Zere Ọnyà nke Ịgba Chaa Chaa

“Ịgba chaa chaa emetụtaghị ahụ́ ike m, achịkwakwara m ego ole m na-etinye n’ịgba chaa chaa. Ma ekwetara m na mgbe ọ bụla m gbara lọtrị, m na-ahọrọkarị ihe m weere dị ka nọmba ndị kasị ewetara m ihu ọma.”—Linda.

ỌTỤTỤ ndị na-agba chaa chaa na-azụlite nkwenkwe na nọmba ndị na-eweta ihu ọma ma ọ bụ ọgwụ isi ọma. E nwere ike ha agaghị eche na ha na-eji nkwenkwe ha ndị na-enweghị isi akpọrọ oké ihe, ma ka o sina dị, ha pụrụ ịnọgide na-enwe ha.

Ọbụna ụfọdụ ndị na-agba chaa chaa na-ekpeku Chineke ekpere, na-arịọ ya ka o nyere ha aka irite ihe n’egwuregwu nke ha họọrọ. Ma, Bible nwere ihe ndekọ nke nkatọ Chineke katọrọ ndị na-azọrọ na ha na-efe ya ofufe ma bụrụ ndị “na-edoro [chi nke Isi Ọma, NW] tebụl n’usoro.” (Aịsaịa 65:11) Ee, Chineke kpọrọ omume ndị na-akwalite nkwenkwe na-enweghị isi nke isi ọma, asị. Ịgba chaa chaa, dị ka o si dị nnọọ, na-akpali inwe ntụkwasị obi na-enweghị isi n’ihe a sị na ọ bụ Nwanyị Isi Ọma.

Ịgba chaa chaa na-akwalitekwa ịhụnanya ego n’enweghị ihere. N’etiti ọha na eze nke taa nke na-ejighị okpukpe kpọrọ ihe, ego n’onwe ya aghọwo ihe e ji mere chi, ịgba chaa chaa bụkwa ụzọ na-ewu ewu e si efe ya ofufe. Akatamkpo ụlọ ọkụ na-eri ego dị iche iche anọchiziela anya katidral ná ndụ ndị mmadụ, echiche ọhụrụ e nwekwara bụ na anyaukwu dị mma. Ndị na-eme nchọpụta ahụwo na ọnụ ọgụgụ buru ibu nke ndị na-aga n’ụlọ ọkụ na-eri ego kwuru na ha na-eme otú ahụ, ọ bụghị maka ntụrụndụ ma ọ bụ maka otú gburugburu ebe ahụ dị, kama ọ bụ iji rite “ego buru nnọọ ibu.” Otú ọ dị, Bible na-adọ aka ná ntị, sị: “Ịhụ ego n’anya bụ mkpọrọgwụ nke ụdị ihe ọjọọ nile, sitekwa n’ịchụso ịhụnanya nke a e duhiewo ụfọdụ pụọ n’okwukwe, ha ejiriwokwa ọtụtụ ihe mgbu dụpuo onwe ha aghara aghara.”—1 Timoti 6:10.

Ná 1 Ndị Kọrint 6:9, 10, Bible na-ekwu hoo haa, sị: “Ka a ghara iduhie unu. . . . Ndị na-ekpere arụsị . . . ma ọ bụ ndị anyaukwu . . . agaghị eketa alaeze Chineke.” Ọ bụghị nanị na anyaukwu bụ ọrịa na-akpa ọha mmadụ aka ọjọọ; kamakwa ọ bụ ọrịa ime mmụọ na-egbu egbu—ma ọ bụ ọrịa nwere ihe ngwọta.

Ha Nwetara Ike nke Ịgbanwe

“Anwara m ọtụtụ ugboro ịkwụsị ịgba chaa chaa,” ka Kazushige, bụ́ onye a kpọtụrụ aha n’isiokwu mbụ na-echeta. “Aghọtara m na chaa chaa m so ndị enyi m na-agba n’ahịrị ebe a na-eji ịnyịnya asọ mpi na-ebibi ezinụlọ m. Ego ndị m na-erite na-efunahụkarị m. Ọbụna agbafuru m ego nwunye m chekwara maka ọmụmụ nwa nke abụọ anyị na chaa chaa, emesịkwara m malite iji ego ụlọ ọrụ anyị na-agba chaa chaa. N’ihi ya, atụfuru m ùgwù onwe onye m kpam kpam. Nwunye m na-ebe ákwá mgbe mgbe, na-arịọkwa m ka m kwụsị ịgba chaa chaa, ma o kweghị m nnọọ nkwụsị.”

Kazushige maliteziri iso Ndịàmà Jehova na-amụ Bible. Ọ na-ekwu, sị: “Ka m na-agụkwu Bible, otú ahụ ka m na-enwekwu obi ike na Chineke dị nakwa na m ga-erite uru site n’ige ya ntị. Ekpebisiri m ike na site n’ike Chineke na-enye, m ga-akwụsị ịgba chaa chaa. N’ịbụ ihe ijuanya nye m, ọ bụghị nanị na mụ akwụsịwo ịgba chaa chaa kamakwa akpọwo m ya asị. Ugbu a, m cheta ahụhụ ịgba chaa chaa m wetaara ezinụlọ m, obi na-agbawa m. Lee ekele m nwere n’ebe Jehova Chineke nọ na o nyeere m aka ịkwụsị ịgba chaa chaa nke riri m ahụ́ nakwa na ọ na-enyere m aka ibi ndụ bara uru!”—Ndị Hibru 4:12.

