AJỤJỤ NDỊ BAỊBỤL ZARA
Gịnị mere Kraịst ga-eji abịa ọzọ?
Tupu Jizọs Kraịst alaghachi n’eluigwe n’afọ 33, o kwere nkwa na ya ga-abịa ọzọ. O ji onwe ya tụnyere otu nwoke si n’ezinụlọ eze. Nwoke a gara njem nọọ ogologo oge. Mgbe ọ na-alọta, e nyere ya ikike ịbụ eze. Ihe mere Jizọs ga-eji abịa ọzọ bụ ka o wetara ụmụ mmadụ ezigbo ọchịchị.—Gụọ Luk 19:11, 12.
Jizọs ga-ewetara ụmụ mmadụ ọchịchị dị mma
Mgbe Kraịst ga-abịaghachi, ọ̀ ga-abụ mmadụ ka ọ̀ ga-abụ mmụọ? Mgbe a kpọlitere ya n’ọnwụ, ọ ghọrọ mmụọ laghachi n’eluigwe. (1 Pita 3:18) N’eluigwe, ọ nọdụrụ ala n’aka nri Chineke. (Abụ Ọma 110:1) Mgbe ọtụtụ afọ gachara, Jehova Chineke, bụ́ onye a na-akpọ “Onye Ochie ahụ,” nyere Jizọs ikike ka ọ chịwa ụmụ mmadụ. N’ihi ya, Jizọs ga-abụ Eze a na-anaghị ahụ anya mgbe ọ ga-abịa ọzọ, ọ bụghị mmadụ.—Gụọ Daniel 7:13, 14.
Gịnị ka Jizọs ga-eme mgbe ọ ga-abịa ọzọ?
Mgbe Jizọs ga-abịa ọzọ, ya na ndị mmụọ ozi ya ga-eso. N’oge ahụ, ọ ga-ekpe ụmụ mmadụ ikpe, bibiekwa ndị ajọ omume. Ma, ọ ga-enye ndị kwetara ka ọ chịwa ha ndụ ebighị ebi.—Gụọ Matiu 25:31-33, 46.
Ọchịchị Jizọs ga-eme ka ụwa ghọọ paradaịs. Jizọs ga-akpọlite ndị nwụrụ anwụ n’ọnwụ ka ha dịrị ndụ mgbe ahụ ụwa ga-aghọ paradaịs.—Gụọ Luk 23:42, 43.