Na-ejegharị n’Okwukwe
1 Ọtụtụ nde mmadụ na-atụkwasị ndụ ha n’ihe onwunwe ha, jiri nzuzu na-atụkwasị obi n’ike aghụghọ nke akụ̀. (Mat. 13:22) Ha na-amụta ihe n’ụzọ siri ike mgbe akụ̀ ha furu ma ọ bụ bụrụ nke e zuuru ma ọ bụ ghọọ ihe nwere abamuru dị nta. A na-agba anyị ume ịgbaso ụzọ amamihe dị na ya karị, ịchụso akụ̀ ime mmụọ. (Mat. 6:19, 20) Nke a na-agụnye ‘ijegharị n’okwukwe.’—2 Kọr. 5:7.
2 A sụgharịrị okwu ahụ bụ “okwukwe” site n’okwu Grik nke na-enye echiche nke obi ike, ntụkwasị obi, nkweta siri ike. Ijegharị n’okwukwe pụtara iji obi ike n’ebe Chineke nọ na-eche ọnọdụ ndị siri ike ihu, na-atụkwasị obi n’ikike ya iduzi ijeụkwụ anyị na n’ịdị njikere ya ilekọta mkpa anyị. Jisọs setịpụrụ ihe nlereanya zuru okè; ọ tụkwasịrị uche n’ihe ndị dị mkpa n’ezie. (Hib. 12:2) N’otu aka ahụ, ọ dị anyị mkpa ịtụkwasị uche anyị n’ihe a na-adịghị ahụ anya, ihe ime mmụọ. (2 Kọr. 4:18) Anyị aghaghị iburu ejighị n’aka nke ndụ anyị dị ugbu a n’uche mgbe nile, na-anakwerekwa ndabere anyị kpam kpam n’ebe Jehova nọ.
3 Anyị aghaghịkwa ikwetasi ike na Jehova na-eduzi anyị site ná nzukọ ya a na-ahụ anya n’okpuru nduzi nke “ohu ahụ kwesịrị ka a tụkwasị ya obi, nke nwekwara uche.” (Mat. 24:45-47) Anyị na-egosipụta okwukwe anyị mgbe anyị “na-erubere ndị na-edu ndú isi” n’ọgbakọ. (Hib. 13:17, NW) Iji obi umeala soro ndokwa ọchịchị Chineke na-arụkọ ọrụ na-egosipụta ntụkwasị obi anyị na Jehova. (1 Pita 5:6) E kwesịrị ịkpali anyị iji obi anyị nile kwadoo ọrụ e nyeworo nzukọ a ịrụ. Nke a ga-adọta anyị nso karị n’ebe ụmụnna anyị nọ n’ihe nkekọ siri ike nke ịhụnanya na ịdị n’otu.—1 Kọr. 1:10.
4 Otú E Si Ewusiwanye Okwukwe Ike: Anyị agaghị ekwe ka okwukwe anyị kwụrụ otu ebe. Ọ dị anyị mkpa ime mgbalị siri ike iji mụbaa ya. Ịmụchi ihe anya, ekpere, na ịga nzukọ ga-enyere anyị aka iwusiwanye okwukwe anyị ike nke na, site n’enyemaka Jehova, ọ pụrụ ịnagide ule ọ bụla. (Efe. 6:16) Ì guzobewo usoro ime ihe dị mma maka ọgụgụ Bible kwa ụbọchị na ịkwadebe maka nzukọ? Ị̀ na-atụgharị uche mgbe mgbe n’ihe ị na-amụta, ị̀ na-agakwurukwa Jehova n’ekpere? Ọ̀ bụ omenala gị ịga nzukọ nile na ikere òkè na ha dị ka ohere kwere mee?—Hib. 10:23-25.
5 A na-anwapụta okwukwe siri ike site n’ezi ọrụ. (Jes. 2:26) Otu n’ime ụzọ kasị mma isi gosipụta okwukwe anyị bụ site n’ịkpọsara ndị ọzọ olileanya anyị. Ị̀ na-achọ ohere iji kerịta ozi ọma ahụ? Ị̀ pụrụ idozigharị ọnọdụ gị iji nwee ohere ime ihe karị n’ozi ahụ? Ị̀ na-etinye aro ndị anyị na-anata n’ọrụ iji meziwanye ọdịdị na ịdị irè nke ozi anyị? Ị̀ na-esetịpụ ihe mgbaru ọsọ ime mmụọ onwe onye, na-ejisikwa ike irute ha?
6 Jisọs dọrọ aka ná ntị megide itinyebiga onwe anyị ókè n’ihe ndị a na-eme kwa ụbọchị ná ndụ, na-ekwekwa ka nchụso ihe onwunwe ma ọ bụ ịchọ ọdịmma onwe onye mee ka echiche ime mmụọ anyị gbaa ọchịchịrị. (Luk 21:34-36) Anyị aghaghị ilezi anya otú anyị si na-ejegharị iji zere okwukwe anyị ikpu dị ka ụgbọ. (Efe. 5:15; 1 Tim. 1:19) Anyị nile nwere olileanya na n’ikpeazụ, anyị ga-enwe ike ikwupụta na anyị ‘agbasịwo mgba ọma ahụ, gbasịa ọsọ ahụ, debesịakwa okwukwe ahụ.’—2 Tim. 4:7.