ỊMALITE MKPARỊTA ỤKA
IHE ỌMỤMỤ NKE 6
Na-akata Obi
Amaokwu Baịbụl ga-enyere gị aka: “Chineke nyeere anyị aka, anyị akata obi zie unu ozi ọma.”—1 Tesa. 2:2.
Ihe Jizọs Mere
1. Lee VIDIO, ma ọ bụ gị agụọ Luk 19:1-7. Zazie ajụjụ ndị a:
Gịnị nwere ike ime ka ụfọdụ ndị na-agbara Zakịọs ọsọ?
Gịnị mere Jizọs ji zie ya ozi ọma n’agbanyeghị ya?
Gịnị Ka Anyị Na-amụta n’Aka Jizọs?
2. Anyị kwesịrị ịkata obi ka anyị nwee ike izi onye ọ bụla anyị hụrụ ozi ọma.
Na-eme Ka Jizọs
3. Tụkwasị Jehova obi. Mmụọ nsọ Chineke mere ka Jizọs nwee ike izi ozi ọma. O nwekwara ike inyere gịnwa aka. (Mat. 10:19, 20; Luk 4:18) E nwee ndị ụjọ na-atụ gị ịgwa okwu, rịọ Jehova ka o mee ka ị kata obi zie ha ozi ọma.—Ọrụ 4:29.
4. Ekpebila na ndị mmadụ agaghị ege ntị. O nwere ike imewe anyị obi abụọ ịga zie ụfọdụ ndị ozi ọma n’ihi otú ha dị, ma hà bụ ogbenye ma hà bụ ọgaranya, ụdị ndụ ha na-ebi, ma ọ bụ okpukpe ha. Ma, cheta na:
Jehova na Jizọs na-ama ihe dị mmadụ n’obi; anyịnwa anaghị ama.
E nweghị onye Jehova na-agaghị emeliri ebere.
5. Na-akata obi ma na-akwanyere ndị mmadụ ùgwù, na-akpacharakwa anya. (Mat. 10:16) Gị na mmadụ arụla ụka. Jiri nwayọọ kwụsị mkparịta ụka ma ọ bụrụ na onye ị na-agwa okwu achọghị ige gị ntị ma ọ bụkwanụ ma i chee na ihe nwere ike ime gị n’ebe ahụ.—Ilu 17:14.