ISI NKE 49
Gịnị Ga-eme Ka Unu Na-enwe Obi Ụtọ n’Ezinụlọ Unu?—Nke 1
Nwoke na nwaanyị lụrụ ọhụrụ na-atụ anya ka ụdị obi ụtọ ha nwere ụbọchị ha gbara akwụkwọ dịrị ruo mgbe ebighị ebi. Ọ ga-adịlikwa otú ahụ. Ndị Kraịst lụterela di na nwunye aka, ndị na-agbakwa mbọ eme ihe Baịbụl kwuru, ga-ekweta na ọ ga-adịli otú ahụ.
1. Gịnị ka Baịbụl gwara di ka ọ na-eme?
Jehova mere di onyeisi ezinụlọ. (Gụọ Ndị Efesọs 5:23.) Jehova chọrọ ka ọ na-ekpebi ihe ndị ga-abara ezinụlọ ya uru. Baịbụl gwara ndị bụ́ di, sị: “Hụnụ nwunye unu n’anya.” (Ndị Efesọs 5:25) Gịnị ka ihe a Baịbụl kwuru pụtara? Di hụrụ nwunye ya n’anya na-egosi ya, ma n’ụlọ ma n’èzí, na ya dị obiọma. Ọ na-agba mbọ ka ihe ọ bụla ghara ime ya, na-eme ya obi ụtọ, na-egbokwara ya mkpa ya dị iche iche. (1 Timoti 5:8) Nke kacha mkpa bụ na ọ ga-enyere ya aka ka ya na Jehova dịrị n’ezigbo mma. (Matiu 4:4) Dị ka ihe atụ, ya na nwunye ya ga na-agụkọ Baịbụl ọnụ, na-ekpekọkwa ekpere ọnụ. Ọ bụrụ na nwoke ana-elekọta nwunye ya nke ọma, ya na Jehova ga-anọgide na-adị ná mma.—Gụọ 1 Pita 3:7.
2. Gịnị ka Baịbụl gwara nwunye ka ọ na-eme?
Okwu Chineke kwuru na nwunye kwesịrị “ịna-akwanyere di ya ezigbo ùgwù.” (Ndị Efesọs 5:33) Olee otú ọ ga-esi na-eme ya? O nwere ike ịna-echeta àgwà ọma ndị di ya na-akpa nakwa mbọ ọ na-agba ka o nwee ike ịna-elekọta ya na ụmụ ha. Otú ọzọ o nwere ike isi na-akwanyere di ya ùgwù bụ ịna-akwado ihe ndị di ya kpebiri ha ga-eme, ịna-emeda obi agwa ya okwu nakwa ịna-ekwu okwu ọma gbasara ya, ọ bụrụgodị na di ya anaghị efe Jehova.
3. Olee otú di na nwunye ga-esi na-adịkwu ná mma?
Baịbụl kwuru gbasara di na nwunye, sị: “Ha abụọ ga-abụkwa otu anụ ahụ́.” (Matiu 19:5) Ihe ọ pụtara bụ na ha ga na-agbasi mbọ ike ka ihe ọ bụla ghara itisa ha. Otú ha ga-esi eme ya bụ ịna-anọrị mgbe niile nakwa ịna-emeda obi agwa ibe ha ihe ọ bụla dị ha n’obi na otú obi dị ha. Ha ga na-agwa ibe ha okwu otú gosiri na ha hụrụ ibe ha n’anya. E wezụga Jehova, e nweghị onye ọzọ ma ọ bụ ihe ọ bụla ọzọ ha kwesịrị iji kpọrọ ihe karịa ibe ha. Ha kwesịkwara ịkpachara anya ka ha na onye ọ bụla ọzọ ghara ịdị ná mma gabiga ókè.
MỤTAKWUO IHE
Chọpụta ihe dị iche iche Baịbụl kwuru nwere ike ime ka gị na di gị ma ọ bụ nwunye gị dịkwuo ná mma.
4. Ndị bụ́ di, hụnụ nwunye unu n’anya, na-elekọtakwanụ ha nke ọma
Baịbụl kwuru na ‘ndị bụ́ di kwesịrị ịhụ nwunye ha n’anya otú ha si hụ ahụ́ nke ha n’anya.’ (Ndị Efesọs 5:28, 29) Gịnị ka ihe a o kwuru pụtara? Kpọnyenụ VIDIO a. Unu lechaa ya, unu eleba anya n’ajụjụ a:
Olee ụfọdụ ihe nwoke nwere ike ime iji gosi na ọ hụrụ nwunye ya n’anya, na-elekọtakwa ya?
Gụọnụ Ndị Kọlọsi 3:12. Unu gụchaa ya, unu eleba anya n’ajụjụ a:
Olee otú di ga-esi na-eme ihe amaokwu a kwuru?
