IHE ỌMỤMỤ NKE 4

Webata Akwụkwọ Nsọ Otú Dị Mma

Matiu 22:41-45

IHE I GA-EME: Buru ụzọ kwadebe obi ndị na-ege gị ntị tupu gị agụọrọ ha Akwụkwọ Nsọ.

Chọpụta ihe mere i ji agụ amaokwu ị chọrọ ịgụ. Buru ụzọ kwuo ihe ga-eme ka ndị na-ege gị ntị mata isi ihe mere i ji chọọ ịgụ ebe ị chọrọ ịgụ na Baịbụl.

Buru ihe ndị gbara amaokwu ị chọrọ ịgụ gburugburu n’obi. Ị chọọ ikwu aha onye kwuru ihe ahụ ị chọrọ ịgụ ma ọ bụ aha onye dere Baịbụl ahụ, jide n’aka na ihe ị ga-ekwu bụ eziokwu.
Gosi na Baịbụl bụ o kwuchaa o bie. Mgbe ị na-agwa ndị kweere na Chineke okwu, mee ka ha mata na Baịbụl bụ Okwu Chineke. Ọ ga-eme ka ha mata na ọ bụ na Baịbụl ka e si enweta amamihe kachanụ.
Mee ka ha nwee mmasị n’amaokwu ị chọrọ ịgụ. Jụọ ajụjụ amaokwu ị chọrọ ịgụ ga-aza. Gwa ha otu nsogbu ihe e dere n’amaokwu ahụ ga-egboro ha ma ọ bụkwanụ gị agwa ha ihe amaokwu ị chọrọ ịgụ ga-akọwa.

Chee gbasara ihe ndị ị na-agwa okwu ma banyere isiokwu gị nakwa amaokwu ahụ ị chọrọ ịgụ. Si otú ọzọ na-adọrọ mmasị gwa ha gbasara amaokwu Baịbụl ha mabu nke ọma, ka ha nwee ike ichebara ya echiche n’ụzọ ọzọ.