N’ỤWA A NSOGBU JURU

4 | Na-enwe Olileanya

IHE MERE O JI DỊ MKPA

Nsogbu ndị juru n’ụwa na-eme ka ndị mmadụ na-echegbu onwe ha. Nchegbu a nwere ike ịkpatara ha ọrịa, meekwa ka obi koro ha n’elu. Ọtụtụ ndị nsogbu ndị a kparala aka ọjọọ enweghị olileanya. Gịnịzi ka ihe ndị a kpataara ha?

Ụfọdụ n’ime ha anaghịdị achọ iche gbasara ọdịnihu.
Ndị ọzọ na-aṅụ oké mmanya ma ọ bụ ọgwụ ike iji chefuo ụwa ha.
E nwere mmadụ ole na ole chere na ọnwụ kaara ha mma karịa ndụ. Ha na-ajụ, sị, “Oleezi ihe m nọ ndụ eme?”

Ihe I Kwesịrị Ịma

Nsogbu ụfọdụ i nwere ga-adị naanị obere oge, ihe nwekwara ike ịka mma mgbe ị na-atụghị anya ya.
Ọ bụrụgodị na nsogbu gị akwụsịghị, e nwere ihe ndị i nwere ike ịna-eme ga-enyere gị aka idi nsogbu gị.
Baịbụl kwuru na ihe ga-aka mma n’ọdịnihu, na nsogbu niile ndị mmadụ nwere ga-ebi.

Ihe Ndị I Nwere Ike Ime Ugbu A

Baịbụl sịrị: “Unu echegbula onwe unu mgbe ọ bụla maka echi, n’ihi na a ga-enwe ihe unu ga-eche banyere ya echi. Ihe ọjọọ nke ụbọchị nke ọ bụla ezuorola ya.”—Matiu 6:34.

Echegbula onwe gị maka echi. Ekwela ka ihe ndị ga-eme echi chuwe gị ụra nke na ị gaghịzi emeli ihe ndị i kwesịrị ime taa.

Naanị ihe ichegbu onwe gị maka ihe ọjọọ ndị nwere ike ime ga-eme bụ ikowekwu gị obi n’elu, meekwa ka obi gharazie isi gị ike na ihe ga-aka mma n’ọdịnihu.

OTÚ Ị GA-ESI DIE NSOGBU—Ihe Ndị Ga-enyere Gị Aka

TINYERE ỤWA GỊ OBIỌMA

Baịbụl sịrị: “Ụbọchị niile na-abụrụ onye na-ata ahụhụ nsogbu nsogbu, ma onye obi na-adị mma na-enwe obi ụtọ mgbe niile.” (Ilu 15:15) Ọ bụrụ na i kwe ka nsogbu ndị i nwere na-eme gị obi ọjọọ mgbe niile, o nwere ike ime ka ị ghara ịhụ ihe ndị ga-enyere gị aka. Ma, ọ bụrụ na ị na-etinyere ụwa gị obiọma, o nwere ike inyere gị aka ịma otú ị ga-esi merie nsogbu gị.

Belata oge i ji ege akụkọ ụwa. Etinyekwala obi gị niile n’ihe ị na-anụ na ya.
Ná ngwụcha ụbọchị ọ bụla, dee ihe ọma abụọ ma ọ bụ atọ meere gị n’ụbọchị ahụ.
Dee ihe ndị ị ga-eme n’ụbọchị, ka ihe ndị ị ga-ede bụrụkwa ihe ị ga-emeli. Kebisịa ihe ndị ị chọrọ ime n’ụbọchị ntakịrị ntakịrị. Ọ ga-eme ka obi tọọ gị ụtọ maka ihe ọ bụla i mechara n’ụbọchị ọ bụla.

KWE KA E NYERE GỊ AKA

Baịbụl sịrị: ‘Onye na-anọ iche anaghị anabata ezigbo amamihe.’ (Ilu 18:1) Ị gaghị apụtali n’olulu dị omimi n’onwe gị. Ma, ị ga-apụtali ma onye ọzọ nyere gị aka.

Gwa ndị ezinụlọ gị ma ọ bụ ndị enyi gị ka ha nyere gị aka.
Na-agbalịkwa ka ị chọta otú gịnwa ga-esi enyere ha aka. Imere ndị ọzọ ihe ọma ga-eme ka ị ghara ịna-echekarị gbasara nsogbu nke gị.
Ọ bụrụ na obi adaa gị mbà, gị ana-echekwa na ndụ ị dị enweghịzi isi, ọ ga-adị mma ka ị gaa ụlọ ọgwụ. Mgbe ụfọdụ, o nwere ike ịbụ ọrịa na-akpata ya. E nyerela ọtụtụ ndị ọ dị otú a aka mgbe ha gara ụlọ ọgwụ.a

a Teta! anaghị agwa mmadụ otú ọ ga-ahọrọ ka e si gwọọ ya.

Baịbụl Kwuru na Ihe Ga-adị Mma n’Ọdịnihu

Otu ọbụ abụ nke dịrị ndụ n’oge ochie sịrị: “Okwu gị bụ ọkụ m ji ahụ ebe m na-azọnye ụkwụ, bụrụkwa ìhè nke na-enwu n’ụzọ m.” (Abụ Ọma 119:105) Ka anyị hụ otú Baịbụl, bụ́ Okwu Chineke, si bụrụ ọkụ na ìhè.

N’abalị, ọ bụ ọkụ na-eme ka anyị hụ ebe anyị ga-azọnye ụkwụ. Baịbụl na-emekwara anyị ihe yiri ya. Ọ na-enye anyị ezigbo ndụmọdụ ga-enyere anyị aka mgbe ọ na-esiri anyị ike ikpebi ihe anyị ga-eme.

Ìhè na-eme ka anyị hụ ihe ndị dị anya dị anyị n’ihu. Otú ahụ ka Baịbụl na-emekwa ka anyị mata ihe ndị ga-eme n’ọdịnihu.

Ihe Akwụkwọ Nsọ bụ́ Baịbụl kọọrọ anyị abụghị naanị otú ụmụ mmadụ si malite, kama ọ kọkwaara anyị ihe ndị ga-eme ka anyị nwee ezigbo olileanya na ihe ga-adị mma n’ọdịnihu. Ọ kọwaara anyị ihe ndị a:

Otú ahụhụ si malite: Baịbụl sịrị na “mmehie si n’aka otu mmadụ bata n’ụwa, ọnwụ esikwa ná mmehie bata, ọnwụ wee gbasaa ruo mmadụ niile n’ihi na ha niile mehiere.”—Ndị Rom 5:12.

Ihe mere ọchịchị ụmụ mmadụ enweghị ike ime ka nsogbu anyị kwụsị: Baịbụl sịrị na ‘mmadụ enweghị ikike iduzi nzọụkwụ ya mgbe ọ na-eje ije.’ (Jeremaya 10:23) Nsogbu ndị juru n’ụwa gosiri na ihe a Baịbụl kwuru bụ eziokwu.

Ihe Chineke ga-eme ka nsogbu ụmụ mmadụ kwụsị: Baịbụl kwuru na “ọ ga-ehichapụkwa anya mmiri niile dị ha n’anya. Ọnwụ agaghịzi adị. Iru uju ma ọ bụ ibe ákwá ma ọ bụ ihe mgbu agaghịzi adị.”—Mkpughe 21:4.