Ihe Ndị Ị Ga-eburu n’Uche Gbasara Dọminikan Ripọblik

Otú Ala Ya Dị E kee agwaetiti Hispaniola ụzọ atọ, ụzọ abụọ n’ime ya bụ Dọminikan Ripọblik, nke ọzọ abụrụ Heiti. Na Dọminikan Ripọblik, e nwere oké ọhịa, nwee nnukwu ugwu dị iche iche, nwee osisi ndị dị n’akụkụ mmiri mgbọrọgwụ ha gbalitere elu, nweekwa ọzara. Ugwu kacha elu na Dọminikan Ripọblik bụ ugwu a na-akpọ Piko Dụate. Ọ dị puku mita atọ, na otu narị mita na iri asaa na ise. E nwere ájá ọcha n’akụkụ osimiri ndị dị na Dọminikan Ripọblik, nweekwa ndagwurugwu ndị na-eme nri n’ime ime obodo. Otu n’ime ndagwurugwu ndị a bụ nke a na-akpọ Ndagwurugwu Kibao.

Ndị Bi na Ya Ọtụtụ ndị Dọminikan Ripọblik si n’agbụrụ ndị Yurop na ndị Afrịka. Ma, e nwere agbụrụ ndị ọzọ na-ebuchaghị ibu bikwa na ya. Ọ bụ ndị Heiti kacha nnukwu n’agbụrụ ndị ọzọ a si esi bịa.

Asụsụ Ha Spanish bụ asụsụ ọtụtụ ndị na-asụ.

Ihe Ha Na-arụ Ndị Dọminikan Ripọblik na-emepụta sụga, kọfị, na sịga. Ha na-egwupụtakwa akụ̀ ndị dị n’ime ala, dị ka ọlaedo na ihe ndị ọzọ. Ọ bụ ihe ndị a ka ha na-ejikarị enweta ego. Ihe ọzọ na-enye ha ego bụ ụlọ ọrụ na-emepụta ihe dị iche iche, na ebe ndị njem na-abịa elegharị anya.

Otú Ebe ahụ Na-adị A na-enwe oge oyi na oge okpomọkụ na Dọminikan Ripọblik. E nwere ebe mmiri na-ezokarị na ebe mmiri na-anaghị ezocha. Mgbe ụfọdụ, oké ifufe na-akpa ike n’obodo a.

Nri na Egwuregwu Ha Ndị Dọminikan Ripọblik na-erikarị osikapa, àgwà, na akwụkwọ nri. Ha na-atakwa azụ̀, mkpụrụ osisi, na abịrịka e ghere eghe. Ha na-erikwa ose. A na-eji ụfọdụ n’ime ihe ndị a esi otu n’ime nri a ma ama n’obodo a. Aha ya bụ La Bandera Dominikana. Egwuregwu bezbọl, ịkụ egwú na ịgba egwú na-atọ ha ụtọ. Egwú kacha atọ ha ụtọ bụ egwú merengue. Ha na-akpọkarịkwa ụbọ, na-akụ ịgbà, na-egbu ọjà, na-ejikwa ihe ndị ọzọ akụ egwú.