John, bụ́kwa onye a kpọtụrụ aha n’isiokwu mbụ, malitekwara ịmụ Bible. Ọ na-echeta, sị: “Ọmụmụ Bible m nyeere m aka ịtụleghachi ọnọdụ m. Na nke mbụ ya, ahụrụ m n’ezie mbibi ịgba chaa chaa nọ na-ewetara mụ na ezinụlọ m. Abịara m ghọta na ịgba chaa chaa na-eme ka ndị mmadụ nwee àgwà nke ịchọ ọdịmma onwe onye nanị na anyaukwu—àgwà ndị Jehova kpọrọ asị. Ka m nọgidere na-amụ ihe, ịhụnanya m nwere n’ebe Jehova nọ mere ka m nwee ike ịkwụsị ịgba chaa chaa. Amalitere m ịgba chaa chaa n’ihi na m chọsiri ike inweta ndụ ka mma. Ugbu a m kwụsịworo ịgba chaa chaa, ma na-ejere Jehova ozi n’obi ụtọ, ọchịchọ ahụ emezuwo.”

Nwunye John, bụ́ Linda, kpebikwara isepụ aka n’ịgba chaa chaa. “Ọ dịbughị mfe,” ka ọ na-ekwu. “Ma mgbe mụ na di m malitere iso Ndịàmà Jehova na-amụ Bible, amụtara m ilekwasị anya n’ihe ndị ka mkpa ná ndụ. Amụtara m ọ bụghị nanị ịhụ ihe ndị Chineke hụrụ n’anya n’anya, kamakwa ịkpọ ihe ndị ọ kpọrọ asị asị, gụnyere ụdị nile nke anyaukwu. Tụkwasị n’inwe ndụ nwere nzube karị, enwere m ego ka ukwuu n’akpa m.”—Abụ Ọma 97:10.

Site n’iso Jehova Chineke na-enwe mmekọrịta, gị onwe gị kwa pụrụ inweta ikike na amamihe dị mkpa iji zere ọnyà nke ịgba chaa chaa. Ime otú ahụ ga-eme ka ọnọdụ ego gị, mmetụta uche gị, na ahụ́ ike ime mmụọ gị ka mma. Ị ga-enwezi obi ụtọ nke ịhụ n’onwe gị ịbụ eziokwu nke okwu ndị e dekọrọ n’Ilu 10:22, bụ́: “Ngọzi Jehova, nke ahụ na-eme mmadụ ọgaranya, ọ dịghị atụkwasịkwa ya ihe mwute.”

[Ihe odide gbatụrụ okpotokpo dị na peeji nke 21]

Ọ bụghị nanị na anyaukwu bụ ọrịa na-akpa ọha mmadụ aka ọjọọ; ọ bụkwa ọrịa ime mmụọ na-egbu egbu

[Igbe/Foto ndị dị na peeji nke 19]

Ịgba Chaa Chaa na Ike Karịrị Ike Mmadụ

N’otu akụkọ ha zigaara Òtù Na-amụ Banyere Mmetụta Ịgba Chaa Chaa Na-enwe ná Mba, ndị nnyocha nọ na Mahadum Duke zoro aka ná njikọ dị n’etiti ụzọ e si akpọsa ịgba chaa chaa na ikwere n’ike karịrị ike mmadụ. Akụkọ ahụ na-ekwu, sị: “Ọtụtụ mkpọsa [lọtrị] a na-eme bụ ndị na-elekwasị anya n’akụ̀ na ụba na ihe onwenwe n’ụzọ enweghị ihere . . . Ma nke a abụghị ịhụ ihe onwunwe n’anya nke na-akpata ịrụsi ọrụ ike na nnọgidesi ike kama a pụrụ iji ya tụnyere ịtụkwasị obi n’ike ndị karịrị ike mmadụ bụ́ ndị na-ejere ndị na-akpọku ha ozi nakwa n’oriọna majik, bụ́ ndị dabeere n’olileanya, nrọ na nkwenkwe na-enweghị isi. Onye manịja ebe ọ bụla a na-agba lọtrị maara na ọtụtụ n’ime ndị ahịa ya kasị mma na-eti ebe ha na-adabere na nkwenkwe onwe onye na-enweghị isi, chaatị ịgụ kpakpando, n’ịgbara onwe onye afa, nakwa ‘n’akwụkwọ nrọ’ ndị a na-asọpụrụ bụ́ ndị na-edepụta nọmba n’ikwekọ n’aha, akara ụbọchị, na nrọ dị iche iche. Kama imesi ya ike na nọmba nile nwere otu ohere ahụ nke ịbụ ndị a họọrọ nakwa na iji nọmba ndị na-ewu ewu agba chaa chaa ga-ebelata ego a tụrụ anya na a ga-akwụ mmadụ n’egwuregwu parimutuel, ebe ndị a na-agba lọtrị ahọrọwo ịgba ndị na-agba lọtrị ume ịhọrọ nọmba ndị dị ịrịba ama nye ha (ma nọgide na-eji ha eme ihe).”

[Foto ndị dị na peeji nke 20]

“Ịhụnanya m nwere n’ebe Jehova nọ mere ka m nwee ike inwere onwe m pụọ n’ịgba chaa chaa.”—John

“Tụkwasị n’ibi ndụ nwere nzube karị, enwere m ego ka ukwuu n’akpa m.”—Linda

[Foto ndị dị na peeji nke 20]

“N’ịbụ ihe ijuanya nye m, ọ bụghị nanị na mụ akwụsịwo ịgba chaa chaa kamakwa akpọwo m ya asị.”—Kazushige