AJỤJỤ NKE 5

Gịnị Ka M Ga-eme ma A Chọwa M Okwu n’Ụlọ Akwụkwọ?

IHE MERE AJỤJỤ A JI DỊ MKPA

Ihe i mere nwere ike ime ka ihe ka mma ma ọ bụ ka njọ.

GỊNỊ KA Ị GA-EME?

Chegodị banyere ihe atụ a: Thomas achọghị ịga ụlọ akwụkwọ taa, echi, ma ọ bụ ụbọchị ọzọ. Nsogbu ya malitere ọnwa atọ gara aga mgbe ụmụ akwụkwọ ibe ya ji ya na-agba asịrị. Ha gụrụ ya ọtụtụ aha. Mgbe ụfọdụ, otu onye na-akụpụ akwụkwọ ndị o ji n’aka ma mee ka ọ maghị ụma mee ya. Ọ bụrụ na ha dị ọtụtụ, otu onye na-esi n’azụ kwaa ya aka, ma ọ tụgharịa, ọ gaghị ama onye n’ime ha mere ya. Ụnyaahụ, ha si n’Ịntanet zitere ya ozi na ha ga-emesi ya ike . . .

Ọ bụrụ na ị bụ Thomas, gịnị ka ị ga-eme?

CHEGODỊ ECHICHE

Ọ pụtaghị na e nweghị ihe ị ga-emeli. Nke bụ́ eziokwu bụ na ị ga-emerili onye na-achọ gị okwu n’emetụghị ya aka. Olee otú ị ga-esi eme ya?

JIDE ONWE GỊ. Baịbụl sịrị: “Onye nzuzu adịghị ejide mmụọ ya ma ọlị, ma onye maara ihe na-ejideru ya n’isi.” (Ilu 29:11) Ọ bụrụ na i jide onwe gị ma gbachi nkịtị, ike nwere ike ịgwụ ndị na-achọ gị okwu.
EMEGWARALA. Baịbụl sịrị: “Ejila ihe ọjọọ akwụ onye ọ bụla ụgwọ ihe ọjọọ.” (Ndị Rom 12:17) Imegwara ga-eme ka ihe ka njọ.
GBAARA NSOGBU ỌSỌ. Baịbụl sịrị: “Onye maara ihe bụ onye hụrụ ọdachi gaa zoo.” (Ilu 22:⁠3) Gbasie mbọ ike ka ị gbaara ndị nwere ike ịchọ gị okwu ọsọ. Emekwala ihe ga-eme ka a chọọ gị okwu.
MEE IHE Ọ NA-ATỤGHỊ ANYA YA. Baịbụl sịrị: “Azịza dị nro na-eme ka ọnụma laa.” (Ilu 15:⁠1) I nwedịrị ike ikwu ihe na-atọ ọchị. Dị ka ihe atụ, ọ bụrụ na onye na-achọ gị okwu akpọọ gị akpa akpụ, i nwere ike ịchịtụ ọchị, sị ya, “Ọ dị ka ị̀ ma na m kwesịrị ifelatatụ.”
GBACHI YA NKỊTỊ. Otu nwa agbọghọ dị́ afọ iri na itoolu aha ya bụ Nora sịrị: “Ịgba nkịtị ga-egosi na ị bụ dimkpa nakwa na ị ka onye ahụ ike. Ọ ga-egosikwa na ị na-ejide onwe gị. Ọ bụ ihe onye na-achọ gị okwu na-agaghị emeli.”—⁠2 Timoti 2:⁠24.
GBALỊA KA Ị GHARA ỊNA-ATỤ ỤJỌ. Ndị ọchọ okwu na-amakarị ndị obi na-akaghị, ndị na-agaghị emegwara ma a chọọ ha okwu. Ma ike ga-agwụ ọtụtụ ndị ọchọ okwu ma ha hụ na i kweghị ka ha menye gị ụjọ.
GWA YA ONYE ỌZỌ. Otu onye bụ́bu onye nkụzi sịrị: “Ihe m na-agwa onye a na-achọ okwu bụ ka ọ gwa ya onye ọzọ. Ọ bụ ihe onye ahụ kwesịrị ime. O nwere ike ime ka ọchọ okwu ahụ ghara ịchọ onye ọzọ okwu.”

