Ajụjụ Ndị Na-agụ Akwụkwọ Anyị Na-ajụ

Ego Ole Ka M Kwesịrị Inye n’Onyinye?

“Chineke hụrụ onye na-eji obi ụtọ enye ihe n’anya.” (2 Ndị Kọrịnt 9:7) Ọtụtụ nde mmadụ n’ụwa dum maara ihe a e dere n’amaokwu a. Ma, ụfọdụ ndị na-aga chọọchị nwere ike iche na ha kwesịrị inye karịa akpa ha. N’eziokwu, okpukpe ụfọdụ nwere ego ole a kapịrị ọnụ ha na-agwa ndị òtù ha ka ha na-enye. A na-akpọ ya inye otu ụzọ n’ụzọ iri, ya bụ, mmadụ ike ihe ọ na-akpata ụzọ iri ma nye chọọchị otu ụzọ.

Ò nwere ego ole Baịbụl kwuru ka anyị na-enye n’onyinye? E kwuo ya n’ụzọ ọzọ, Ego ole ka m kwesịrị inye n’onyinye?

Onyinye Chineke Gwara Ndị Ya Ka Ha Na-enye n’Oge Ochie na Ndị nke Ha Ji Aka Ha Nye

Na Baịbụl, e nwere ntụziaka doro anya Chineke nyere ụmụ Izrel banyere otú onyinye ọ chọrọ ka ha na-enye ga-aha. (Levitikọs 27:30-32; Ọnụ Ọgụgụ 18:21, 24; Diuterọnọmi 12:4-7, 11, 17, 18; 14:22-27) Ihe ndị a Chineke chọrọ n’aka ha akarịghị ha. Jehova kwere ndị ya nkwa na ọ bụrụ na ha erube isi n’iwu ya, ọ ga-eme ka ihe mba ahụ ‘na-emepụta dị nnọọ ukwuu.’—Diuterọnọmi 28:1, 2, 11, 12.

N’oge ndị ọzọ, ụmụ Izrel nwere ike iji aka ha kpebie ihe ha ga-enye, ma ò buru ibu ma ọ̀ dị ntakịrị. Dị ka ihe atụ, mgbe Eze Devid mere atụmatụ iwuru Jehova ụlọ nsọ, ndị ọ na-achị nyere “ọlaedo ruru puku talent ise” n’onyinye.a (1 Ihe E Mere 29:7) Jiri nke a tụnyere ihe Jizọs hụrụ mgbe ọ nọ n’ụwa. Ọ hụrụ “otu nwaanyị di ya nwụrụ nke dara ogbenye ka ọ tụnyere obere mkpụrụ ego abụọ nke ga-azụtali ihe dị nnọọ nta” n’igbe a na-atụnye ego n’ụlọ nsọ. Onyinye ahụ o nyere ọ̀ pụtara ego ole? Ọ bụ naanị otu ụzọ n’ụzọ iri isii na anọ nke ego a na-arụta n’ọrụ otu ụbọchị. N’agbanyeghị nke ahụ, Jizọs kwuru na Chineke nabatara obere ego ahụ.—Luk 21:1-4.

Ò Nwere Ego Ole A Kapịrị Ọnụ Ndị Kraịst Ga Na-enye?

Ndị Kraịst anọghị n’okpuru ọgbụgba ndụ Iwu ahụ Chineke na Izrel gbara. N’ihi ya, o nweghị ego ole a kapịrị ọnụ ha ga na-enye Chineke. N’agbanyeghị nke ahụ, n’ọgbakọ Ndị Kraịst, inye onyinye na-enye nnọọ ọṅụ. Jizọs Kraịst n’onwe ya kwuru, sị: “A na-enweta obi ụtọ ka ukwuu n’inye ihe karịa ka a na-enweta n’ịnara ihe.”—Ọrụ 20:35.

Ndịàmà Jehova na-enye onyinye afọ ofufo iji na-akwado ọrụ ikwusa ozi ọma ha na-arụ n’ụwa niile. A na-eji onyinye a ebipụta akwụkwọ, dị ka magazin a ị na-agụ, jirikwa ya na-ewu ma na-elekọta ebe ha na-efe ofufe nke a na-akpọ Ụlọ Nzukọ Alaeze. O nweghị ndị a na-eji ego a a na-enweta n’onyinye akwụ ụgwọ ọnwa. A na-enye ụfọdụ ndị wepụtara onwe ha ịrụ ọrụ ime ndị na-eso ụzọ oge niile ego mmachi akpa iji kwụọ ụgwọ ihe ha na-emefu n’ịgba ụgbọ na n’ilekọta onwe ha. Ma, o nweghị onye ọ bụla n’ime ha na-eji aka ya ekwu ka e nyere ya ụdị aka a. N’ezie, ọ dịghị ego a na-enye ihe ka nnọọ ukwuu ná Ndịàmà Jehova iji nyere ha aka n’ọrụ ikwusa ozi ọma ha na-arụ. Kama nke ahụ, ihe ka ukwuu n’ime ha na-arụ ọrụ ego iji na-elekọta onwe ha, dị nnọọ ka Pọl mere mgbe ọ rụrụ ọrụ ịkpa ákwà ụlọikwuu.—2 Ndị Kọrịnt 11:9; 1 Ndị Tesalonaịka 2:9.

Ego ole ka mmadụ kwesịrị inye ma ọ bụrụ na ọ chọrọ inye onyinye iji nye aka n’ọrụ Ndịàmà Jehova na-arụ? Pọl onyeozi dere, sị: “Ka onye ọ bụla nye dị ka o kpebiri n’obi ya, ọ bụghị ná mwute ma ọ bụ ná mmanye, n’ihi na Chineke hụrụ onye na-eji obi ụtọ enye ihe n’anya.”—2 Ndị Kọrịnt 8:12; 9:7.

[Ihe e dere n’ala ala peeji]