5. Ndị bụ́ nwunye, hụnụ di unu n’anya, na-akwanyekwaranụ ha ùgwù
Baịbụl gwara ndị bụ́ nwunye ka ha na-akwanyere di ha ùgwù ma hà na-efe Jehova ma ọ bụ na ha anaghị efe ya. Gụọnụ 1 Pita 3:1, 2. Unu gụchaa ya, unu eleba anya n’ajụjụ ndị a:
Ọ bụrụ na di gị anaghị efe Jehova, o doro anya na ị chọrọ ka ọ bịa fewe ya. Olee ihe i chere ga-aka eme ka ọ bịa fewe ya, ọ̀ bụ ịna-eji ozi ọma asa ya ahụ́ ka ọ̀ bụ ịna-akpaso ya àgwà ọma ma na-akwanyere ya ùgwù? Gịnị mere i ji chee otú ahụ?
Di na nwunye gbakọọ aka, ha nwere ike ikpebi ihe dị mma. Ma, e nwekwara ike inwe oge ihe nwoke kpebiri na-agaghị adị nwunye ya mma. Ọ dị otú ahụ, o kwesịrị imeda obi gwa di ya ihe o chere ma kwanyere ya ùgwù. Ma, ọ ga-eburukwa n’obi na ọ bụ di ya ka Jehova nyere ikike ikpebi ihe ga-abara ezinụlọ ha uru. O kwesịrị ime ihe niile o nwere ike ime ka ọ kwado ihe di ya kpebiri. Ọ bụ otú a ka ọ ga-esi nye aka mee ka ha na-enwe obi ụtọ n’ezinụlọ ha. Gụọnụ 1 Pita 3:3-5. Unu gụchaa ya, unu eleba anya n’ajụjụ a:
Olee otú obi na-adị Jehova ma nwaanyị na-akwanyere di ya ùgwù?
6. Di na nwunye ga-edozili nghọtahie ha na-enwe n’ezinụlọ ha
O nweghị di na nwunye na-anaghị enwe nghọtahie. N’ihi ya, di na nwunye kwesịrị ịgbakọ aka dozie nghọtahie ndị ha na-enwe. Kpọnyenụ VIDIO a. Unu lechaa ya, unu eleba anya n’ajụjụ ndị a:
Olee ụfọdụ ihe gosiri na di na nwunye anyị hụrụ na vidio a adịchaghịzi ná mma?
Gịnị na gịnị ka ha mere iji dịrịkwa ná mma?
Gụọnụ 1 Ndị Kọrịnt 10:24 na Ndị Kọlọsi 3:13. Unu gụchaa amaokwu nke ọ bụla, unu eleba anya n’ajụjụ a:
Olee otú ime ihe ebe a kwuru nwere ike isi mee ka di na nwunye dịkwuo ná mma?
Baịbụl sịrị na anyị kwesịrị ịna-asọpụrụ ibe anyị. Otu n’ime ụzọ anyị si asọpụrụ mmadụ bụ igosi ya obiọma na ịkwanyere ya ùgwù. Gụọnụ Ndị Rom 12:10. Unu gụchaa ya, unu eleba anya n’ajụjụ ndị a:
Di ma ọ bụ nwunye ò kwesịrị ịna-atụ anya ka onye nke ọzọ buru ụzọ na-akwanyere ya ùgwù? Gịnị mere i ji zaa ihe ị zara?
ỤFỌDỤ NA-ASỊ na ha na di ha ma ọ bụ nwunye ha adịghịzi ná mma otú ha dịbu.
Olee otú ị ga-esi kọwaara ha na Baịbụl nwere ike inyere ha aka?
NCHỊKỌTA
Di na nwunye ga na-enwe obi ụtọ ma ha hụ ibe ha n’anya, na-akwanyere ibe ha ùgwù, na-emekwa ihe Baịbụl kwuru.
Ajụjụ ndị e ji echeta ihe a mụrụ
Olee otú di nwere ike isi mee ka ya na nwunye ya na-enwe obi ụtọ?
Olee otú nwunye nwere ike isi mee ka ya na di ya na-enwe obi ụtọ?
Ọ bụrụ na ị bụ di ma ọ bụ nwunye, olee amaokwu Baịbụl nwere ike inyere gị aka ime ka gị na nwunye gị ma ọ bụ di gị dịkwuo ná mma?
IHE Ị GA-ELEBAKWU ANYA
Chọpụta ihe ndị nwere ike inye aka mee ka unu na-enwe obi ụtọ n’ezinụlọ unu.
Lee vidio egwú a ka ị hụ uru ndị ị ga-erite ma ị na-eme ihe Baịbụl kwuru ka ndị di na nwunye na-eme.
Chọpụta ihe nwaanyị ido onwe ya n’okpuru di ya pụtara.
“Ndị Inyom, Olee Ihe Mere Unu Ji Kwesị Ido Onwe Unu n’Okpuru Ndị Nọ n’Isi?” (Ụlọ Nche, Mee 15, 2010)
Olee otú di na nwunye si dozie esemokwu ma ghara ịgba alụkwaghịm?