Nzukọ Na-akpasu Ọrụ Ọma

¹ Akụkụ abụọ dị oké mkpa nke ofufe anyị bụ ịga nzukọ ọgbakọ na ikere òkè n’ozi ubi. Ha abụọ na-aga ụkwụ na ụkwụ. Otu na-emetụta ibe ya. Nzukọ ndị Kraịst na-akpasu ọrụ ọma, nke kasị mma n’ime ha bụ ọrụ nkwusa Alaeze na ime ndị na-eso ụzọ. (Hib. 10:24) Ọ bụrụ na anyị akwụsị ịga nzukọ, n’oge na-adịghị anya anyị pụrụ ịkwụsị ime nkwusa n’ihi na a gaghị akpasu anyị ime otú ahụ.

² Ná nzukọ kwa izu, anyị na-anata ntụziaka ime mmụọ a haziri iji kpalie anyị ime nkwusa. A na-eme mgbe nile ka anyị mara banyere ịdị ngwa nke oge ndị a, na-akwali anyị iwegara ndị ọzọ ozi na-azọpụta ndụ nke Bible. A na-agba anyị ume ma na-ewusi anyị ike ịtachi obi n’ọrụ ime nkwusa. (Mat. 24:13, 14) Site n’iji ohere nke ịza ajụjụ ná nzukọ mee ihe, ọ na-amarakwu anyị ahụ ikwupụta okwukwe anyị n’ihu ndị ọzọ. (Hib. 10:23) Site n’idenye aha n’Ụlọ Akwụkwọ Ije Ozi Ọchịchị Chineke, anyị na-anata ọzụzụ iji ghọọ ndị ozi dịkwu irè na ime ka nkà izi ihe anyị ka mma.—2 Tim. 4:2.

³ Otú Nzukọ Ije Ozi Si Akpasu Anyị Ime Nkwusa: A na-agba anyị nile ume ileba anya n’ihe ọmụma dị n’Ozi Alaeze Anyị tupu oge eruo. A na-akụnyezi ihe ọmụma a n’uche anyị ka anyị na-aga Nzukọ Ije Ozi ma na-ahụ ụzọ iche ihe n’ihu mmadụ ndị e gosiri n’elu ikpo okwu. Mgbe anyị nọ n’ozi ubi, anyị pụrụ iche echiche laa azụ n’Ozi Alaeze Anyị, cheta ụzọ iche ihe n’ihu mmadụ ndị e gosiri, ma si otú a gbaa àmà dịkwu irè. Nke a abụwo ahụmahụ nke ọtụtụ ndị nkwusa.

⁴ Dị ka ụzọ iji sochie Nzukọ Ije Ozi, ụfọdụ na-esoro ndị ọzọ yie agba ikerekọ òkè n’ozi. Ndị nkwusa ka na-echeta isi ihe dị iche iche maka ozi ubi, a na-akpalikwa ha ịnwale ha n’ihi na nzukọ ndị a agbawo ha ume ikere òkè n’ọrụ ime nkwusa kwa izu.—Hib. 10:25.

⁵ E nweghị ihe e ji edochi anya nzukọ ndị Kraịst anyị, ebe anyị na ndị na-efe ofufe ibe anyị na-agbakọta ma bụrụ ndị a kpasuru ịrụ ọrụ ọma. Ọ bụrụ na ozi anyị ga-aga nke ọma, anyị aghaghị ịdị na-agachi nzukọ ọgbakọ anya. Ka anyị gosi ekele maka ndokwa a magburu onwe ya sitere n’aka Jehova site ‘n’ịghara ịhapụ nzukọ nke onwe anyị.’—Hib. 10:25.