Jiri Obi Gị Dum!

¹ Anyị nwere ọtụtụ ihe mere anyị ga-eji nwee ekele n’ebe Jehova nọ. Ndị a na-agụnye ihe ndị o meworo n’oge gara aga, ndị ọ na-eme ugbu a, na ndị ọ gaje imere anyị n’ọdịnihu. Gịnị ka obi ekele anyị kwesịrị ịkwali anyị ime? Otu abụ Devid na-aza, sị: “M ga-agọzi Jehova na mgbe nile: mgbe nile ka otuto Ya ga-adị n’ọnụ m.”—Abụ Ọma 34:1.

² Bible na-egosi n’ụzọ doro anya na e nyere anyị iwu ime nkwusa. Nke a bụ ọrụ anyị na-arụ ‘site ná mkpụrụ obi anyị dum dị ka a na-arụrụ Onyenwe anyị ọrụ.’ (Kọl. 3:23) Olee ókè anyị ga-eme n’ozi ahụ ma ọ bụrụ na anyị ji obi anyị dum? Mgbe anyị tụlere ịhụnanya Jehova nwere n’ebe anyị nọ, n’ezie obi anyị na-akwali anyị ikere òkè sitere n’obi n’ịgwa ndị ọzọ banyere ya na nzube ya ndị dị oké ọnụ ahịa! A na-akwali anyị ime ihe anyị pụrụ ime.

³ Ọ ga-abụ ihe ezi uche dị n’ime ya ịtụ anya na onye ji obi ya dum eje ozi chọrọ ịtụkwasị uche ya n’ozi dị nsọ. Ọbụ abụ ahụ, onye o doro anya na o nwere mmetụta dị otú ahụ, kwupụtara, sị: “Ugbo asaa n’ụbọchị ka m toworo Gị.” (Abụ Ọma 119:164) Ndị nwere mmetụta yiri nke ọbụ abụ ahụ na-achọ iji ohere ndị dịnụ mee ihe iji too Jehova. Dị ka ọnọdụ ha nyere ohere ya, ha ji ịnụ ọkụ n’obi na-eje ozi ruo n’ókè o kwere mee.

⁴ Ohere Iji Too Jehova Gbara Anyị Gburugburu: Ọ bụghị iwu na anyị ga-echere ruo mgbe anyị na-ekere òkè n’ozi ọnụ ụzọ ruo n’ọnụ ụzọ tupu anyị ekwusaa ozi ọma. Ndị ọrụ ibe anyị, ụmụ akwụkwọ ibe anyị, ndị ikwu, na ndị a maara nke ọma, ọ dị ha nile mkpa ịnụ ozi Alaeze. Mgbe anyị na-eme njem, anyị pụrụ ịmalite mkparịta ụka nke pụrụ iduga n’ịgbara ndị gị na ha bakọrọ ụgbọ ala, ndị na-arụ ọrụ na họtel, ụlọ nri, ndị na-arụ ọrụ n’ebe a na-ere mmanụ ụgbọ ala, ma ọ bụ ndị na-anya tagzi àmà. Mgbe anyị nọ n’ụlọ, anyị pụrụ ịgbara ndị agbata obi ma ọ bụ ndị ọbịa àmà. Ọ bụrụ na e nyere anyị àkwà n’ụlọ ọgwụ, e nwere ndị nọọsụ, ndị dọkịta, na ndị ọrịa ndị ọzọ anyị pụrụ ikwusara ozi ọma n’ụzọ mberede.

⁵ Ịgba Àmà Mberede Na-arụpụta Ihe: Otu ụbọchị Ndịàmà abụọ na-aga ije n’otu ogige wee malite isoro otu nwa okorobịa ya na nwa ya na-akpagharị akparịta ụka. N’ikpeazụ, ya na nwunye ya natara eziokwu ahụ. Nwa okorobịa ahụ mesịrị mee ka a mata na nanị ná mkpirikpi oge tupu o zute Ndịàmà abụọ ahụ, o kpegaworo Chineke ekpere, na-arịọ sị, ‘Ọ bụrụ na ị dị adị, biko kwere ka m mata gị.’ O na-ele nzute ahụ e zutere ya n’ogige ahụ dị ka azịza Jehova nye ekpere ya.

⁶ Ndị ji obi ha nile na-achọ inyere ndị ọzọ aka n’ụzọ ime mmụọ na-enwe ọṅụ dị ukwuu. Ha matara na ozi dị otú ahụ, site ‘n’obi zuru okè,’ na-atọ Jehova ụtọ.—1 Ihe Eme. 28:9.