Ebe otu nwa okorobịa katara obi legide onye na-achọ ya okwu anya — Ịkata obi ga-eme ka i nwee ụdị ike onye na-achọ gị okwu na-enweghị

Ị̀ MAARA?

Ịchọ okwu abụghị naanị ịkụ mmadụ ihe, o nwekwara ike bụrụ:

Ịgwa mmadụ okwu ọjọọ. Otu nwa agbọghọ dị́ afọ iri abụọ aha ya bụ Celine sịrị: “Agaghị m echefu aha ndị ha kpọrọ m ma ọ bụ ihe ndị ha gwara m. Ha mere ka ọ dị́ m ka abaghị m uru, na a jụrụ m ajụ, nakwa na m dị iberiibe. Ọ gaara akara m mma ma a sị na a kụrụ m isi aba okpu.”
Ịkpapụ mmadụ iche. Otu nwa okorobịa dị́ afọ iri na asatọ aha ya bụ Haley sịrị: “Ụmụ akwụkwọ ibe m malitere ịgbara m ọsọ. Ha na-eme ka ọ dị́ ka ebe a na-anọ eri nri ehihie agaghị aba m, ya emezie ka mụ na ha ghara ịnọ. N’afọ ahụ niile, m na-ebe ákwá, e nweghịkwa onye mụ na ya na-anọ eri nri.”
Isi n’Ịntanet achọ mmadụ okwu. Otu nwa okorobịa dị́ afọ iri na anọ aha ya bụ Daniel sịrị: “Naanị mkpụrụ okwu ole na ole mmadụ dere na kọmputa nwere ike imebi aha onye ọzọ ma ọ bụdị kpatara onye ahụ nsogbu ọzọ. Ọ dị ka ihe na-enweghị ike ime eme. Ma, o nwere ike ime.”

**AJỤJỤ GBASARA ỊCHỌ OKWU**
ZAA EZIOKWU MA Ọ BỤ ỤGHA	AZỊZA
1 Ndị mmadụ na-achọ ibe ha okwu kemgbe ọtụtụ puku afọ.	1 Eziokwu. Dị ka ihe atụ, Baịbụl kwuru banyere ndị Nefilim. Aha a a kpọrọ ha pụtara “Ndị Na-akwatu Ndị Ọzọ.”—⁠Jenesis 6:⁠4.
2 Ịchọ okwu bụ naanị ihe egwuregwu. Ọ bụghị oké ihe. O nweghịkwa ihe ọ na-eme mmadụ.	2 Ụgha. Ịchọ okwu so n’ihe na-eme ka ọtụtụ ndị na-eto eto gbuo onwe ha.
3 Otú kacha mma ị ga-esi mee ka a kwụsị ịchọ gị okwu bụ ịchọgwara onye ahụ okwu.	3 Ụgha. Ọtụtụ mgbe, ndị na-achọ okwu na-esi ike karịa ndị ha na-achọ okwu. N’ihi ya, imegwara ha abaghị uru.
4 Ị hụ ebe a na-achọ mmadụ okwu, ọ kacha mma ka ị gba nkịtị.	4 Ụgha. E nweghị otú ị ga-esi nọrọ ebe a na-achọ mmadụ okwu gba nkịtị, ya abụrụ na aka gị dị ọcha. Ị hụ ebe a na-achọ mmadụ okwu gbachi nkịtị, ọ pụtara na ị na-akwado ịchọ okwu, ọ bụghị ime ka ọ kwụsị.
5 N’agbanyeghị na ndị na-achọ okwu na-etu ọnụ, ọtụtụ mgbe, obi anaghị esicha ha ike.	5 Eziokwu. Ọ bụ eziokwu na ụfọdụ ndị na-achọ okwu na-ebuli onwe ha elu, obi anaghị akacha ọtụtụ n’ime ha. Ha na-akparị ndị ọzọ ka ha nwee obi ụtọ.
6 Ndị na-achọ okwu nwere ike ịgbanwe.	6 Eziokwu. E nyere ndị na-achọ okwu aka, ha nwere ike ịgbanwe àgwà ha na otú ha si eche echiche.