Ànyị Na-amụrụ Anya—Na-ezere Ihe Ndị Na-adọpụ Uche?

¹ Jisọs nyere ịdọ aka ná ntị, sị: “Mụrụnụ anya, . . . ka unu wee ka n’ike ịgbanarị” ọdachi ndị na-aghaghị ịbịa. (Luk 21:36) Anyị na-ebi n’oge kasị dị ize ndụ n’akụkọ ihe mere eme nke mmadụ. Ọdachi na-echere ndị dabara n’iro ụra ime mmụọ. Nke a na-abụrụ onye ọ bụla n’ime anyị ihe ize ndụ. Jisọs kpọtụrụ iri ihe, ịṅụ ihe ọṅụṅụ, na nchegbu nke ịdị ndụ kwa ụbọchị aha. N’ihi gịnị? N’ihi na ọbụna ihe ndị a pụrụ iwekọrọ oge anyị, ghọọ ihe ndị na-adọpụ uche, ma kpata iro ụra ime mmụọ dị ize ndụ.

² Ihe Ndị Na-adọpụkarị Uche: Ụfọdụ abụrụwo ndị ntụrụndụ gabigara ókè ma ọ bụ ndị a na-enyo enyo wekọọrọ oge ha, ọbụna na-aghọ ndị TV riri ahụ. N’eziokwu, ibu ụzọ na-achọ Alaeze ahụ apụtaghị na anyị aghaghị izere ụdị ntụrụndụ nile. Mgbe anyị ji ezi uche na imeru ihe n’ókè mee ihe, ntụrụndụ pụrụ ịbụ ihe bara uru. (Tụlee 1 Timoti 4:8.) Ma ọ bụ ihe ndọpụ uche mgbe ọ ghọrọ nnukwu ihe ná ndụ anyị, na-ewere ihe dị ukwuu n’oge anyị, ihe onwunwe anyị, ma ọ bụ n’òkè anyị na-ekere n’ọrụ nkwusa Alaeze ahụ.

³ Ihe ọzọ na-adọpụkarị uche nke na-akpata iro ụra ime mmụọ bụ ọchịchọ maka ihe onwunwe ndị na-adịghị mkpa. Nke a na-achọ ka mmadụ tinye oge karị n’ọrụ ego ma na-eme ka nchụso nke ihe ime mmụọ bụrụ ndị e wezụgara n’ụsọ. Ụfọdụ echefuwo ihe mgbaru ọsọ ime mmụọ site n’ịghọ ndị mikpuru onwe ha n’inweta ihe onwunwe dị iche iche iji nweta ụzọ ịdị ndụ ka doo ahụ. Ọ bụ ezie na “ihe oriri na ihe igbokwasị n’ahụ” dị anyị mkpa, anyị aghaghị iche nche megide ịzụlite ịhụ ego n’anya, bụ́ nke pụrụ iduhie anyị pụọ n’okwukwe ahụ. (1 Tim. 6:8-10) Site n’ịghara ilekwasị anya anyị n’ọdịmma nke Alaeze, anyị pụrụ ịda mbà n’ilekọta mkpa ime mmụọ nke ezinụlọ anyị wee ghara ijezu ozi anyị.—1 Tim. 5:8; 2 Tim. 4:5.

⁴ Ndị ọzọ na-ekwekwa ka ‘e were nchegbu nke ndụ a bogbuo obi ha’ ruo n’ókè nke na ha na-ada n’ụra n’ụzọ ime mmụọ. (Luk 21:34) Mgbe ụfọdụ, a na-enwe nchegbu n’ihi nsogbu ahụ ike ma ọ bụ ọnọdụ ihe isi ike ezinụlọ. Ma e kwesịghị ikwere ka nchegbu onwe onye ndị dị otú ahụ belata nghọta anyị banyere ọgwụgwụ na-eru nso nke usoro ihe nke a.—Mak 13:33.

⁵ Ọ dịghị ihe ga-atọ Ekwensu ụtọ karịa inwe ihe ịga nke ọma n’itinye anyị n’ọnọdụ nke yiri ịrọ nrọ, na-achụso echiche efu ụfọdụ nke ụwa. Anyị aghaghị ịlụ ọgụ iji mụrụ anya n’ụzọ ime mmụọ. Anyị maara na ‘ụbọchị Onyenwe anyị na-abịa dị ka onye ohi,’ ọ dịkwa mkpa na anyị nọ “na-eche nche nweekwa anya udo.” (1 Tesa. 5:2, 6) Ọ bụrụ na anyị achọpụta ihe àmà nke iro ụra n’ime onwe anyị, ọ bụ ihe dị ngwa ka anyị “yipụ ọrụ nile nke ọchịchịrị.”—Rom 13:11-13.

⁶ Ihe Ndị Ga-enyere Anyị Aka Ịmụrụ Anya: Gịnị bụ ihe enyemaka ndị ahụ? Ekpere dị mkpa. Anyị kwesịrị ikpe ekpere n’ewepụghị aka. (1 Tesa. 5:17) Ịnọ ọgbakọ ndị Kraịst nso ‘ga-akpasu anyị inwe ịhụnanya na ọrụ ọma dị iche iche.’ (Hib. 10:24) Iji obi eziokwu na-enyocha onwe anyị mgbe nile pụrụ inye aka iji mee ka anyị mụrụ anya n’ebe mkpa anyị nke imeri adịghị ike dị iche iche dị. (2 Kọr. 13:5) Àgwà ọmụmụ ihe onwe onye dị mma ga-eme ka anyị bụrụ ndị ‘a na-azụpụta n’okwu nile nke okwukwe.’ (1 Tim. 4:6) Ọ bụrụ na anyị adị uchu, anyị pụrụ inwe obi ike na anyị ga-enwe ike izere ihe ndị na-adọpụ uche, ‘na-eche nche, ma na-eguzosi ike n’okwukwe.’—1 Kọr. 16:13.