyere gị aka ichebara ihe ndị i kweere echiche, ihe mere i ji kwere ha, na otú ị ga-esi agwa ha ndị ọzọ. Obi sichaa gị ike n’ihe i kweere, gị akwadebekwa nke ọma, ị ga-achọ ịkọrọ ndị ọzọ banyere Jehova.—Jere. 20:8, 9.

16. Olee ihe nwere ike ime ka i jiri obi ike na-agwa ndị ọzọ ihe ndị i kweere?

¹⁶ Ọ bụrụgodị na ị kwadebe nke ọma, ụjọ nwekwara ike na-atụ gị ịgwa ndị ọzọ ihe ndị i kweere. Otu nwanna nwaanyị dị afọ iri na asatọ, bụ́ onye e mere baptizim mgbe ọ dị afọ iri na atọ kwuru, sị: “Ama m ihe m kweere, ma mgbe ụfọdụ, ọ na-esiri m ike ịgwa ya ndị mmadụ.” Olee otú o si merie nsogbu a? O kwuru, sị: “M na-ejisi ike meda obi zie ha ozi ọma. Ụjọ anaghị atụ ụmụ klas m ikwu ihe ndị ha na-eme. Ụjọ ekwesịghịkwa ịtụ m ịgwa ha ihe ndị m kweere. N’ihi ya, m chọọ ịgwa mmadụ okwu, m na-ebido ịkọtụrụ ya akụkọ, dị ka, ‘mgbe m nọ na-amụrụ mmadụ Baịbụl ụnyaahụ, m . . . ’ M kwuchaa, mụ akọwakwa akụkọ ahụ m na-akọ. Ọ bụ eziokwu na ọ bụghị Baịbụl ka m malitere ikwu banyere ya, ma ọtụtụ mgbe, ndị mmadụ na-enwekarị mmasị ịma ihe m na-eme mgbe m na-amụrụ mmadụ Baịbụl. Mgbe ụfọdụ, ha na-ajụ m banyere ya. Otú a m si amalite ịgwa ha okwu na-eme ka ọ dịkwuoro m mfe izi ha ozi ọma. N’ikpeazụ, obi na-atọ m ụtọ.”

17. Olee ihe ọzọ ga-enyere gị aka izi ndị ọzọ ozi ọma?

¹⁷ Ọ bụrụ na ị na-akwanyere ndị ọzọ ùgwù ma na-eme ihe gosiri na ihe gbasara ha na-emetụ gị n’obi, o nwere ike ime ka ha kweta n’ihe ị na-ezi ha. Dị ka ihe atụ, e nwere otu nwa agbọghọ dị afọ iri na asaa aha ya bụ Olivia. E mere ya baptizim n’oge ọ bụ nwata. O kwuru, sị: “Mụ na ndị mmadụ kwurịtawa okwu, m na-atụkarị ụjọ ikwu banyere Baịbụl ka ha ghara iwere m ka onye bu chọọchị n’isi.” Ma, o mechara gbanwee obi ya. Kama ikwe ka ụjọ a ọ na-atụ na-echu ya ụra, Olivia kwuru, sị: “Ọtụtụ ndị na-eto eto amaghị ihe ọ bụla banyere Ndịàmà Jehova. Ọ bụ naanị anyị bụ Ndịàmà Jehova ha ma. N’ihi ya, otú anyị si akpa àgwà na otú anyị si emeso ha ihe ga-ekpebi ma hà ga-ege anyị ntị ma ọ bụ na ha agaghị ege. Olee ihe nwere ike ime ma ọ na-esiri anyị ike ịgwa ha ihe anyị kweere, na-eme ihere, ma ọ bụ ọnụ ana-ama anyị jijiji ma anyị na-ezi ha ozi ọma? Ha nwere ike lewe anyị anya ka ndị na-amaghị ihe ha na-eme. Ha nwedịrị ike na-akparị anyị n’ihi na anyị anaghị akata obi agwa ha okwu. Ma, ọ bụrụ na anyị akata obi na-agwa ha ihe anyị kweere mgbe niile, ha nwere ike ịna-akwanyere anyị ùgwù.”

NA-EME IHE GA-EWETARA GỊ NZỌPỤTA

18. Olee ihe ndị ị ga-eme a ga-eji azọpụta gị?

¹⁸ Anyị amụtala na mmadụ ịna-eme ihe a ga-eji azọpụta ya abụghị obere ọrụ. Ụfọdụ n’ime ha bụ ịna-agụ Baịbụl na ichebara ihe ndị ị na-agụ echiche, ikpe ekpere, na ịna-eche ụzọ dị iche iche Jehova sirila gọzie gị ná ndụ. Ime ihe ndị a ga-eme ka obi sie gị ike na Jehova bụ enyi gị. Nke a ga-eme ka ị na-agwa ndị ọzọ ihe i kweere.—Gụọ Abụ Ọma 73:28.

19. Gịnị mere na mbọ ọ bụla ị na-agba ime ihe a ga-eji azọpụta gị agaghị efu ọhịa?

¹⁹ Jizọs kwuru, sị: “Ọ bụrụ na onye ọ bụla chọrọ iso m n’azụ, ya jụ onwe ya ma bulie osisi ịta ahụhụ ya, na-eso m mgbe niile.” (Mat. 16:24) N’eziokwu, ọ bụrụ na anyị chọrọ iso Jizọs, anyị ga-enyefe Jehova onwe anyị, e meekwa anyị baptizim. Ọ ga-eme ka Jehova gọzie anyị mmaji kwuru mmaji ugbu a, anyị enwetakwa ndụ ebighị ebi n’ụwa ọhụrụ ya. N’ihi ya, mee ihe ọ bụla i nwere ike ime ka ị na-eme ihe a ga-eji azọpụta gị.