Ihe Dị Oké Ọnụ Ahịa Karịa Ego

SITE N’AKA ONYE NTA AKỤKỌ TETA! NA CANADA

“[O] nyere nwa ya nwanyị onyinye dị nnọọ oké ọnụ ahịa karịa ọnụ ego ọ bụla,” ka otu uche akwụkwọ akụkọ bụ́ The Monitor nke Bridgetown, Nova Scotia, kwuru. Gịnị bụ onyinye ahụ? Ọ bụ “ihe nlereanya [ya] magburu onwe ya nke ịkwụwa aka ọtọ.”

Anna na nwa ya nwanyị bụ́ Tanya kwụsịrị n’otu ebe obibi a na-erekpọ ngwá ụlọ dị na ya ma zụrụ otu akpa ọcha Tanya ga-eji tinye Bible ya. Mgbe ha laruru ụlọ, Tanya dọpere otu zip dị n’ime akpa ahụ, o jukwara ya anya ịhụ akwụkwọ ego dị $1,000. Ozugbo ahụ, nne na nwa laghachiri n’ebe obibi ahụ a na-erekpọ ngwá ụlọ dị na ya ma nyeghachi nwanyị ahụ resịrị ha akpa ahụ ego ahụ. Ihe àmà gosiri na akpa ahụ a na-ejikebeghị mee ihe bụ nke nne ya nwụrụ n’oge na-adịbeghị anya, bụ́ onye rịara ọrịa Alzheimer’s, e nyochaghịkwa ya nke ọma tupu e ree ya. N’ịbụ onye nwere obi ekele dị ukwuu, nwanyị ahụ kwuru, sị: “O meela ka m maliteghachi ịtụkwasị mmadụ obi . . . Ọ dị mma ịmata na a ka nwere ndị na-akwụwa aka ọtọ.”

Isiokwu dị n’ihu akwụkwọ akụkọ ógbè ha nke kwuru banyere ihe ahụ merenụ hotara na Anna na-ekwu, sị: “Dị ka Ndịàmà Jehova, ọ dịghị ihe ọzọ anyị gaara eme. Anyị nwere [akọ na uche] e ji Bible zụọ. Anyị chọkwara ịkụziri Tanya ihe ziri ezi.” Akpa ọcha ọhụrụ ahụ ga-abụrụ Tanya ihe ncheta pụrụ iche banyere ihe mmụta n’ịkwụwa aka ọtọ.