A Tụbara Daniel n’Olulu Ọdụm

Eze ọzọ chịrị Babịlọn bụ Darayọs onye Midia. Darayọs chọpụtara na Daniel pụrụ iche. O mere ya onyeisi ndị ọnụ na-eru n’okwu na Babịlọn. Ndị a ọnụ na-eru n’okwu nọ na-emere Daniel anyaụfụ ma na-achọ otú ha ga-esi gbuo ya. Ha ma na Daniel na-ekpe ekpere ugboro atọ n’ụbọchị. Ọ bụ ya mere ha ji gwa Darayọs, sị: ‘Eze, e kwesịrị ime iwu ga-ekwu na ọ bụ naanị gị ka a ga na-arịọ arịrịọ. A ga-atụba onye ọ bụla dara iwu a n’olulu ọdụm.’ Ihe a ha kwuru masịrị Darayọs, ya ekweta ka e mee iwu ahụ, bịanyekwa aka na ya.

Ozugbo Daniel nụrụ iwu ọhụrụ a e mere, ọ lara n’ụlọ ya. O mepere windo ụlọ ya, gbuo ikpere n’ala, rịọwa Jehova arịrịọ. Ndị ahụ na-emere ya anyaụfụ kwooro bata n’ụlọ ya ma hụ ka ọ na-ekpe ekpere. Ha gbaara gakwuru Darayọs, sị ya: ‘Daniel na-enupụrụ gị isi. Ọ na-arịọ Chineke ya arịrịọ ugboro atọ n’ụbọchị.’ Darayọs hụrụ Daniel n’anya, ọ chọghịkwa ka e gbuo ya. Si n’ụtụtụ ruo ná mgbede, ọ nọ na-eche ihe ọ ga-eme ka a ghara igbu Daniel. Ma, Darayọs enwedịghị ike ịgbanwe iwu ọ bịanyerela aka na ya. N’ihi ya, ọ gwara ndị na-ejere ya ozi ka ha tụba Daniel n’olulu ọdụm.

Darayọs ehighị ụra n’abalị ahụ ebe ọ na-eche banyere Daniel. N’ụtụtụ echi ya, ọ gbaara ọsọ gaa n’ọnụ olulu ahụ ma kpọọ Daniel òkù, sị: “Chineke gị ọ̀ napụtara gị?”

Darayọs nụrụ olu. Ọ bụ olu Daniel. Ọ gwara Darayọs, sị: “Mmụọ ozi Jehova mechiri ọnụ ọdụm ndị a. Ha emeghị m ihe ọ bụla.” Obi tọrọ Darayọs ezigbo ụtọ. O nyere iwu ka a kpọpụta Daniel n’olulu ọdụm ahụ. Mgbe Daniel pụtara, o nweghị ihe ọ bụla mere ya. Eze nyeziri iwu, sị: “Tụbanụ ndị ahụ boro Daniel ebubo n’olulu ọdụm ahụ.” Mgbe a tụbara ha n’olulu ahụ, ọdụm ndị ahụ dọriri ha.

Darayọs nyere ndị niile ọ na-achị iwu, sị: “Ka mmadụ niile na-atụ Chineke Daniel egwu. Ọ napụtara Daniel n’aka ọdụm.”

Ị̀ na-ekpe ekpere kwa ụbọchị ka Daniel?